MISSIONERLARNING ALDOVIGA UChMANG!

Tarix oʻzga hududlarni zabt etish maqsadida ishlatiladigan urush qurollari yillar davomida uzluksiz takomillashib borganini koʻrsatadi. Bugungi kunda esa, oʻzga hududlarni zabt  etish uchun  ularning aholisini mahv etish shart emas. Zero, ongi va shuuri zabt etilgan, qarash va kayfiyatlari kerakli yoʻnalishga oʻzgartirilgan yerlik aholi koʻmagida har qanday boylik, tabiiy resurslarga egalik qilish mumkin boʻlib qolmoqda.

Missionerlikning asosiy maqsadi xristianlikni targʻib qilish yoʻli bilan jamiyatda xayrixoh boʻlgan guruhlarni shakllantirish va tarafdorlar sonini koʻpaytirish orqali muayyan mamlakat va hudud ustidan nazorat oʻrnatishdir. Yurtboshimiz taʼkidlaganlaridek. «...qudratli davlatlar va muayyan siyosiy markazlar oʻz maqsadlariga erishish uchun avvalo zabt etmoqchi boʻlgan mamlakatlarning aholisi ongini oʻziga qaram qilishga intiladi».

Missionerlar qaysi yurtga kirsalar, oʻsha hududlardagi xalqlarni xristianlashtirish yoʻli bilan ularning birdamligiga putur yetkazish, ichki nizolarni keltirib chiqarish orqali ularning rivojlanishiga toʻsqinlik qilish, iqtisodiy, ijtimoiy va maʼnaviy jihatdan qaram va tobe qilishga harakat qiladilar. Masalaning ana shu jihatiga eʼtibor berilsa, missionerlik harakatlari ortida diniy zaminda millatni ichidan boʻlib tashlashga qaratilgan gʻarazli siyosiy maqsadlar yotganini, u keltirib chiqaradigan fojealarni anglab yetish qiyin emas.

Bu - missionerlar oʻz oldilariga qoʻygan maqsadlarga erishadigan boʻlsalar, ular faoliyat olib borayotgan mamlakatda ham xalqning parokandalikka yuz tutishi va maʼnaviy  tanazzulning kelib chiqishi mumkinligi haqida xulosa chiqarish imkonini beradi.  

Missionerlarning bugungi kundagi faoliyati hech bir mintaqa, hech bir davlat bunday tahdiddan xoli emasligini koʻrsatadi. Bunday holatlarning oldini olish uchun esa missionerlikning mohiyatini toʻgʻri anglash, uni bartaraf etish yoʻlida maqsadli, tizimli va uzluksiz faoliyat olib borish zarur boʻladi.

Abdurahmon hoji MATSAPAYeV,