Vazirlar Kengashi Raisi oʻrinbosarining sayyor qabuli boʻlib oʻtdi

Mamlakatimizda inson manfaatlarini taʼminlash, turmush sifati va farovonligini oshirish uchun avvalo, ularning dardu tashvishlari, orzu-niyatlari, hayotiy muammo va ehtiyojlarini oʻrganishga alohida eʼtibor qaratilmoqda. Shu maqsadda xalq bilan ochiq muloqotlar olib borilib, insonlar huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib sharoitlar yaratilayotir.

Keyingi yillarda amalga oshirilayotgan xalq bilan ochiq muloqotlar, oʻtkazilayotgan sayyor qabullar va xalq hayotini xonadonma-xonadon yurib oʻrganishlar mamlakatimizni har tomonlama rivojlantirish yoʻlida muhim vosita boʻlmoqda.

Aholining turli qatlamlari bilan muloqot qilish, mavjud dolzarb muammolarni aniqlash, ularni bevosita joyida bartaraf etish yuzasidan tezkor va aniq choralar koʻrish maqsadida 2-mart kuni Amudaryo tumanidagi 9-sonli Bolalar musiqa va sanʼat maktabida Qoraqalpogʻiston Respublikasi Vazirlar Kengashi Raisi oʻrinbosari Rajabboy Nurazizovning sayyor qabuli boʻlib oʻtdi.

Sayyor qabulda sektorlar rahbarlari, tuman hokimi oʻrinbosarlari, tumanda faoliyat koʻrsatayotgan banklar filiallari, mutasaddi tashkilot rahbarlari hamda oʻzlarini qiynayotgan muammolar yuzasidan murojaat qilish maqsadida tashrif buyurgan faol fuqarolar ishtirok etishdi.

Sayyor qabulda fuqarolardan yoʻllarga tosh yotqizish, simyogʻochlarni almashtirish, transfarmator oʻrnatish, toza ichimlik suvi bilan taʼminlash, safarbarlik chaqiruvi rezervi badalini qoplab berish, subsidiya asosida tikuv mashinasi olish, kontrakt toʻlovining bir qismi qoplab berish, shuningdek, Amudaryo tumanida ishlovchi xodimlarga ham ekologik konpensatsiya qoʻshilishi zarurligi kabi masalalarda jami 21 ta murojaat kelib tushdi.

Qabulda farzandi oliy taʼlim mussasasida toʻlov-kontark asosida taʼlim olayotgan, kontrakt toʻlovini toʻlashga oilaviy sharoiti toʻgʻri kelmayotganini aytib murojaat qilgan fuqaroning yashash sharoiti oʻrganib chiqilib, Yoshlar ishlari agentligi tuman boʻlimi boshligʻi Sardor Ismoilovga 1 hafta ichida kontrakt toʻlovini belgilangan tartibga asosan qoplab berish va tegishli yordam koʻrsatish topshirildi. Sayyor qabulda kelib tushgan aksariyat murojaatlar muddat talab qilishi sababli qonunda koʻrsatilganidek vaqt belgilanib, ijrosi nazoratga olindi.

Shu oʻrinda qayd etish lozimki, bugun har bir fuqaro uchun barcha davlat organlari va tashkilotlarining eshiklari ochiq. Davlat idoralari rahbarlari fuqarolarning murojaatlarini ish xonalarida emas, balki joyiga borib, haqiqiy holatni koʻrgan va oʻrgangan holda qabul qilmoqdalar.

Davlat idoralari rahbarlarining xalq bilan muloqot qilib, ularning muammolarini hal qilish, dard-u tashvishlarini tinglash boʻyicha amalga oshirilayotgan bu kabi sayyor qabullar xalqimiz turmush farovonligini yanada yuksaltirishga xizmat qilayotgani bilan ham ahamiyatlidir.

Tuman hokimligining Axborot xizmati.