Yurtning obod manzillari: BOʻZSOLMA MAHALLASIDA BIR KUN

Xalqimiz hayotiga kirib kelayotgan oʻzgarishlar, chor atrofimizdagi yangilanishlar eng chekka hududlardagi qishloq va mahallalar qiyofasini ham tubdan oʻzgartirib yubordi. Boisi, mustaqillik xalqimiz uchun ijodiy izlanishlar imkoniyatini berdi. Dehqon dalasini, bogʻbon bogʻ-rogʻini, tadbirkor uzoq yillar koʻngliga tugib qoʻygan orzusini oʻzi istagan yoʻsinda rivojlantirish, berilib ishlash orqali daromad topib, turmush tarzini zamonga mutanosib ravishda oʻzgartirdi. Albatta, yaxshi tomonga! Endi dehqon dalamni haydab bering, deb oʻzgaga yalinib yurmaydi, oʻzining ixchamgina motokultivatori bor. yetishtirgan mahsuloti toza va sifatli boʻlganidan doimo xaridorgir. Ayniqsa, “daladan – doʻkonga – bozor rastasiga” tamoyiliga koʻra, shundoq dalaning oʻzidan sotilib, daromadi qoʻlga kirib turganidan tomorqachi dehqonlar uchun bu borada muammo yoʻq. Tadbirkorlarning esa oʻz koʻnglidagiday ish yuritishlari uchun barcha huquqiy asoslar yaratilgan. Buni biz goʻzal va hamisha navqiron Qilichboy zaminining eng chekka hududlaridan biri – Boʻzsolma mahalla fuqarolar yigʻinida boʻlganimizda yaqqol his etdik.

Boʻzsolma mahallasida 684ta xonadon tarkibiga birikkan 1007ta oilada 3784 nafar aholi istiqomat qiladi. Qoraqalpoq, oʻzbek, qozoq, qirgʻiz, turkman, rus va boshqa millatlar ahil-inoq yashayotgan bu goʻzal makonda har kuni bir oʻzgarish, koʻchalar ravon, xonadonlar obod, fayzli. Chunki boʻzsolmaliklar qachon, qanday mehnat qilishni juda yaxshi bilishadi. Aholining asosiy qismi shaxsiy tomorqa xoʻjaligida mehnat qilib, tomorqani moʻl-qoʻl daromad manbaiga aylantirishgan. 627ta xonadonning oʻz tomorqa xoʻjaligi mavjud. Deyarli har bir xonadonning oʻz chorvasi, parrandasi boʻlib, 25ta xonadon esa zamonaviy issiqxona xoʻjaligiga ega. 164 nafar kishi korxona va tashkilotlarda turli mehnat faoliyati bilan band. 21 nafar fuqaro esa tadbirkorlikning savdo-sotiq, milliy hunarmandchilik, chorvachilik, parrandachilik va asalarichilik yoʻnalishlari bilan shugʻullanishadi. 28 nafar fuqaro yakka tadbirkorlik, oilaviy tadbirkorlik va boshqa sohalarda faoliyat olib borishadi.

Hudud aholisining farzandlari uchun 1ta umumtaʼlim maktabi, 1ta maktabgacha taʼlim tashkiloti, maktab hududida stadion mavjud boʻlib, oʻsib kelayotgan yosh avlodning ham aqlan, ham jismonan yetuk insonlar boʻlib voyaga yetishlari uchun zarur shart-sharoitlar yaratilgan. Shuningdek, mahalla ofisida xalq kutubxonasi tashkil etilib, kitob javonlaridan mumtoz va zamonaviy oʻzbek adabiyoti namoyondalarining durdona asarlari, jahon va qardosh xalqlar yozuvchilarining kitoblari joy olgan.

Mahalla fuqarolar yigʻinining 15 kishidan iborat yigʻin Kengashi aʼzolari va MFY komissiyalari hamda jamoatchilik tuzilmalari aʼzolarining oʻzaro hamkorlikdagi faoliyati bois, oilaviy qadriyatlarni mustahkamlash, xotin-qizlar hayotiga doir muammolarni tizimli hal etish, aholini ijtimoiy qoʻllab-quvvatlash boʻyicha jamoatchilik nazoratini amalga oshirish, ekologiya va atrof-muhitni muhofaza qilish, obodonlashtirish va koʻkalamzorlashtirish ishlarini yil davomida bajarish, “Keksalar maslahati”, “Ota-onalar Universiteti” jamoatchilik tuzilmalarining har bir oilada, har bir fuqaro hayotidagi muammolarni hal etish va zarur shart-sharoitlar yaratish imkoni doimo yuqori.

