AMUDARYo TELEVIDENIYeSINING GRANT LOYIHASI DOIRASIDA “ONALAR OʻGITI” TADBIRI OʻTKAZILDI

Inson dunyoga kelgan ilk kunidan boshlab oila bagʻrida ulgʻayadi. Ota-onasi, yaqinlari mehr-muhabbati bilan olamni taniydi. Mahallasi, kindik qoni tomgan ona Vatanini ham oilasi orqali idrok etadi. Shu bois, oila qoʻrgʻonini mehr-muhabbat, baxt-iqbol koshonasi, deya taʼriflaymiz. Oilaning inson uchun qadr-qimmati shunchalar qadrli va buyukki, qayerda, qanday mashgʻulot bilan mashgʻul boʻlmasin, kun davomida koʻz qarogʻida oʻzi va yaqinlari uchun muqaddas goʻsha – oilasi surati muhrlanib turadi va uni bagʻriga chorlayveradi.

Amudaryo tumanining goʻzal Doʻrman qishlogʻidagi 84-sonli umumtaʼlim maktabida boʻlib oʻtgan “Onalar oʻgiti” tadbirida koʻpni koʻrgan nuroniy onaxonlar oila saltanatining milliy-maʼnaviy asoslari, ota-onalarning farzandlari oldidagi faroʻandlarning esa ota-ona oldidagi burch va majburiyatlari, odamiylik, oʻzaro mehr-oqibat tamoyillarini oʻzida mujassam etgan oila qadriyatlari xususida va bu milliy-maʼnaviy oila qadriyatlarining tarbiyaviy ahamiyati toʻgʻrisida soʻz yuritdilar.

Yoshlar maʼnaviyatini yuksaltirish, ular ongida Vatanga muhabbat, milliy va umuminsoniy qadriyatlarga sadoqat ruhini shakllantirish maqsadida Amudaryo televideniyesining tadbir boʻlib oʻtdi. “Yuksak maʼnaviyatli va axloqli yoshlar – kelajak poydevori” grant loyihasi doirasida “Buvijonlar maktabi” aʼzolari ishtirokida joriy yilning 6-aprel sanasida boʻlib oʻtgan mazkur “Onalar oʻgiti” tadbirida Doʻrman qishlogʻida istiqomat qiluvchi nuroniy onaxonlar – faxriy pedagog Rohatoy Raimova, mehnat faxriysi Sanamjon Rajabova, 84-sonli maktab direktori Erkin Qurbonboyev, mazkur maktabning rus tili fani oʻqituvchisi, qishloqdagi ibratli oila sohibasi Tursungul ona Matsafoyevalar hamda 84-sonli umumtaʼlim maktabining yuqori sinf oʻquvchilari, OAV vakillari ishtirok etdilar.

Tadbirni maktab direktori Erkin Qurbonboyev ochdi va oila qadriyatlari, shuningdek, farzandlar tarbiyasida aziz onaxonlarimiz, moʻʼtabar buvijonlarimizning tutgan oʻrni haqida toʻxtalib oʻtdi.

Shundan soʻng, “Yuksak maʼnaviyatli va axloqli yoshlar – jamiyat poydevori” loyihasining koordinatori, jurnalist Robiya Yoʻldasheva mazkur loyihaning yuksak maʼnaviyatli va axloqli yoshlarni tarbiyalashdagi ahamiyati va ushbu loyihadan kutilayotgan natijalar xususida batafsil tushunchalar berdi.

Tadbir davomida hoji ona, faxriy pedagog Rohatoy ona Rahimova yoshlarga mustahkam oila qurishning jamiyatga foydasi, oʻsib kelayotgan yosh avlodning  har tomonlama yetuk va mukammal insonlar boʻlib voyaga yetishlari uchun oilada ahamiyat berish juda muhim boʻlgan jihatlarga toʻxtalib, yoshlarga kelgusida bu borada xatoga yoʻl qoʻymasliklari boʻyicha zarur oʻgit va maslahatlar berdi. Ayniqsa, shoshilinch turmush qurishning salbiy oqibatlari haqida hayotiy  misollar orqali yoshlarga tushunchalar berib, ularni har qanday masalada, ayniqsa, oila qurishda shoshilmasdan ish tutishga daʼvat etdi.

Tadbir davomida doʻrmanlik nuroniy onaxon Sanamjon buvi Rajabova oʻzi hayotda hamisha amal qilgan tarbiyaviy qonun-qoidalar xususida soʻz yuritib, qizlarni oilaviy hayotga tayyorlash bu – ona Vatanning kelajagi uchun masʼuliyat hissi bilan yashash ekanligi alohida taʼkidladi.

Shundan soʻng, 84-sonli maktabning rus tili fani oʻqituvchisi Tursungul Matsafoyeva ham mustahkam oila jamiyat poydevori ekanligini, oilalarda toʻlaqonli sogʻlom muhit yaratishda ota-onaning va farzandlarning burch va majburiyatlari xususida qiziqarli maʼruza qilib, yosh qizlarni milliy-maʼnaviy qadriyatlarga hurmat-eʼtiborli boʻlishga daʼvat etdi.

“Onalar oʻgiti” tadbirida oʻquvchi-yoshlar ham faol ishtirok etdilar. Xususan, 8-sinf oʻquvchisi Durdona Zaripova “Buvijonlar maktabi” aʼzolariga oʻzini qiziqtirgan savollar bilan murojaat qilib, tengdoshlarini odobli-axloqli boʻlishga, ayni paytda, oilaviy hayotga tayyorgarlikning oʻta muhim va ilk bosqichi  - bilim olish, munosib kasb-korli boʻlishga chorladi.

“Onalar oʻgiti” tadbiri qizgʻin bahs-munozaralarga boy, yoshlarning faol ishtiroki bilan mazmunli oʻtdi.

Ravshan BAHRAMOV, Muyassar Xalillayeva.