ISTEʼMOLChILARNI KUZ-QISh MAVSUMIDA UZLUKSIZ ELEKTR ENERGIYaSI BILAN TAʼMINLASh ChORALARI KOʻRILDI
Xalqimizning hayotdan rozi yashashini taʼminlash maqsadida mamlakatimizda amalga oshirilayotgan ishlar juda keng miqyosli boʻlib, birinchi navbatda aholining maishiy muammolarini hal etish, ularni uzluksiz elektr energiyasi bilan taʼminlash borasidagi ishlarni yuksak sifat darajasiga koʻtarishga hamisha eng ustuvor vazifa sifatida qaraladi. Chunki xalqimiz “rizqingni sotib ravshan ol”, degan hikmatli iborani bekorga yaratmagan. Shu bois, eng chekka qishloqlarda istiqomat qiluvchi aholining ham elektr energiyasiga boʻlgan ehtiyojini toʻliq qondirish maqsadida shaxsan Prezidentimiz topshirigʻiga binoan, eskirgan elektr uzatish tarmoqlarini, yaroqlilik muddatlari oʻtgan transformator punktlarini yangisiga almashtirish, taʼmirtalab elektr uskunalarini qayta taʼmirlash, simyogʻochlar oʻrniga beton ustunlar oʻrnatish ishlari amalga oshirilmoqda.
Bu borada Amudaryo tuman Elektr taʼminoti korxonasi tomonidan olib borilayotgan tiklash-taʼmirlash ishlari, isteʼmolchilarga uzluksiz elektr energiyasi yetkazib berish maqsadida elektr taqsimlash punktlari va uzatish tarmoqlarida oʻtkazilayotgan sinash, tiklash-taʼmirlash ishlaridan isteʼmolchilar mamnun.
Joriy 2023-2024-yil kuz-qish mavsumida isteʼmolchilarni uzluksiz va sifatli elektr energiyasi bilan taʼminlash, shuningdek, kuchli shamol, sel-yomgʻir holatlari yuz berganida va bunday holatlarning oldini olish maqsadida joylardagi 46 dona transformator punktlari, 161,6 km. uzunlikdagi havo elektr tarmoqlari, 12 dona tayanch ustunlari almashtirilib, mazkur obʼektlarda sifatli mukammal taʼmirlash ishlari bajarildi.
Bundan tashqari, 108ta transformator punktlarida, 251 km. uzunlikdagi elektr uzatish havo tarmoqlarida joriy taʼmirlash ishlari muvaffaqiyatli yakunlanib, kuz-qish mavsumiga taxt qilib qoʻyildi.
2023-2024 kuz-qish mavsumiga tayyorgarlik jarayonida tumanning Xizr eli, Oʻzbekiston, Qoramon, Durunki, Doʻstlik, Besh ovul, Ayoqchi, Gulzor, Uyshin mahallalari hamda Bobur nomli, Amir Temur nomli, Choykoʻl, Toʻlqin, Doʻrman va Qangli ovullarida istiqomat qiluvchi isteʼmolchilarni kuz-qish mavsumida hech qanday muammosiz elektr energiyasi bilan taʼminlash maqsadida va elektr uzatish tarmoqlarida muammo yuz bermasligi uchun 14 dona transformator punkti hamda 33,40 km. uzunlikdagi elektr uzatish tarmoqlarini qurish rejalashtirilgan edi. Ayni paytda mazkur hududlarda elektr uzatish tarmoqlari tortilib, 10ta transformator punktlari oʻrnatildi, yana toʻrtta transformator punktlarini oʻrnatish ishlari davom ettirilmoqda.
Shuningdek, favqulodda holatlarning oldini olishga qaratilgan chora-tadbirlar ham koʻrib qoʻyildi. Xususan, bunday holatlarda xavfni tezda bartaraf etish maqsadi-da qoʻshimcha zahira materiallar tayyorlandi. Zarur avtotransport vositalari, yongʻinga qarshi uskunalar soz holatga keltirilib, favqulodda holatlarni tezda bartaraf etishga yoʻnaltiriluvchi va tiklash-taʼmirlash ishlarini amalga oshirishga masʼul brigada ham tuzildi. Ishchi-xodimlarning dam olish, yuvinish xonalari ham jihozlab qoʻyildi. Oshxonada barcha qulay sharoitlar yaratilib, kuz-qish mavsumini talofatsiz oʻtkazish boʻyicha rejaviy jadval ishlab chiqildi. Shu bilan birga tun-u kun uzluksiz navbatchilik tizimi qayta koʻrib chiqilib, qatʼiy intizomga asoslangan tizim tashkil etildi.
J.ALLANIYaZOV, Amudaryo TET bosh muhandisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