Xususan, mahallada ijtimoiy muammolarni oʻz vaqtida aniqlash va ularni joyiga chiqqan holda hal qilish masalasini kompleks tashkil etish, ayniqsa, ijtimoiy himoyaga muhtoj aholini xonadonbay yondashuv tizimini joriy qilgan holda ularga koʻrsatilayotgan xizmatlar sifatini oshirish, yoshlarni, xotin-qizlarni kasbga oʻqitish, tadbirkorlik sohasiga jalb qilish maqsadida 2023-yilning 5-yanvaridan boshlab hududdagi barcha xonadonlar xatlovdan oʻtkazildi. Xatlov jarayonida 101ta oilada ijtimoiy muammolar mavjudligi aniqlandi va 101 nafar ayol-qiz “Ayollar daftari”ga kiritildi. 10ta oilada oʻzaro kelishmovchiliklar borligi maʼlum boʻldi va yigʻin oqsoqoli, hokim yordamchisi, xotin-qizlar faoli hamda yoshlar yetakchisining faol aralashuvi bilan bu oilalar yarashtirilib, ijtimoiy-maʼnaviy sogʻlom hayotga qaytishdi.

Yigʻin masʼullarining xonadonbay oʻrganishlari natijasida 36 nafar ayol-qizlarning bandligi taʼminlandi. 12 nafar ijtimoiy himoyaga muhtoj ayol-qizlarga moddiy yordam koʻrsatilib, 5 nafar ayol-qizlar kasb-hunarga bepul oʻqitildi.

Oilada ayol tinch va xotirjam boʻlsa, jamiyat tinch boʻladi, ishdagi unum sifat jihatidan oʻsadi. “Ayollar daftari”ning 1-toifasi roʻyxatiga kiritilgan 36 nafar ayol-qizlardan 1 nafariga subsidiya asosida issiqxona qurib berilishida koʻmaklashildi. 29 nafar ayol-qizlar esa hududdagi fermer xoʻjaliklariga ishga joylashtirilib, 1 nafari jamoat ishlariga jalb qilindi.

Daftarning ikkinchi toifasiga kiritilgan, tadbirkorlik faoliyati bilan shugʻullanish istagida boʻlgan 17 nafar ayol-qizlardan 1 nafariga chorvachilik bilan shugʻullanish uchun 33 mln. soʻmlik imtiyozli kredit mablagʻi olishida yaqindan yordam berildi. Yana 2 nafar ayol-qizga qishloq xoʻjalik texnika va asbob-uskunalari olishi uchun 33 mln. 16 nafariga 5 mln soʻmdan imtiyozli kredit mablagʻlari olishda koʻmaklashildi.

“Ayollar daftari”ning uchinchi, toʻrtinchi va beshinchi toifalari boʻyicha roʻyxatga olingan boquvchisi boʻlmagan xotin-qizlar, ijtimoiy yordamga muhtoj, 1 va 2 guruh nogironligi boʻlgan, shuningdek, tezkor tibbiy muolajaga muhtoj ayol-qizlar, qaramogʻida nogironligi boʻlgan farzandlari bor ehtiyojmand ayol-qizlar holidan tez-tez xabar olinib, zarur yordamlar koʻrsatilmoqda.

MFY raisi, hokim yordamchisi, xotin-qizlar faoli va yoshlar yetakchisining hamkorlikdagi saʼy-harakatlari tufayli aholi hayotiga doir muammolar tizimli hal etilayotganidan boʻzsolmaliklar mamnun.

Hokim yordamchisi Behzod Tursunboyevga “Goʻzallik saloni” ochish niyatida ekanligini bildirgan Iroda Oʻrozmetovaning murojaati MFY Kengashida atroflicha oʻrganilib, uning tadbirkorlik faoliyatini yoʻlga qoʻyishida amaliy yordam beriladigan boʻldi. Umidjon Sidanov esa Mahalla masʼullaridan mamnunligini yashirmaydi. Chunki MFY raisi Bahodir Matyoqubov va Behzod Tursunboyevning begʻaraz yordami tufayli u akfa eshik va deraza romlarini ishlab chiqarish tsexini tashkil etib, oilasi doimiy daromad manbaiga ega boʻldi. Hamqishloqlari bunday qurilish ashyolari uchun tuman markaziga qatnab yurmaydigan boʻlishdi. MFY masʼullarining yoʻl-yoʻriq va koʻrsatmalari bilan Shohistaxon Haydarova subsidiya asosida tikuv mashinasi olib, oʻz xonadoni qoshida tikuvchilik tsexi faoliyatini yoʻlga qoʻydi.

Hali maktab oʻquvchisi boʻlgan hunarmand qiz Sevinchoy Xolboyeva esa kandakorlik bilan shugʻullanish oqrali oilasiga, ota-onasiga yaqin koʻmakdosh. Sevinchoyni oʻz hunari orqali nafaqat boʻzsolmaliklar, balki Amudaryo tumanida, hatto Qoraqalpogʻiston miqyosida koʻpchilik yaxshi tanishadi.

