Nukus Harbiy prokuraturasi tashabbusi bilan “Inson qadri – oliy qadriyat” tamoyili asosida sayyor qabul boʻlib oʻtdi

Maʼlumki, Oʻzbekiston Respublikasi Harbiy prokuraturasi Qurolli Kuchlarda va harbiy tuzilmalarda qonunlarga rioya etilishini nazorat qiladi. Mazkur organ tomonidan mamlakatimiz suverenitetini mustahkamlash, mudofaa salohiyatini oshirish, harbiy xizmatchilarning va oila aʼzolarining huquqlarini taʼminlashga qaratilgan chora-tadbirlar tufayli koʻplab murojaatlar adolatli hal etilmoqda. Xususan, faqat 2022-yilning oʻzida mamlakatimizda Oʻzbekiston Respublikasi Harbiy prokuraturasiga murojaat yoʻllagan 2 mingga yaqin fuqarolarning murojaatlari koʻrib chiqilib, 254 tasi qanoatlantirilgan. Shuningdek, sayyor qabullarda 3 ming 200 nafar shaxs qabul qilinib, aniqlangan muammolarini hal etish choralari koʻrilgan.

Shuni alohida qayd etish kerakki, mamlakatimizning taraqqiyot strategiyasidan kelib chiqib, harbiy tuzilmalarda ham inson qadri ustuvor vazifa sifatida belgilangan. Harbiy xizmatchilarning huquq va manfaatlari, ijtimoiy himoyasi taʼminlanishi, ularning oilaviy xotirjam yashashi alohida nazoratga olingan.

Joriy yilning 10-mart sanasida Nukus Harbiy prokuraturasi tashabbusi bilan 9-sonli bolalar musiqa va sanʼat maktabi binosida Amudaryo tumani Mudofaa ishlari boʻlimi, Qoralpogʻiston Respublikasi Favqulodda vaziyatlar boshqarmasi, Milliy gvardiya Qoraqalpogʻiston Respublikasi boshqarmasi, Amudaryo tumani mehnat va bandlikni taʼminlash hamda Xalq taʼlimi boʻlimlari bilan hamkorlikda “Inson qadri – oliy qadriyat” tamoyili asosida sayyor qabul oʻtkazildi.

Sayyor qabulda Amudaryo tumani Favqulodda vaziyatlar boʻlimi, Milliy gvardiya qoʻriqlash boʻlimi, Amudaryo tumani Mudofaa ishlari boʻlimi shaxsiy tarkibi va xodimlari, shuningdek, isteʼfodagi harbiylar hamda ularning oila aʼzolari, OAV vakillari ishtirok etdilar.

Sayyor qabul davomida 71 nafar harbiy xizmatchi va ularning oila aʼzolarining turli masalalar boʻyicha murojaatlari tinglandi. Har bir murojaat soha mutaxassislari tomonidan batafsil oʻrganilib, shulardan 1 ta murojaat joyida ijobiy hal etildi. 14 ta murojaat tajribali huquqshunoslar tomonidan oʻrganilib, murojaat egalariga tegishli huquqiy maslahatlar, zarur tushunchalar berildi. 11 ta murojaat ham batafsil oʻrganishlar orqali qanoatlantirildi.

“Inson qadri – oliy qadriyat” tamoyili asosida oʻtkazilgan sayyor qabul davomida soha mutaxassislari tomonidan “Korruptsiyaga qarshi kurashish – jamiyat ravnaqini taʼminlashdir” mavzusida targʻibot tadbiri ham oʻtkazilib, jamiyatimizda chuqur ildiz otgan korruptsiyaga barham berishda huquqni muhofaza qilish organlari bilan xalqning hamkorligi muhim ahamiyatga ega ekanligi taʼkidlandi. Targʻibot tadbiri davomida ishtirokchilar oʻzlarini qiziqtirgan savollar bilan murojaat qilishib, mutaxassislar tomonidan havola etilgan biri-biridan qiziqarli javoblar orqali bu borada keng va mazmunli tushunchaga ega boʻldilar.

Robiya YOʻLDOShEVA.