YoShLAR YeTAKChISINING ISh FAOLIYaTI SAMARALI BOʻLAYaPTI

Prezidentimizning “Mahallalarda yoshlar bilan ishlash tizimini tubdan takomillashtirish chora tadbirlari toʻgʻrisida”gi qaroriga asosan respublikamizning barcha ovul, shaharcha, mahallalarida oʻz faoliyatini boshlagan yoshlar yetakchilari yoshlar bilan ishlashning yangicha boshqaruv mexanizimlarini joriy etib,yoshlar bilan ishlashning vertikal tizimini yaratishda, yoshlar muammolarini bevosita mahallalarda hal etishda, taʼlim muassasalarida maʼnaviy-maʼrifiy va tarbiyaviy ishlarning samaradorligini yanada oshirishda eʼtiborga sazovor ishlarni amalga oshirishmoqda.

Dilmurod Yodgorovning tumanimizning markazida joylashgan Doʻstlik mahallasi yoshlar yetakchisi lavozimiga qoʻyilgan talablar asosida saralashdan oʻtib, faoliyatini boshlaganiga hozir bir yarim yildan oshdi. U oʻz ishini mahalla fuqarolar yigʻini masʼullari ishtirokida xonadonma-xonadon yurib, yoshlarni xatlovdan oʻtkazdi. Oilalarni ijtimoiy-iqtisodiy ahvoliga koʻra toifalarga ajratib, yoshlar balansini shakllantirdi va elektron platformasiga kiritib chiqdi.

Xatlov davomida aniqlangan muammosi bor ishsiz yoshlarni «Yoshlar daftari»ga kiritdi. Hozirgi kungacha 30 nafardan ortiq ish bilan band boʻlmagan yoshlarga yordam koʻrsatildi. Jumladan 9 nafar turli oliygohlarda taʼlim olayotgan yoshlarga toʻlov kontrakt pullari toʻlab berildi, 6 nafar yoshga 10-yilga e-auksion tizimi orqali dexqon xoʻjaligini yuritish uchun yer olib berildi. 7 nafar nogironligi boʻlgan yoshlarga bir martalik moddiy yordam pullari ajratildi. 4 nafar yoshlarga esa haydovchilik guvohnomasi olishda, 5 nafar yoshga oʻz tadbirkorligini boshlash uchun imtiyozli kreditlar olishda amaliy yordam koʻrsatildi. Shuningdek, 1 nafar yoshga safarbarlik chaqiruvi rezervi xizmatini oʻtash badali pullari qoplab berildi.

Respublikamizda oʻtkazilayotgan “Besh tashabbus olimpiadasi” musobaqalari mahallalarda yashaydigan yoshlarning boʻsh vaqtlarini koʻngilli oʻtkazishlariga xizmat qilibgina qolmay, sport, sanʼat, milliy hunarlar, kitobxonlik, axborot texnologiyalari sohalarida isteʼdodlilarini aniqlab, ularning oʻz iqtidorini namoyish etishlari uchun ham muhim vosita boʻlib xizmat qilmoqda. Dilmurod Yodgorovning saʼy-harakatlari tufayli “Doʻstlik” mahallasi yoshlari ham ushbu musobaqalarda faol ishtirok etib, salmoqli yutuqlarni qoʻlga kiritib kelishayapti.

Musobaqaning oʻtgan yilgi mavsumida Azizbek Xolmirzayev cholgʻu ijrochiligi boʻyicha Oʻzbekiston Respublikasi bosqichida ishtirok etib, faxrli 3-oʻrinni qoʻlga kiritib keldi. Mahallaning shaxmatsevar yoshlari oʻtkazilgan 3 ta mavsum shaxmat musobaqalarida ham faxrli oʻrinlarni egallab kelmoqda. Oʻtgan yilgi mavsumda Alisher Rahimov shaxmat boʻyicha Qoraqolpogʻiston Respublikasi bosqichida faxrli 2-oʻrinni qoʻlga kiritdi. Bu yil esa yana tuman bosqichida birinchi oʻrinni egallab, Qoraqolpogʻiston Respublikasi bosqichiga yoʻllanma oldi.

Boshqa yoʻnalishlarda ham quvonarli yutuqlar qoʻlga kiritilayapti. Xususan, yaqinda boʻlib oʻtgan “Zukko kitobxon” tanlovida mahalla yoshlari jamoasi Qoraqolpogʻiston Respublikasi bosqichida faxrli 2-oʻrinni qoʻlga kiritib qaytishdi.

Aslida mahalla yoshlari yetakchisining asosiy maqsadi ham ijtimoiy himoyaga muhtoj yoshlarni qoʻllab-quvvatlash, bandligini taʼminlashga koʻmaklashish, ularning isteʼdod va iqtidorini kashf etib, yuzaga chiqarishdir.

 Joriy yil mahalla yoshlari hayotida yana bir quvoonchli voqea boʻldi: Doʻstlik koʻchasiga qiymati 300 million soʻmlik universal sport maydonchasi qurildi. Bu yoshlarning boʻsh vaqtlarini yanada mazmunli tashkil etish, sportning ommaviyligini taʼminlash uchun qulay imkoniyat boʻldi.

Mahalla yoshlari yetakchisi oʻsmir-yoshlarni har xil buzgʻunchi gʻoyalar taʼsiridan asrash, mentalitetimizga yot odatlarga ruju qoʻyishining oldini olish, ularga ajdodlarimizdan meros boʻlib kelayotgan qadriyatlarimizni singdirishga ham alohida eʼtibor qaratadi. Bular oʻz navbatida mahalla tinch-osoyishtaligiga, yoshlarning munosib xulq-atvorli boʻlib voyaga yetishiga munosib hissa boʻlib qoʻshilayapti.

 Oygul Rajabova.