GULZOR MAHALLASIDA YaNGI “SHAHZODA WEDDING” GOʻZALLIK SALONI ISh BOShLADI

Mamlakatimizda yoshlar tadbirkorligini rivojlantirishga qaratilgan chora-tadbirlar tufayli turli yoʻnalishlar boʻyicha tashkil etilayotgan tadbirkorlik subʼektlari soni tobora oshib bormoqda. Natijada koʻplab yoshlar kasb-hunarga oʻqitilib, doimiy ish bilan bandligi taʼminlanmoqda. Amudaryo tumanida ham bu borada amalga oshirilayotgan ishlar eʼtiborga munosib. Buni soʻnggi ikki-uch yil ichida tuman markazi, hatto olis qishloqlar hududlarida faoliyat olib borayotgan maishiy xizmat koʻrsatish shoxobchalari, kundalik buyumlar va oziq-ovqat doʻkonlari, goʻzallik salonlari, bichish-tikish ustaxonalari misolida yaqqol koʻrish mumkin.

Joriy yilning 17-may sanasida Mangʻit shahrining Gulzor mahallasi hududining eng soʻlim goʻshalaridan biri, “Istiqbol” koʻchasida ham ana shunday tadbirkorlik subʼektlaridan biri oʻz faoliyatini boshladi. “SHAHZODA WEDDING” nomi bilan oʻz faoliyatini boshlagan yoshlar goʻzallik saloni tashkil etilishi bilan 3 nafar mahalla yoshlarining doimiy  ish bilan bandligi taʼminlandi.

Mazkur goʻzallik salonining ochilish marosimida mahalla aholini Amudaryo tumani hokimining birinchi oʻrinbosari Rashid Salayev va tuman hokimi oʻrinbosari, oila va xotin-qizlar boʻlimi raisi Goʻzal Saburovalar Gulzor mahallasi yoshlari uchun zamonaviy shart-sharoitlarga ega goʻzallik saloni tashkil etilgani bilan tabrikladilar va “SHAHZODA WEDDING” goʻzallik salonini tashkil etishda  fidoyilik koʻrsatgan yakka tadbirkor Muqaddas Qurolovaga chin dildan minnatdorchilik bildirdilar.

Darvoqe, yakka tadbirkor Muqaddas Qurolova bir necha yillardan  beri Mangʻit buyum bozorida koʻrpa-yostiq jildlari, sochiqlar savdosi bilan shugʻullanib keladi. U oila iqtisodidan kelib chiqib, voyaga yetgan farzandlarining ish bilan bandligini taʼminlash maqsadida oʻz mablagʻi hisobidan qurilgan binoni  goʻzallik saloni faoliyati uchun moslashtirib, taʼmirdan chiqardi. 100 million soʻmdan ziyod oʻz mablagʻi hisobiga goʻzallik saloni uchun zarur jihozlar, asbob-anjomlar sotib oldi. Shuningdek, 25 xildagi zamonaviy toʻy liboslari, pardoz-andoz vositalari, kelin salomlarida kiyiladigan 10 dan ortiq milliy liboslar toʻplamlari, milliylikka xos zamonaviy oqshom liboslari toʻplamlari bilan goʻzallik salonining oʻz faoliyatini toʻliq boshlashi uchun sharoit yaratdi. Natijada oʻzining farzandlari Sayyoraxon va Muqaddamxon Qoʻchqorovalardan tashqari 3 nafar mahalla qizlarining bandligini taʼminladi.

Yakka tadbirkor Muqaddas Qurolovaning rejalari katta. Kelgusida u imtiyozli kredit mablagʻi olib, goʻzallik saloni faoliyatini yanada kengaytirish niyatida. Ayni paytda ham mazkur goʻzallik salonida qoʻshimcha 4 ta ish oʻrni mavjud boʻlib, tajribal vizajist-stilist, makiyaj ustasi, ayollar sartaroshligi yoʻnalishlari boʻyicha ishchi-xodimlarni ish bilan taʼminlash imkoniyati bor.

Gulzor mahallasi, qolaversa, amudaryolik yoshlarning toʻyu-hashamlarda yanada goʻzal, madaniyatli kiyinishlari, sochlarini zamonaviy uslublarda, oʻzlariga yarashiqli, qolaversa, mijozlar talablari asosida turmaklashlari uchun eng yaqin maslahatgoʻy va koʻmakdosh boʻlishga hamisha shay boʻlgan “SHAHZODA WEDDING” goʻzallik salonining mohir xodimlarining ezgu ishlarida muvaffaqiyatlar tilaymiz.

Robiya YOʻLDOShEVA.