XIZR ELI MAHALLASIDA NAVROʻZ BAYRAMIGA BAGʻIShLANGAN TADBIR OʻTKAZILDI

Oʻlkamizda yangilanish va yasharish ayyomi – Navroʻzi olam shukuhi kezmoqda. Bu ulkan shodiyona yurtimizda yashayotgan barcha millat va elat vakillari uchun eng suyukli bayramdir. Necha ming yillardan buyon davom etib kelayotgan ushbu bayram, bahor tantanasi maʼnaviy hayotimizning koʻrk-u ziynatiga aylangan. Joylardagi kabi tumanimizning chekka hududlaridan boʻlgan Xizr eli mahallasida ham Navroʻz ayyomi munosabati bilan katta tadbir tashkil etildi.

19-mart kuni Xizr eli mahallasi hududidagi fermerlar homiyligida “Shahzodbek-Xursandbek” toʻyxonasida ochiq dasturxon atrofida oʻtkazilgan ushbu tadbirda mahallaning yoshu-qari aholisi jamul-jam boʻldi.

Bahoriy kuylar sadosi ostida boshlangan tadbirni mahalla fuqarolar yigʻini raisi Otabek Toʻrayev ochib, barchani ayyom bilan qutladi hamda Navroʻzning yurtimizda mehr-oqibat, hamjihatlik, insoniylik, bagʻrikenglik va bunyodkorlik, xayr-saxovat muhitini yanada mustahkamlash, yosh avlodni milliy anʼanalarimizga sadoqat va umuminsoniy qadriyatlarga hurmat ruhida kamol toptirishdagi oʻrni va taʼsiri tobora ortib borayotganini taʼkidladi. Mahalla nuroniylari ham soʻzga chiqib, barchani bayram bilan tabriklashdi. Sharqona yangi yil barcha elimizga qut-baraka, har bir xonadonga tinchlik-omonlik, baxt-saodat, fayz-baraka, moʻl rizq, qalblarga quvonch va zavq olib kelishini tilab, duoga qoʻl ochishdi.

Darhaqiqat, Navroʻz kelishini bobodehqonlarimiz, mirishkor bogʻbonlarimiz orziqib kutishadi. Ular yerga baraka urugʻini sochadi, mevali va manzarali daraxtlar oʻtqazadi. Zero, yerga mehr va mehnat bilan qanchalik koʻp ishlov berilsa, dehqonchilik, ziroat ham shunga qarab barakali boʻladi. Roʻzgʻorimiz, butun hayotimiz farovon boʻlib boraveradi. Elimizda bu muborak faslni uygʻonish fasli ham deyishadi, barcha hududlarda obodonlashtirish, koʻkalamzorlashtirish ishlari boshlanadi. Bu yil ham erta bahordan tumanimizning barcha hududlaridagi kabi Xizr eli mahallasida “Yashil makon” umummilliy loyihasi doirasidagi koʻchat ekish ishlari boshlab yuborildi.

Bayram tadbirida mahalla hududidagi 46-sonli umumtaʼlim maktabi oʻquvchilari hamda 47-sonli maktabgacha taʼlim tashkiloti tarbiyalanuvchilari ishtirokidagi qoʻshiq va kuylar, dilrabo raqslar namoyish etildi. Tadbirga taklif etilgan el suygan xonanda va sozandalar koʻtarinki kayfiyatni yanada yaxshilab, kuylarni shoʻx taronalarga ulashdi, barchani raqsga chorlashdi. Aytilayotgan qoʻshiqlarga mos ijro etilgan shoʻx raqslar davraga oʻzgacha fayz olib kirdi.

Bayram dasturxoniga anʼanaviy oʻzbek milliy taomlari, koʻk somsa, koʻk chuchvara, goʻja, sumalak kabi bahor taomlari, zogʻora, goʻshtli va koʻk piyozli patir nonlar ham tortildi. Tadbirga homiylik qilayotgan fermerlar tomonidan mehmonlarga 80 kilogramm osh damlanib tarqatildi.

Tadbir davomida ovul nuroniylariga, faxriylarga, Navroʻz bayramni oʻtkazishda faol qatnashgan “Shirin-buloq” fermer xoʻjaligi va “Quvsuriq” chorvachilik fermer xoʻjaligi rahbarlari, ushbu fermer xoʻjaliklarda mavsum davomida yuqori koʻrsatkichlarga erishgan bir guruh ishchilar va mexanizatorlarga bayram munosabati bilan sovgʻalar ulashildi.

Navroʻz ayyomining tashrifini tantanavor ruhda bayram qilgan xizr eliliklar qalbida ushbu tadbir oʻzining eng goʻzal va chiroyli xotiralari bilan muhrlandi.

O.Xudoyberganova.