INShOLAR TANLOVI GʻOLIBLARI TAQDIRLANDI

“Mahalla” xayriya jamoat fondi Amudaryo tuman boʻlinmasining Qoraqalpogʻiston Respublikasi Joʻqorgʻi Kengesi huzuridagi Jamoat fondi tomonidan moliyalashtirilgan “Obod mahallam” nomli grant loyihasi ish rejasiga asosan tumanning barcha joylarida uchrashuvlar, seminarlar, davra suhbatlari va turli mavzularda tanlovlar oʻtkazilib kelinmoqda.

Shu yil sentyabr oyining ikkinchi yarmida tashkilot “Jayxun ilhomlari” nodavlat notijorati bilan hamkorlikda tumanning Oq oltin, Bobur nomli ovullari va Jumurovul mahallasi hududlarida joylashgan umumtaʼlim maktablari oʻquvchilari oʻrtasida “Mustaqil yurtimning obod mahallasi” mavzusida insholar tanlovini oʻtkazgan edi.

Insholar tanlovining ishtirokchilari oʻzlarining ekologiyaga oid bilimlari yuqori darajada ekanligini yana bir bora namoyon qildilar. Tanlovga kelib tushgan insholar badiiy kengash aʼzolari tomonidan koʻrib chiqilib, gʻoliblar aniqlandi.

Unga koʻra 71-sonli maktabning 11-sinf oʻquvchisi Hulkaroy Abdurahmonova “Mavzuga oid eng yorqin fikrlari uchun” 1-oʻringa, 45-sonli maktabning 10-sinf oʻquvchisi Latofat Haydarova “Ezgulik targʻibotchiligi uchun” 2-oʻringa, 48-sonli maktabning 10-sinf oʻquvchisi Hulkaroy Yusupova “Shaxsiy fikrini ravon bayon qilgani uchun” 3-oʻringa munosib deb topildilar.

Shuningdek, 86-sonli maktabning 10-sinf oʻquvchisi Surayyo Jumamurodova va 50-sonli maktabning 8-sinf oʻquvchisi Shahzoda Tojiboyevalar insholar tanlovidagi “Faol ishtiroki uchun” sovrindorlar safidan joy oldilar.

Gʻoliblar va faol ishtirokchilarga tanlov tashkilotlari tomonidan tayyorlangan sovgʻalar, “Faxriy yorliq”lar tantanali ravishda topshirildi.

Aytish joizki, tabiiy resurslardan oqilona foydalanish sohasidagi qonun hujjatlari talablari buzilishining oldini olish, uni aniqlash va chek qoʻyish, tabiatni muhofaza qilish faoliyati samaradorligini oshirishga hissa qoʻshish, jamoatchilik ekologik nazoratini amalga oshirish, aholining ekologiyaga oid bilimlarini kengaytirish, hududlarni obodonlashtirish va koʻkamzorlashtirish, atrof muhofazasiga hissa qoʻshish – loyihaning bosh maqsadidir.

Loyiha doirasida oʻtkazilayotgan tadbirlarda atrof-muhitni muhofaza qilish, tabiiy resurslardan oqilona foydalanish sohasidagi qonun hujjatlari talablarini aholining keng qatlamiga tushuntirish, fuqarolar yigʻinlari huzuridagi maxsus komissiyalar faoliyati samaradorligini yanada yaxshilashga koʻmaklashish, soha mutaxassislari va OAV vakillari ishtirokida oʻquv seminarlari tashkil qilish kabi ishlar oʻzining ijobiy samarasini bermoqda.

Grant loyihasi doirasida aholi, ayniqsa yoshlarni tabiatga ehtiyotkorona munosabatda boʻlish, tabiiy resurslarni tejashga daʼvat qilish, ularning ekologiyaga oid bilimlarini oshirish maqsadida umumtaʼlim maktablari oʻquvchilari oʻrtasida oʻtkazilgan “Yashil tabiatni asrash – oʻz qoʻlimizda”, “Koʻchat ekish – ezgu anʼana”, “Men ekkan nihol”, “Hashar – elga yarashar”, “Tabiat va biz”, “Mahallam jamoli” mavzularidagi insholar tanlovlari yoshlarni ona tabiatni asrashga chorlayotgani bilan nihoyatda muhim ahamiyat kasb etmoqda.

Oʻrozali REYIMOV