NURONIY ONAXONLAR XIVAGA SAYoHAT QILIShDI
Millatning oʻziga xos maʼnaviyatini yuksaltirishda ayolning oʻrni va taʼsiri alohidadir. Chunki insonning ilk hayotiy tushuncha va tasavvurlari ona tarbiyasi bilan shakllanadi. Begʻubor goʻdakni yuq yuvib, oq tarab parvarishlab voyaga yetkazgunicha ayol qancha-qancha kun-tunlarni beorom oʻtkazmaydi deysiz? Oppoq-oydin orzulariga qorishgan, mehridan yaralgan allalar ijodkori ham, ijrochisi ham ayol. Bir qoʻlida roʻzgʻor, bir qoʻlida dunyo tashvishlarini koʻtarguvchi, qaynoq mehnati ila jamiyatga naf keltiruvchi ham ayoldir. Oila tinch-osoyishtaligi va demakki, jamiyat tinch-osoyishtaligi uchun fidoyilik ham ayol fitratiga xos.
Yurtimizda mukarrama, muhtarama va ulugʻ zot - onalarga, ayol-qizlarga yuksak hurmat-ehtirom koʻrsatilishi oliy qadriyatlarimizdandir.
Yaqinda 8-mart – Xalqaro xotin-qizlar kuni munosabati bilan tuman Mahalla va nuroniylarni qoʻllab-quvvatlash boʻlimi masʼullari saʼy-harakatlari bilan tumanimizda uzoq yillar turli sohalarda mehnat qilib, barchaga oʻrnak boʻlgan bir guruh fidoyi onaxonlariga yuksak ehtirom koʻrsatildi. Koʻngillarda joʻshqinlik, yashashga ishtiyoq uygʻotuvchi fasli bahorning ilk kunida 50 nafar onaxonlar qadimiy va hamisha navqiron Xiva shahriga sayohatga olib borildi. Qulay va yumshoq oʻrindiqli avtobus xarajati “Nuroniy” jamgʻarmasi Qoraqalpogʻiston boʻlimi tomonidan toʻlandi. Koʻpchiligi oilasi bagʻrida keksalik gashtini surib yashayotgan nuroniy onaxonlar, qarilik pensiyasiga chiqib ham faoliyatini davom ettirayotgan ayollarni tashkilotchilar kelishuviga muvofiq malakali va bilimdon GID Sabohat Saʼudalleva iliq kutib oldi va shaharning qadimiy obidalari, ushbu obidalarni bunyod etgan tarixiy shaxslar xususida qiziqarli bayon qilib berdi.
Sayohatchilarga bepul tushlik ham tashkil etildi.
- Onalarini ulugʻlaydigan yurtimdan oʻrgilay, - deydi sayohatchilardan biri, hoji ona Oʻgʻiljon Oʻrozova. – Oyogʻimizni yerga bosmay yuz chaqirimcha yoʻl bosib, shu muqaddas qadamjolarga olib kelishganini ayting!
- Xivaga oldin necha marta kelgan boʻlsam ham, bugungiday chuqur taassurot olmagandim. Sayohat uchun GID xizmati shu qadar muhim ekanligini endi bildim, - deydi uzoq yillar iqtisodchi boʻlib ishlagan Gulchehra opa Yoʻldosheva.
Sayohat hammada ham ulkan taassurotlar qoldirdi, tumanimizning turli jabhalarida mehnat qilib, nuroniy yoshga yetgan 50 nafar onaxonlar ham sayohatdan, ham bir kunlik diydorlashuvdan xursand, tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, oʻrinbosari Bahodir Boltaboyevlardan minnatdor boʻldilar.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
