YOʻL-PATRUL XIZMATI XODIMLARI TRANSPORT HODISALARINING OLDINI OLISh MAQSADIDAGI REYD TADBIRLARINI OʻTKAZIShDI

Yoʻllarda haydovchilar tomonidan yoʻl harakati qoidalari va harakat xavfsizligi asoslarini buzish holatlarini aniqlash maqsadida muntazam ravishda reyd tadbirlari tashkil etilib boriladi. Bunday tadbirlar yoʻllardagi harakatlarni tartibga solish, shuningdek, turli xavfli hodisalarning oldini olishda muhim ahamiyat kasb etadi.

Amudaryo tumanida ham Ichki ishlar boʻlimining yoʻl-patrul xizmati boʻlinmasi xodimlari tomonidan reyd tadbirlari oʻtkazilib, qoidabuzarliklar va turli koʻrinishdagi transport hodisalarining oldini olishga doir tegishli chora-tadbirlar amalga oshirilib borilmoqda.

Tuman hududidagi transport yoʻllarida koʻngilsiz hodisalarning oldini olish, harakat xavfsizligini taʼminlash maqsadida oʻtkazilgan navbatdagi reyd tadbirida ham 15 nafar yoʻl-patrul xizmati xodimlari qatnashishdi. Ushbu xodimlar tomonidan turli koʻrinishdagi qoidabuzarlik holatlari aniqlandi va tegishli tartibda bayonnomalar rasmiylashtirildi.

Tadbir davomida yoʻl harakati xavfsizligi qoidalarini buzgani uchun maʼmuriy jazoga tortilgan va qarzdorlik muddati 60 kundan oʻtgan hamda hujjatlari nosoz boʻlgan 123 nafar haydovchilar aniqlandi. Ularga bu holat boʻyicha bayonnomalar rasmiylashtirib, avtotransport vositalari tegishli tartibga koʻra vaqtinchalik jarima maydonchasiga qoʻyildi.

Maʼlumki, 2019-yilda qabul qilingan Oʻzbekiston Respublikasi Qonuniga koʻra Maʼmuriy javobgarlik toʻgʻrisidagi Kodeksning yoʻl harakati qoidabuzarliklari toʻgʻrisidagi ayrim moddalariga tuzatishlar kiritilgan edi. Kodeksning 126-moddasi boʻyicha birinchi bor qoidabuzarlik sodir etilganda jarimalar eng kam ish haqining 25 baravarigacha va maʼmuriy jazo chorasi qoʻllanilganidan keyin bir yil davomida takror sodir etilganda jarimalar eng kam ish haqining 40 baravarigacha oshirildi. Shuningdek, avtomobilning qoraytirilgan oynasi texnik reglamentga muvofiq boʻlmaganda yoxud haydovchida maxsus ruxsatnoma mavjud boʻlmaganda jarimalar qoʻllaniladi.

Svetoforning taʼqiqlovchi signalida yoki yoʻl harakatini tartibga soluvchining taʼqiqlovchi ishorasida toʻxtash chizigʻini bosib kirganlik va «qizil»da oʻtganlik uchun alohida javobgarlik belgilandi. Ushbu qoidalarga koʻra svetoforning yoki tartibga soluvchining taʼqiqlovchi ishorasida toʻxtaganda transport vositasining eng oldingi nuqtasi toʻxtash chizigʻi ustiga chiqib ketmasligi kerak. Agar qoidabuzarlik sodir etilsa, bunga ham tegishli miqdorida jarima solinadi.

Oʻz navbatida yoʻl harakati qoidalarini buzganlik uchun jarimalarni toʻlash muddati uzaytirildi. Endi u foto va video qayd etish texnika vositalari orqali qayd etilgan yoki qayd etilmaganidan qatʼiy nazar, qaror chiqarilgan kundan eʼtiboran 60 kundan kechiktirilmay, uning ustidan shikoyat berilgan hollarda esa – shikoyat qanoatlantirilmay qoldirilganligi toʻgʻrisida xabar berilgan kundan eʼtiboran 30 kundan kechiktirmay jarimani toʻlash kerak. Ilgari ushbu muddatlar faqat kamera obʼektivlari ostiga tushgan jarimalar boʻyicha qoʻllanilar edi, qolgan hollarda esa qoidabuzar 15 kunda uni toʻlashi talab etilardi.

Reyd tadbiri davomida yoʻl-patrul xizmati xodimlari tomonidan qoidabuzarlarga ushbu tartib toʻgʻrisida toʻliq tushunchalar berilib, tegishli hujjatlar rasmiylashtirildi. Shu bilan birga yoʻl harakati qoidalariga muntazam ravishda amal qilinish kerakligi, bu bilan turli koʻngilsiz hodisalarning oldini olish mumkinligi batafsil tushuntirildi.

M.Mirzamurodov, tuman IIB JXKB boshligʻi, mayor.