Amudaryo tumanida gʻalla oʻrim-yigʻimiga kirishildi

9-iyun kuni Amudaryo tumanidagi “Yusuf xoʻja” fermer xoʻjaligida joriy yilgi gʻalla oʻrim-yigʻimi boshlanishi munosabati bilan koʻrgazmali seminar oʻtkazildi. Seminarda tuman hokimi Sultonboy Yoʻldashev, sektorlar rahbarlari, Oʻzbekiston Respublikasi Qishloq xoʻjaligi vazirligi huzuridagi Agrosanoat majmui ustidan nazorat qilish inspektsiyasining Qoraqalpogʻiston Respublikasi Boshqarmasi boshligʻi Maxset Shanxiyev, qishloq xoʻjaligi boʻyicha tumanga biriktirlgan vakil Ikrom Yoʻldashev, qishloq xoʻjaligi boʻlimi masʼullari, fermer hamda mexanizatorlar qatnashdilar.

Seminar avvalida yoshi ulugʻ otaxonlar gʻalla maydonlarida yetishtirilgan bugʻdoy hosili bu yil har yildagidanda moʻl boʻlishini, yurtimizda toʻkin-sochinlik hukm surib, dasturxonlarimizda noz-u neʼmatlar bisyor boʻlishini tilab duo qildilar va dehqonlarga gʻalla oʻrim-yigʻimi mavsumidagi mashaqqatli, shu bilan birga sharafli ishlarida kuch-quvvat tiladilar.

Seminar ishtirokchilariga 12-iyun kunidan 1-iyulga qadar davom etadigan gʻalla oʻrim-yigʻimi ishlarini sifatli tarzda amalga oshirish boʻyicha chora-tadbirlar dasturi boʻyicha batafsil maʼlumotlar berildi.

Taʼkidlanganidek, 2023-yilgi gʻalla hosili uchun tumandagi 361 ta fermer xoʻjaliklarining jami 7000 gektar yer maydoniga gʻalla urugʻlari ekilgan edi. “Qipchoq gʻalla klasteri” masʼuliyati cheklangan jamiyati 5861 gektar, “Amu Rich Harvest” masʼuliyati cheklangan jamiyati 1139 gektar ekin maydonlarida yetishtirilgan gʻalla hosilini xarid qilish boʻyicha fermer xoʻjaliklari bilan shartnoma imzolashgan. Tuman boʻyicha joriy yilgi mavsumda gʻalla klasterlarining qabul maskanlariga qabul qilinadigan jami don miqdori 16 ming 460 tonnani tashkil etadi. Yetishtirilgan hosilning 1450 tonnasi urugʻlik don uchun, 8000 tonnasi esa isteʼmol uchundir. Undan tashqari, joriy yilgi hosildan 7010 tonna don mahsuloti birja savdolari uchun vaqtincha saqlashga yoʻnaltiriladi.

Joriy yilgi gʻalla oʻrim-yigʻim mavsumini uyushqoqlik bilan oʻtkazish, gʻallani oʻrishga tayyorlashdan tortib, uni qabul maskanlariga eltishgacha boʻlgan jarayondagi ishlarni tizimli ravishda tashkil qilish maqsadida shtab tashkil qilinib, 24 ta oʻrim otryadlari tuzilgan va ularga 24 ta kombaynlar biriktirilgan.

Kombaynlar bilan bir qatorda mavsumda don tashishga moʻljallangan hamda xizmat koʻrsatadigan texnikalar ham jalb qilinib, ularning ham mavsum davomida toʻliq ishchi holatida boʻlishini taʼminlash choralari koʻrildi. Kombaynlarga biriktirilgan 48 nafar operatorlar uchun esa barcha zaruriy shart-sharoitlar yaratib berilgan.

Undan tashqari, gʻalla oʻrim-yigʻimini betalofat va xavfsizlik qoidalariga rioya qilgan holda oʻtkazish maqsadida tuman Ichki ishlar boʻlimi, Favqulodda vaziyatlar boʻlimi, Milliy gvardiya tuman boʻlimining jami 52 nafar xodimlari jalb qilingan.

Seminar yakunida gʻalla maydonlarida oʻrim-yigʻim oldidan yongʻin xavfsizligi qoidalariga rioya etish, gʻallaning isrof boʻlib oʻrilishiga yoʻl qoʻymaslik, oʻrilgan gʻalla maydonlaridagi somonlarni yoqmaslik borasida fermer xoʻjaliklarining mutasaddi xodimlariga, gʻallakor va mexanizatorlarga tushuntirishlar berib oʻtildi.

Tuman hokimligining Axborot xizmati.