YOʻL-TRANSPORT HODISASI MUHOKAMASIGA BAGʻIShLANGAN YIGʻILISh OʻTKAZILDI

Har kim ertalab ezgu niyatlar bilan ostona hatlab koʻchaga chiqadi, ishga borish, hayotiy zarurati tufayli transport vositasidan foydalanadi. Keyingi yillarda fuqarolarning hayot farovonligi ortib borayotgani deyarli har bir oila shaxsiy transport vositalariga ega ekanligida ham koʻrinadi. Bu albatta, quvonarli hol. Biroq koʻchalarda avtotrasport boshqarish qoida va meʼyorlariga amal qilmaslik, haydovchi va piyodalarning bilim-koʻnikmalari, qonunga itoatkorligi, boshqa yoʻl harakati ishtirokchilariga oʻzaro hurmatining pastligi oqibatida yoʻl-transport hodisalari, koʻplab yoʻqotishlar sodir boʻlayapti. Barchaning koʻz oʻngida yuz bergan avtohalokatlar oqibatida ne-ne alamlar, yurakni larzaga soluvchi yoʻqotishlardan ayrimlar oʻziga xulosa chiqarmayapti va natijada bu kabi koʻngilsiz voqealar sodir boʻlishda davom etmoqda.

Jumladan, shu yilning 8-may kuni Amudaryo tumani hududidan oʻtuvchi “A-380 Gʻuzor-Buxoro-Nukus-Beyneu” avtomobil yoʻlining 749-750-kilometri oraligʻida odam oʻlimi bilan bogʻliq ogʻir yoʻl transport hodisasi yuz berdi. Yuz bergan yoʻl transport hodisasida “Kobalt” markali avtotransport vositasi yuqori tezlikda harakatlanib kelib, oʻz yoʻnalishi boʻylab harakatlanib borayotgan “KamAz” rusmli avtotransport vositasining orqa tarafidan borib urilgan va natijada yoʻl transport hodisasi yuz bergan.

Ushbu yoʻl-transport hodisasi Amudaryo tumani hokimligining majlislar zalida keng jamoatchilik ishtirokida muhokama qilindi.

Yigʻilishda Qoraqalpogʻiston Respublikasi Ichki ishlar vazirligi jamoat xavfsizligi xizmati yoʻl harakati havfsizligi boshqarmasi boshligʻining birinchi oʻrinbosari, tuman hokimi oʻrinbosari, tuman Ichki ishlar boʻlimi xodimlari, mahalla raislari va xotin-qizlar faollari ishtirok etishdi.

Yigʻilishda yoʻl harakati xavfsizligi boshqarmasi boshligʻining birinchi oʻrinbosari respublikada roʻy berayotgan yoʻl-transport hodisalari boʻyicha maʼlumot berib oʻtdi.

Shuningdek, sodir boʻlayotgan yoʻl-transport hodisalarining asosiy sababi sifatida tezlikning oshirilishi, avtomobilni spirtli ichimliklar va boshqa psixotrop moddalar isteʼmol qilgan holda boshqarish, avtomobilda harakatlanayotgan paytda chalgʻish, yaʼni hayolning buzilishi, yoʻllarning taʼmirtalab ahvolga kelib qolishi, transportning tez-tez texnik koʻrikdan oʻtkazilmasligi, haydovchilarning yoʻl harakati qoidalariga rioya qilmasliklari oqibatida kelib chiqishini taʼkidladi.

Yigʻilishda bunday koʻngilsiz hodisalar sodir boʻlmasligi uchun mahallalarda, umumtaʼlim maktablarda, Oliy taʼlim muassasalarida, aholi gavjum joylarda tushuntirish-targʻibot tadbirlari olib borilishi kerakligi aytib oʻtildi.

Yigʻilish davomida Qoraqalpogʻiston Respublikasi hududida roʻy berayotgan yoʻl-transport hodisalari aks etgan videorolik namoyish etildi.

Shundan soʻng, fuqarolarning sodir boʻlgan yoʻl-transport hodisasi boʻyicha fikr-mulohazalari tinglandi.

Aytish kerakki, yoʻlga chiqqan har bir harakat ishtirokchisi oʻz zimmasidagi masʼuliyatni chuqur his qilgan holda belgilangan yoʻl harakati qoidalariga toʻliq rioya qilib, harakatlanmogʻi zarur. Ana shundagina yoʻllarimizda sodir boʻlishi mumkin boʻlgan nohush voqealarning oldi olinadi. Bunda esa nafaqat haydovchining, balki piyodaning ham masʼuliyati birdek muhim ekanligini unutmaylik!

Tuman hokimligining Axborot xizmati.