“AYoLI ULUGʻGANGAN YuRT” NOMLI MAʼNAVIY-MAʼRIFIY TADBIR OʻTKAZILDI

Keyingi yillarda mamlakatimizda xotin-qizlarni har tomonlama qoʻllab-quvvatlash, ularning muammolarini oʻrganish va hal qilish, bandligini taʼminlash, tadbirkorlikka jalb qilish, ijtimoiy-siyosiy faolligini, yurtimizda amalga oshirilayotgan barcha sohalardagi islohotlarga, yangilanishlarga daxldorlik hissini oshirishga ulkan eʼtibor qaratilayotir.

Sohada hali yechimini kutayotgan muammolar ham mavjudligi bu boradagi ishlarni yanada jonlantirishni taqozo etmoqda. Boisi oʻz yashash manziliga ega boʻlmagan ayollar, ehtiyojmand ayollar hali bor. Ularning ham yaxshi daromad topib, farovon yashashiga erishish uchun bandligini taʼminlash, tadbirkorlikka jalb etish juda muhim.

Shu yilning 25-martida tuman Madaniyat markazida “Ayoli ulugʻlangan yurt” nomli maʼnaviy-maʼrifiy tadbir ham bu boradagi ezgu ishlarni yanada jonlantirishga qaratildi.

Tuman hokimligi, Ichki ishlar boʻlimi, Madaniyat va turizm boʻlimi hamkorligida tashkillashtirilgan ushbu tadbirga ovul va mahallalarda  faoliyat yuritayotgan xotin-qizlar faollari, yetakchilar, nuroniy onaxonlar va yoshlar vakillari ishtirok etdilar.

Tadbirni tuman hokimi oʻrinbosari Goʻzal Soburova ochdi va tumanimiz hayotining barcha jabhalarida xotin-qizlarning ishtirokini kuchaytirish, tadbirkorlik tashabbuslarini qoʻllab-quvvatlash, ularning taʼlim olishi, muayyan kasbiy koʻnikmani egallashi, bandligini taʼminlashga koʻmaklashish borasida amalga oshirilayotgan ishlar xususida maʼruza qildi.

Taʼkidlanishicha, 2022-yilda ijtimoiy himoyaga muhtoj 3810 nafar xotin-qizlar “Ayollar daftari”ga kiritilgan va 3803 nafariga yordamlar berilib, oilalari iqtisodi yaxshilanishiga erishilgan. 300 nafar ayol-qizlar mamlakatimizning tarixiy shaharlariga sayohatga olib borilgan, kamdaromadli oilalarning 16 nafar talaba ayol-qizlarining toʻlov kontrakt pullari qoplab berilgan, 218 nafar nogironligi boʻlgan ayol-qizlar reabilitatsiya vositalari bilan taʼminlangan, 116 ta ajrim yoqasiga kelib qolgan oilalarning 113 tasi jamoatchilik aralashuvi bilan yarashtirilgan, bilib bilmay jinoyat koʻchasiga kirib qolgan 3 nafar xotin-qizlar tuman hokimligining xotin-qizlar boʻlimi kafilligi asosida qamoq jazosidan saqlab qolinib, sogʻlom turmush tarziga qaytarilgan.

Ishtirokchilarga Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva mavzuga doir psixologik seminar-trening oʻtdi.

Tadbirda soʻzga chiqqan Xolimbeg ovulidagi 35-sonli maktabning 11-sinf oʻquvchisi, Zulfiya nomidagi davlat mukofoti sohibasi Barno Samandarova yurtimizda yoshlarga ilm olishi, oʻz iqtidorlarini namoyon etishi, salohiyatlarini yuksaltirishi uchun yaratilgan sharoitlar haqida toʻlqinlashib gapirdi, erishgan yutuqlariga ana shu sharoitlar mustahkam asos boʻlganini taʼkidladi.

Tadbirda tuman Adliya boʻlimi bosh maslahatchisi Nilufar Jumaniyozova barcha ayol-qizlarni Navroʻz bayrami bilan qutlab, yangilanayotgan Konstitutsiyaning har bir moddasi hayotiy tajribalarga asoslangani va hal qilinishi kerak boʻlgan muammolarning yechimi sifatida loyihada oʻz aksini topganligini taʼkidladi va Referendumda faollik bilan ovoz berishga chaqirdi.

Tadbir soʻngida tuman Madaniyat markazi xodimlari tomonidan tayyorlangan kontsert dasturi namoyish etildi. Ayolni, tinchlikni, ona yurtni ulugʻlovchi kuy-qoʻshiqlar barchaga manzur boʻldi.

Oygul RAJABOVA.