KEKSALAR – JAMIYaT KOʻRKI

Inson – hayot gultoji. U oʻzining orzu-intilishlari, ezgu amallari bilan hamisha hayot gulbogʻining koʻrki boʻlib kelgan. Chunki kishilik jamiyatidagi barcha ijobiy oʻzgarishlar, yangilanish va taraqqiyot faqat va faqat inson zakosi, fidoyi mehnatining mahsulidir. Hayotda oʻzidan yaxshi iz, yaxshi nom qoldirib yashash esa har bir inson dilidagi eng ezgu maqsad.

Men har gal keksa avlod vakillari bilan uchrashganimda, muloqotda boʻlganimda ularning nafaqat bosib oʻtgan umr yoʻllari, balki har bir soʻzi bugungi yoshlarimiz uchun eng ibratli maktab ekanligini his etaman. Chehralarida nuroniylik balqib turgan keksa onaxon va otaxonlarimiz – jamiyatimizdagi bugungi mislsiz taraqqiyotga juda katta hissa qoʻshgan, xalq farovonligi, baxt-saodati yoʻlida kuch-qudratini safarbar etgan fidoyilar aynan ulardir. Shuning uchun ham muhtaram Prezidentimiz nuroniy insonlarga hurmat va eʼtiborning yana bir ramzi sifatida 2015-yilga "Keksalarni eʼzozlash yili” deb nom berdilar. Shu barobarida Yurtboshimiz: "Barchamizni oq yuvib, oq taragan, ona yurtimizning ogʻir yukini, uning quvonch va tashvishini umr boʻyi yelkasida koʻtarib kelgan moʻʼtabar bobolarimiz va momolarimizni, ota-onalarimizni rozi qilish, ularning duosini olish – dunyodagi eng ulugʻ, eng savobli ish”, ekanligini taʼkidladilar, yilga monand Davlat dasturi qabul qilish, bugungi kunda keksa avlod vakillari hayotiga daxldor boʻlgan muammolarni hal etish masalalari "Keksalarni eʼzozlash yili” Davlat dasturi ijrosida oʻz amaliy isbotini topishi zarurligiga alohida toʻxtalib oʻtdilar.

Darvoqe, qariyalarimiz nafaqat xonadonlarimizning, balki hayotimizning farishtalari, gultoji, jamiyatimiz koʻrki. Ularning yaxshi dam olishlari, tibbiy va ijtimoiy xizmatlar bilan qamrab olinishi uchun gʻamxoʻrlik koʻrsatish inson omiliga eʼtiborning eng ustuvor tamoyillaridan biridir. Bu 2015-yilning 18-fevralida qabul qilingan "Keksalarni eʼzozlash yili” Davlat dasturi toʻgʻrisida”gi Oʻzbekiston Respublikasi Prezidenti qarorida oʻz ifodasini topgan. Ayniqsa, Dasturda 1941-1945-yillardagi urush va mehnat fronti faxriylarini manzilli ijtimoiy himoya qilish va qoʻllab-quvvatlashni kuchaytirish yuzasidan yil davomida amalga oshiriladigan ishlar, koʻrsatiladigan xizmatlar bandma-band belgilab qoʻyilgani yanada quvonarli. Haqiqatan ham, mamlakatimiz aholisining juda kam sonli qatlamini tashkil etuvchi ikkinchi jahon urushi va mehnat fronti faxriylari uchun farovon va munosib turmush sharoitlari yaratish bilan birga ularning koʻngilli dam olishlari, Oʻzbekistondagi oʻzlari xohlagan sihatgohlarda davolanib, salomatliklarini mustahkamlashlari uchun barcha zarur ishlarni amalga oshirish Davlat dasturida oʻz ifodasini topgan. Hatto qariyalarning qiziqishlari boʻyicha mahallalarda turli muloqot markazlari, klublar tashkil etish, jismoniy tarbiya va sport bilan shugʻullanishlari uchun sharoit yaratish, ulugʻ insonlarning qiziqishlariga mos mavzularda maxsus telekoʻrsatuvlar, spektakl va filmlar yaratish ham Keksalarni eʼzozlash yili Davlat dasturida belgilangan vazifalar sirasiga kiritilishi biz – keksa avlod vakillariga koʻrsatilayotgan beqiyos gʻamxoʻrlikdir. Menimcha, bundan ortiq mehr-oqibat, eʼtibor va gʻamxoʻrlik boʻlmasa kerak. Demak, nuroniylarimiz toʻla davlat muhofazasida, ularning yaxshi, har tomonlama farovon, izzat-hurmat qurshovida yashashlari uchun Prezidentimizning oʻzi jon kuydirayotir. Biz – nuroniylar bundayin gʻamxoʻrlikka munosib ravishda tobora mislsiz taraqqiyot pogʻonalaridan yuksalib borayotgan mamlakatimiz mustaqilligini mustahkamlash yoʻlidagi barcha xayrli ishlarga qoʻl-qanot, eng yaqin maslahatgoʻy, bir samimiy doʻst boʻlib yashashga hamisha burchlimiz. Chunki mamlakatimizning bugungi qudrati va salohiyatida keksa avlod vakillari – biz nuroniylarning munosib hissamiz bor. Buni qalban his etib yashash esa bizga hamisha kuch-quvvat bagʻishlaydi.

Bekman ALLABERGANOV,

"Nuroniy” jamgʻarmasi tuman boʻlimi raisi.