DOʻRMANDA MILLIY QADRIYaTLARIMIZ TARGʻIB ETILGAN TADBIR BOʻLIB OʻTDI

Yurtimizda istiqlol yillarida xotin-qizlarning jamiyat hayotidagi mavqeini yuksaltirish, ularning ijtimoiy-siyosiy islohotlardagi ishtirokini kengaytirish, oila, onalik va bolalikni muhofaza qilish ustuvor vazifaga aylandi. Bu borada mustahkam huquqiy asoslar yaratilib, amaliyotga joriy etildi. Ayniqsa jamiyat va davlatni boshqarishda xotin-qizlar ishtirokini kengaytirishga eʼtibor kuchaydi.

Bugungi kunda joylarda mavjud muammolarni bartaraf etishda, oilalar mustahkamligini taʼminlashda, komil farzandlarni voyaga yetkazishda, ularning oʻz salohiyati, qobiliyatini jamiyatimiz ravnaqi yoʻlida safarbar etishida yurtimiz ayollarining munosib hissasi bor. Har jabhada oʻrni bor ayollar yurtimizda milliy urf-odatlarimiz, qadriyatlarimiz, anʼanalarimizni koʻz qorachigʻiday asrab-avaylab, kelgusi avlodlarga yetkazishda mustahkam rishta boʻlib xizmat qiladi.

Maʼlumki xalqimizning asriy anʼanalaridan biri – hunar oʻrganish, mehnatsevarlikdir. Oʻz hunari orqali halol rizq topish, oʻz turmushini oʻzi fayzli, obod va farovon etishga intilish – yurtimiz ayollariga xosdir.

Shuningdek, ular quvnoq, mehmondoʻst va ochiq koʻngil, tarixiy ildizlariga sadoqatli. Shu boisdan ham qutlugʻ kunlarni, bayram sayillarni milliy qoʻshiqlar, raqslar ijro etib, aytishuvlarda bellashib, zavqli oʻtkazadilar. Borini dasturxonga toʻkib, mehmondoʻstligini, pazandaligini, odobini namoyish etishni xush koʻradilar.

26-avgust kuni tumanimizning Doʻrman ovuli xotin-qizlari uchun “Ayol baxtli boʻlsa, oila baxtli boʻladi, oila baxtli boʻlsa, jamiyat baxtli boʻladi” degan gʻoyani oʻzida ifoda etgan, mustaqilligimizning 32 yilligi munosabati bilan milliy urf-odatlarimiz qadriyatlarimizni targʻib etuvchi tadbir oʻtkazildi.

Tadbirda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimboychiyeva, Farovon mahallasi hokim yordamchisi Muqaddas Beknazarova, ovul xotin-qizlar faoli, koʻchaboshchi ayollari, nuroniy onaxonlar, shuningdek, hududdagi ovul-mahallalarning xotin-qizlar faollari, koʻchaboshchi ayollari ishtirok etdilar.

Tadbir hudud ayollari qoʻl mehnati mahsuli boʻlgan tikuvchilik, toʻqimachilik mahsulotlari, hunarmandchilik mahsulotlari koʻrgazmasi bilan boshlandi. Ishtirokchilar doʻrmanlik ayollar oddiy qogʻozdan, yelim idishlardan yasagan gullar, naqshli shakllarni, toʻquvchilik, tikuvchilik namunalarini koʻrib hayratga tushdilar.

Urf-odatlarimizga koʻra mehmonlarni milliy kiyimlardagi qizlar, kelinlar tavoze bilan, non-tuz tutib kutib oldilar.

Shoʻx musiqa sadolari ostida mehmonlar oʻz oʻrinlarini egalladilar va doʻrmanlik mohir onaxonlar ijrosida xalqimizning qadimiy qoʻshiqlarini, aytishuvlarini, alla-laparlarini tinglab, maroqli hordiq chiqardilar.

Ayniqsa yor-yor, kelin salomlari ijrosi barchaga manzur boʻldi.

Doʻrman ovulining eng soʻlim goʻshasi - baland archalar, manzarali daraxtlar sos solib turgan 83-sonli maktab oldida tashkillashtirilgan milliy urf-odat, anʼana va qadriyatlarimizni targʻib etishga bagʻishlangan tadbir hudud ayollari hayotida oʻchmas xotiralar qoldirdi. Milliy qadriyatlar xalqimizning bebaho boyligi ekanligini qalblariga teran joyladi.

Oygul RAJABOVA.