Mahallada 10 yoshga 1 nuroniy tamoyili asosida amalga oshirilayotgan chora-tadbirlar tufayli yoshlarni kasb-hunarga yoʻnaltirish, ularning boʻsh vaqtlarini mazmunli oʻtkazishlarini taʼminlash borasida quvonarli ishlar amalga oshirilmoqda. Bu borada faxriy ustoz Salomatxon aya Madaminova yoshlarga chinakam gʻamxoʻr, maslahatgoʻy. Onaxonning hokim yordamchisi va yoshlar yetakchisi bilan hamkorlikdagi saʼy-harakatlari tufayli Sardorbek Oʻrozboyev oʻz hayotini yaxshi va nurli tomonga oʻzgartiraoldi. Bilib-biomay xato qilib qoʻygan, probatsiya tarkibida hisobda turuvchi Sardorbek Oʻrozboyev yaqinda payvandlash asbob-uskunasi bilan taʼminlandi va u sogʻlom hayotga qaytdi. Ayni paytda Sardorbek hamqishloqlarining payvandlash ishlari boʻyicha buyurtmalarini aʼlo darajada bajarib, olqishlarini olmoqda.

Mahmudjon Shomurodov sartaroshxona, yana bir tadbirkor Umidjon Otamurodov esa oziq-ovqat, avto ehtiyot qismlari, qurilish mollari bilan savdo qiluvchi aralash mollar doʻkon va sholi, un xorazlari faoliyatlarini yoʻlga qoʻygan.

Mahalla masʼullari uchun har bir kun qizgʻin ish vaqti. MFY raisi Bahodir Matyoqubov, hokim yordamchisi Behzod Tursunboyev, profilaktika inspektori Adhamjon Yoʻldoshev. Mahalla xotin-qizlar faoli Nargiza Yusupova, yoshlar yetakchisi Farruh Madrahimov, yoshlarning sevimli maslahatgoʻyi Salomatxon aya Madaminovalar deyarli kunora uchrashib, goh aholi xonadonlarida, goh hududdagi oilaviy shifoxonada, goh MFY ofisida xalq hayotiga doir muammolarni hal etish yuzasidan oʻzaro maslahatlashib olishadi. Xonadonbay yurib, aholining quvonch va tashvishlariga sherik boʻlishadi, aholining taklif va murojaatlarini oʻrganishadi. Mahalla xotin-qizlar faoli Nargiza Yusupova uchun esa mahallaning u boshi bilan bu boshiga borib kelish aslo muammo tugʻdirmaydi. Velosipedini minib yoʻlga chiqqan Nargiza tushlikkacha rejalashtirgan ishlarini qoyilmaqom qilib uddalaydi. Shu bois, mahalla ayol-qizlari Nargizaxondan mamnun.

Yoshlar yetakchisi Farruh Madrahimovning saʼy-harakatlari bilan Besh tashabbus olimpiadasi doirasidagi tadbirlarga mahallaning 90 foiz, yaʼni 700 nafardan ziyod yoshlari qamrab olindi. Mahalla, sektor va tuman bosqichlarida sportning stol tennisi boʻyicha musobaqalarda gʻolib chiqqan 1 nafar boʻzsolmalik sportchi musobaqaning Respublika bosqichida ham faxrli 1-oʻrinni egalladi. Shuningdek, boʻz solmalik yoshlar voleybol, stritbol, futbol sporti musobaqalarida ham doimiy ravishda 1-, 2-, 3-oʻrinlarni egallab kelishmoqda. Yoshlar yetakchisining saʼy-harakatlari bilan yoshlarning oʻqishi va safarbarlik chaqiruvi uchun shartnoma toʻlovlari Yoshlar ishlari agentligi tuman boʻlimi hisobidan toʻlab berilib, ularga ijtimoiy koʻmaklashildi. Umuman olganda, Boʻzsolma Mahalla fuqarolar yigʻini aholisi uchun oʻtayotgan har bir kundan maʼno-mazmunlar topib yashash, oʻzlari uchun qadrdon goʻsha – kindik qoni tomgan muqaddas tuproq – Boʻzsolma mahallasi hududini yanada obod va farovon makonga aylantirish eng oliy maqsad. Ana shu ezgu maqsadni amalga oshirish yoʻlidagi rejalar, qilinayotgan ishlar esa havasga, eʼtiborga munosib. Oʻnga yaqin millatlar xuddi bir ota-ona, yagona oila farzandlaridek ahil, totuv hayot kechirayotgan bu makonda insonning baxtli yashashi uchun hamma narsa – tinchlik, totuvlik, bagʻrikenglik, bundan ham muhimi, oʻzaro mehr-oqibat bor. Birining bolasiga biri bagʻrini ochib mehr berguvchi mehnatkash, fidoyi, ogʻzibir, orzu-intilishlari bir boʻlgan Boʻzsolma mahallasida bir kun boʻlib, dilda havaslar tuydik. Zero, biz bu makonda elim, yurtim, oilam, ota makonim, degan buyuk tuygʻular ila yashab, mehnat qilayotgan aziz insonlarni kashf etdik. Ana shu tuygʻular Vatanni yuksaltiradi va koʻngillarni oʻstiradi. Bor boʻlsin, elim degan elning fidoyi farzandlari!

Robiya YOʻLDOShEVA, Ravshan Bahromov, Mahmudjon Shomurodov.