PREZIDENTLIKKA NOMZODNING IShONChLI VAKILI AMUDARYoLIK SAYLOVChILAR BILAN UChRAShDI

Butun mamlakatimizda boʻlgani kabi Amudaryo tumanida ham 9-iyul kuni boʻlib oʻtadigan Oʻzbekiston Respublikasi Prezidenti sayloviga tayyorgarlik qizgʻin tus olmoqda. Joylarda Prezidentlikka nomzodlarning, ularning ishonchli vakillarining saylovchilar bilan uchrashuvlari oʻtkazilmoqda. 19-iyun kuni Amudaryo tumani Madaniyat markazida Tadbirkorlar va ishbilarmonlar harakati – O’zLiDeP partiyasidan Oʻzbekiston Respublikasi Prezidentligiga nomzod Shavkat Mirziyoyevning Qoraqalpogʻiston Respublikasidagi ishonchli vakili Bayrambay Otemuratovning saylovchilar bilan uchrashuvi boʻlib oʻtdi. Unda hudud faollari, tuman Kengashi deputatlari, faol xotin-qizlar va elektorat vakillari, keng jamoatchilik vakillari hamda OAV xodimlari ishtirok etdi.

Uchrashuvda ishonchli vakil saylovchilarga nomzodning saylovoldi dasturi, undan oʻrin olgan beshta ustuvor maqsadni qamrab olgan asosiy yoʻnalishlar haqida batafsil maʼlumot berib oʻtdi.

Taʼkidlanishicha, dasturdagi birinchi maqsad har bir insonga oʻz salohiyatini roʻyobga chiqarish uchun munosib sharoit yaratishga qaratilgan chora-tadbirlarni oʻz ichiga oladi.

Maʼlumki, Yangi Oʻzbekiston ijtimoiy davlat, deb eʼlon qilindi. Xususan, yangilangan Konstitutsiyamizda davlatning ijtimoiy majburiyatlari 3 barobar koʻpaytirildi. Konstitutsiyaviy qoida va talablardan kelib chiqib, adolatli ijtimoiy siyosatni yuritish – Yangi Oʻzbekistonni barpo etishning asosiy omillaridan biri etib belgilangan. Binobarin, birinchi maqsaddagi vazifalar taʼlim, tibbiyot va aholi farovonligini taʼminlash boʻyicha davlat oʻz majburiyatlarini bajarishi yoʻnalishidagi islohotlarning yangi bosqichga olib chiqilishiga xizmat qiladi.

Odamlarni hayotdan rozi qilish uchun barqaror iqtisodiy oʻsishni taʼminlash dasturda ikkinchi maqsad sifatida belgilangan. 2030-yilga borib aholi jon boshiga toʻgʻri keladigan yalpi ichki mahsulot hajmini hozirgi 2 ming 200 dollardan 4 ming dollarga oshirish, Oʻzbekistonning “daromadi oʻrtachadan yuqori boʻlgan davlatlar” qatoriga kirishiga imkon beruvchi barcha ishlar atroflicha bayon qilingan.

Saylovoldi uchrashuvida Yangi Oʻzbekistonni barpo etishda ana shu besh maqsad – besh ustunga zarurat borligi, ular oʻz-oʻzidan yoki shunchaki tanlanmagani, ularni taʼminlash bilan koʻzlangan maqsadga erishish mumkinligi hamda bu nafaqat kelgusi yetti yilda bosh vazifa boʻlishi, yaqin kelajakda ham hal qiluvchi oʻrin tutishi taʼkidlandi. Ayniqsa, biznesni qoʻllab-quvvatlash, tadbirkorlarga erkin faoliyat yuritishi uchun eng qulay sharoitlar yaratish ishlari yanada davom ettirilishi, har bir soha egalariga qator qulaylik va imkoniyatlar yaratish vazifasi belgilanayotgani ahamiyatli. Soliq tizimini soddalashtirish va barcha tadbirkorlar uchun teng imkoniyatlar yaratish, kelgusi yillarda biznes uchun qoʻshilgan qiymat, foyda, aylanmadan olinadigan va mol-mulk soligʻi boʻyicha stavkalar oshirilmasligi qatʼiy kafolatlanishi shular jumlasidandir.

“Ishonch bilan aytish mumkinki, Shavkat Mirziyoyevning saylovoldi dasturida belgilangan erkin va farovon, qudratli davlatni qurishda beshta strategik yoʻnalish yaqin kelajakdagi faoliyatimizda hal qiluvchi oʻrin tutadi va koʻpmillatli xalqimizning orzu-niyatlarini roʻyobga chiqarishga xizmat qiladi”, dedi nomzodning ishonchli vakili.

Uchrashuvda partiya faollari, jamoatchilik vakillari soʻzga chiqib, amalga oshirilishi belgilanayotgan bu yoʻnalishlardagi ulugʻvor vazifalarga yuqori baho berdilar va ishonchli vakil Bayrambay Otamurodovning taklifini qoʻllab-quvvatlab, 9-iyul kuni barchani xalqimiz farovonligi yoʻlida tinmay izlanayotgan, Yangi Oʻzbekistonni barpo etishga oʻz hayotini bagʻishlagan fidoyi inson, yurtimizda uchinchi Uygʻonish davrini boshlab bergan davlat arbobi Shavkat Mirziyoyev uchun ovoz berishga chaqirdilar.

Oygul RAJABOVA.