Kichik sanoat zonalari hududlarning investitsion jozibadorligini oshiradi

Mamlakatimizda kichik biznesni rivojlantirish boʻyicha koʻplab samarali ishlar amalga oshirilmoqda. Jumladan, kichik sanoat zonalari tashkil etilib, ularning faoliyati davlat tomonidan qoʻllab-quvvatlanmoda. Sababi, tadbirkorlik subʼektlarini joylashtirishga moʻljallangan, muhandislik-kommunikatsiya va infratuzilma obʼektlarini, ishlab chiqarish maydonini oʻz ichiga olgan kichik sanoat zonalari joylashgan hududining rivojlanishiga katta imkoniyat yaratadi. Xususan, sanoat ishlab chiqarishni jadallashtiradi, hududlarning investitsion jozibadorligini oshirib, boʻsh turgan binolardan unumli foydalanishga imkoniyat yaratadi.

Amudaryo tumanida ham Prezidentimizning 2018-yilning 6-martidagi “Qoraqalpogʻiston Respublikasida kichik sanoat zonalarini tashkil etish chora-tadbirlari toʻgʻrisida”gi qarori bilan mana shunday maxsus sanoat zonalari tashkil etildi. Qaror asosida tumanimizdagi “Amudaryo paxta tozalash zavodi” aktsiyadorlik jamiyatining eski binosi kichik sanoat zonasiga aylantirildi.

Kichik sanoat zonasida faoliyat olib borayotgan tadbirkorlarning ish faoliyatini, muammo va takliflarini oʻrganish maqsadida Qoraqalpogʻiston Respublikasi prokuraturasi boʻlim prokurori Renat Xudoybergenov, Qoraqalpogʻiston Respublikasi kichik va yoshlar sanoat zonalarini boshqarish boʻyicha yagona direktsiyasi yetakchi mutaxassisi Baxauddin Xoʻjambergenovlar Amudaryo tumaniga tashrif buyurishdi.

Masʼullar dastlab tadbirkor Tamara Yusupovaga tegishli “Tamara tekstil” masʼuliyati cheklangan jamiyatiga qarashli tikuvchilik korxonasida boʻlishdi. Korxonada ayollar, erkaklar va bolalar kiyimlari, toʻquvchilik mahsulotlari tayyorlanadi, har xil yosh toifasidagi xaridorlar uchun turli xildagi kiyim-kechaklar tikiladi. 2009-yilda tikuvchilik boʻyicha tadbirkorlik faoliyatini boshlagan Tamara Yusupova oʻz ishini dastlab 3 mln. soʻm kredit mablagʻi olib ishlashdan boshlagan. Keyinchalik 40 mln va 136 mln. soʻm miqdorida imtiyozli kredit olib, tadbirkorlik faoliyatini kengaytirgan.

Shundan soʻng masʼullar tadbirkor Bahodir Kamolovga qarashli “Kamolov eshiklari” masʼuliyati cheklangan jamiyatida boʻldilar.

Ushbu korxona 2013-yilda ish boshlagan boʻlib bu yerda zamonaviy rusumdagi eshik va deraza romlari, uy-roʻzgʻor mebellari sifatli va hamyonbop narxlarda ishlab chiqariladi. Ayni paytda korxonada katta usta darajasiga erishgan 5 nafar ishchi xodim 10 nafardan ziyod shogird-ishchilariga duradgorlik kasbining sir-asrorlarini puxta oʻrgatib kelishmoqda.

Korxonada ishchilar uchun barcha sharoitlar yaratilgan boʻlib, uzoqdan kelib ishlovchilar uchun yotoqxonalar ham mavjud. Ishchilar kuniga 2 mahal issiq ovqat bilan taʼminlanadi. Ularning ishlab chiqargan eshik va deraza romlarining sifatiga qarab 2 mln.dan 3 mln. soʻmgacha oylik ish haqi toʻlanadi.

Kichik sanoat zonasidagi navbatdagi tashrif tadbirkor Nazokat Allabergenovaga tegishli “Mang‘it milk” masʼuliyati cheklangan jamiyatiga boʻldi. Oʻz ish faoliyatini dastlab 30 litr sut mahsulotini qayta ishlashdan boshlagan tadbirkorning korxonasida bugungi kunda 1 tonnadan ortiq sut qayta ishlanib, kefir, qaymoq, tvorog kabi mahsulotlar ishlab chiqariladi.

Tadbirkor ayol 2018 kichik sanoat zonasida faoliyat boshlagan paytida 350 mln. soʻm miqdorida kredit olgan edi. U hozirda kreditni toʻliq toʻlab, yana katta miqdorda imtiyozli kredit olishni va ushbu mablagʻlar evaziga pishloq ishlab chiqaruvchi uskuna xarid qilishni niyat qilgan.

Kichik sanoat zonasining bir chekkasida temir eshiklar ishlab chiqarishga moʻljallangan korxona ham faoliyat yuritmoqda. Tadbirkor Jasur Bobojanov 2013-yilda “Amu metall kovka art” masʼuliyati cheklangan jamiyatini ochgan edi.

Ushbu korxonada sifatli va hamyonbop eshik va isitish qozonxonalari, zambillar tayyorlanib, ichki bozorlarimizda oʻz xaridorlariga ega boʻlmoqda. Tadbirkorning niyati – eksportni yoʻlga qoʻyish va oʻz faoliyatini yanada kengaytirib, ishsiz yoshlarni ish bilan taʼminlashdir.

Masʼullar kichik sanoat zonasidagi korxona egalari bilan yaqindan suhbatlashib, ularning kelgusidagi ish faoliyatlariga muvaffaqiyatlar tilashdi.

Aytish kerakki, bugungi kunda ushbu kichik sanoat zonasida tadbirkorlar uchun investitsiya loyihalarini amalga oshirishda barcha sharoit yaratilmoqda. Xususan, transport qatnovining qulayligi va muhandislik-kommunikatsiya infratuzilmasining mavjudligi ishlab chiqarish sanoati rivojida muhim ahamiyat kasb etayotir.

Tuman hokimligining Axborot xizmati.