KASBGA MEHR

Yurtimizda ustoz va murabbiylar mehnati yuksak qadrlanayotgani zamirida ularga xalqimizning hurmat-ehtiromi mujassam. Muyassar Ishniyozova ham kasbiga mehri bilan koʻpchilikning hurmatini qozongan ustoz.

Muyassarning koʻnglida oʻqituvchilikka havas uygʻonganida hali boshlangʻich sinf oʻquvchisi edi. Bu bejiz emasdi. Boshlangʻich sinf oʻqituvchisi Xamzina Olga Fyodorovnaning saboq berishdagi mahorati, bolajonligi, sinfdagi har bir oʻgʻil-qizni oʻz farzandidek yaxshi koʻrib, har bir mashgʻulotni ularning koʻngliga joylash uchun kuyunishlari Muyassarning havasini keltirar, ustozi oʻrnida goʻyo oʻzini tasavvur qilib koʻrardi. Maktabni tugatib, Oʻzbekiston Davlat Jahon tillari universitetining rus tili va adabiyoti fakultetiga oʻqishga kirganida ham, oliygohni imtiyozli diplom bilan tugatib kelganida ham shu orzu uni tark etmadi. Ammo 1994-yil ilk oʻqituvchilik faoliyatini boshlagan damlarida Olga Fyodorovna kabi sevimli ustoz boʻlish uchun ancha mehnat qilishi lozimligini angladi: chunki u ilk darsini  30-sonli maktabning 11-sinfida boshlagan edi. Mustaqil hayot boʻsagʻasiga kelib qolgan, boʻylari boʻyiga teng oʻquvchilar deyarli har darsida muallima qizga bir shumlik qilishardi, goh biri stol ustidagi sumkasini yashirsa, goh biri doskaga oʻgirilganida uning oʻrniga borib oʻtirardi.

Muyassar bolalarning koʻngliga yoʻl topish oson emasligini angladi. Biroq shu kasbni  tanlaganidan oʻkinmadi, asabiylashganini ularga sezdirmaslikka intildi, maktabning tajribali oʻqituvchilarining, bir umr 31-sonli maktabda oʻquvchilarga taʼlim bergan onasi Roziya Gabdulhayevalarning maslahatlariga amal  qilib, oʻzini munosib tutishga, oʻquvchilarning hurmatini qozonishga intildi va uddasidan chiqdi. Oradan oʻtgan 29-yil mobaynida qancha-qancha oʻquvchilarga dars berdi, koʻnglida ilm-fanga havas uygʻotdi, yaxshi insonlar boʻlib yetishishiga, hayotda oʻz oʻrinlarini topishiga koʻmaklashdi.

Oliy toifali oʻqituvchi bulardan tashqari, tumanimiz maktablarining rus tili va adabiyot fani oʻqituvchilariga trener oʻqituvchi sifatida mashgʻulotlar oʻtib, mahorati oshishiga hissa qoʻshdi.

Muyassar Ishniyazovaning taʼlim bergan oʻquvchilari Bilimlar bellashuvi, asosiy fanlar olimpiadalarida doim faxrli oʻrinlarni egallashadi. Shunday damlarda u mehnatlari samarasidan juda quvonadi, oʻzi ham oʻqish, oʻrganishdan toʻxtamaydi. Shuning uchun ham yaqinda imtihondan 86 ball toʻplab, rus tili va adabiyoti fanini  bilish darajasi toʻgʻrisidagi milliy sertifikatni olishga erishdi.

– Men ilk saboq bergan oʻquvchilar hozir ellik yosh ostonasiga borib  qolishdi. Koʻrishib qolsak, maktabdagi shoʻxliklarini eslab, kulishamiz, “ustoz”, deya ehtirom koʻrsatishlaridan quvonib ketaman. Hayotimning bolalarga bagʻishlangan damlaridan minnatdor boʻlaman, kasbimga mehrim oshaveradi, –  deydi Muyassarxon.

Ha, uni el-yurtda, mehnat jamoasida, oʻquvchilari orasida hurmat-eʼtiborli qilgan – kasbiga mehri. Shunday fidoyi ustozlar doim omon boʻlsin, deymiz.

Oygul RAJABOVA.