“Mahalla posbonlari” uchun seminar

Yakuniga yetayotgan haftada "Mahalla” xayriya jamoat fondi tuman boʻlinmasi tomonidan joylarda boʻlinma faoliyatiga taalluqli masalalar yuzasidan qator seminarlar tashkil qilindi.

Seminarlar Amudaryo Maishiy xizmat koʻrsatish kasb-xunar kolleji, 21-sonli musiqa maktabi, Chordara mahallasi binosi va Amudaryo Transport kasb-xunar kollejida tegishli hududlardagi "Mahalla posboni” jamoatchilik tuzilmasi rahbarlari, tuzilma aʼzolari, koʻcha boshchilari ishtirokida tashkil qilindi.

Seminarlarda "Oʻzbekiston Respublikasi Ichki ishlar vazirligining "2014-yilda mahallalarda ijtimoiy-maʼnaviy muhit barqarorligini taʼminlash, huquqbuzarlikning oldini olish borasida amalga oshirilgan ishlar xamda yoʻl qoʻyilgan kamchiliklar toʻgʻrisidagi maʼlumotnomasi” xususida”gi, "Fuqarolarning oʻzini oʻzi boshqarish organlari va militsiya tayanch punkti profilaktika inspektorlarining xududda ijtimoiy-maʼnaviya muhit barqarorligini taʼminlash xamda jamoatchilik nazoratini kuchaytirish boʻyicha amalga oshiriladigan vazifalari yuzasidan chora-tadbirlar rejasi xaqida”gi hamda Oʻzbekiston Respublikasining "Odam savdosiga qarshi kurashish toʻgʻrisida”gi Qonuni, Oʻzbekiston Respublikasi Prezidentining 2008-yil 8-iyuldagi "Odam savdosiga qarshi kurashish samaradorligini oshirish chora-tadbirlari toʻgʻrisida”gi qarori boʻyicha amalga oshirilishi lozim boʻlgan ishlar hamda diniy ekstremizmning oldini olish toʻgʻrisida”gi masalalar muhokama qilindi.

Taʼkidlash kerakki, istiqlol yillarida mahallaning tashkiliy-huquqiy asoslari mustahkamlanib, uning vakolatlari yanada kengaytirildi. Bugun oilalarda ijtimoiy-maʼnaviy muhitni sogʻlomlashtirish, aholi, ayniqsa, yoshlarning maʼnaviy dunyoqarashini yuksaltirish — dolzarb vazifa. Shu maʼnoda, oʻtgan davr mobaynida «Mahalla» xayriya jamoat fondi tomonidan mahallalarda ijtimoiy-maʼnaviy muhitni barqarorlashtirish boʻyicha fuqarolar yigʻinlariga koʻmaklashish maqsadida bir qator ishlar amalga oshirildi. Bugungi kunda mahallalarda ijtimoiy-maʼnaviy muhitni yaratish va sogʻlomlashtirish, maʼnaviy muhit barqarorligini taʼminlash, qadriyatlarimizni targʻib qilish orqali oilani mustahkamlash, barkamol avlodni voyaga yetkazish, yordamga muhtoj oilalarni ijtimoiy qoʻllab-quvvatlash borasidagi tegishli tashkilotlar hamkorligida amalga oshirilayotgan chora tadbirlar koʻlami kengayib bormoqda.

Seminarda shuningdek noqonuniy yoʻllar bilan xorijga ishlash uchun ketayotgan fuqarolarga yurtimizda yaratilgan qulay ishbilarmonlik muhiti, tadbirkorlik faoliyati bilan shugʻullanish istagidagi fuqarolar uchun mavjud imtiyozlar haqida atroflicha maʼlumotlar berish zarurligi aytib oʻtildi.

Seminar yakunida hududlarda ijtimoiy-maʼnaviy muhit barqarorligini taʼminlash borasida davlat va jamoat tashkilotlari, xususan, fuqarolar yigʻinlari bilan profilaktika nozirlari hamkorligini yanada mustahkamlash, bu boradagi ishlar samaradorligini oshirishda jamoatchilik nazoratini kuchaytirish boʻyicha aniq takliflar oʻrtaga tashlanib, chora-tadbirlar belgilab olindi.

(Foto - http://smolensk.myatom.ru)