HOKIM YoRDAMChILARI TUMANIMIZ AHOLISINING YaQIN KOʻMAKChILARIGA AYLANMOQDA

Mamlakatimiz mahallalarida oʻtgan yildan hokim yordamchilari ish boshlagan edi. Bu tizim ahvoli ogʻir oilalarga manzilli koʻmak berish, ularni ishbilarmonlikka jalb qilish orqali kambagʻallikni qisqartirish va xalqimizning umumiy farovonligini taʼminlashga qaratilgani bilan katta ahamiyat kasb etib, oʻzining ijobiy samarasini bera boshladi.

Amudaryo tumanida ham barcha ovul va mahallalarda aholini oʻylantirayotgan va tashvishlantirayotgan muammolarga yechim topishga kirishgan hokim yordamchilarining saʼy-harakatlari natijasi koʻzga tashlanmoqda. Ularning xonadonma-xonadon yurib, har bir muammoga yechim topishga astoydil koʻmaklashayotgani, tashvishlariga yelka tutayotganidan aholi mamnun boʻlmoqda.

Tumanda faoliyat yuritayotgan hokim yordamchilari tomonidan 2023-yil uchun rejaga muvofiq 37 216 ta xonadonlar xatlovdan oʻtkazildi. Xatlov davomida uyma-uy yurib suhbatlashilib, fuqarolarning oilaviy sharoitlari, muammolari oʻrganildi, xohish-istaklari, kelajak rejalari bilan qiziqib koʻrildi. Shunga koʻra, ovul va mahallalarning ijtimoiy-iqtisodiy holati, aholining turmush darajasini yaxshilashga doir chora-tadbirlar ishlab chiqildi. Endilikda ularni amalga oshirishga alohida eʼtibor qaratilmoqda.

Shu yil iyul oyida hokim yordamchilari tomonidan 999 nafar shaxsning bandligi taʼminlangan boʻlib, shundan 295 nafari doimiy, 318 nafari haq toʻlanadigan jamoat ishlariga jalb etilgan boʻlsa, 386 nafari oʻzini-oʻzi band etgan. Shuningdek, hokim yordamchilari tomonidan oilaviy tadbirkorlikni rivojlantirish dasturlari doirasida 792 nafar fuqaroga 11 mlrd. 57 mln. 325 ming soʻm miqdorida kredit ajratish boʻyicha tavsiyalar berilgan.

Hokim yordamchilari tomonidan tuman boʻyicha ehtiyojmand oila vakillariga bandligini taʼminlash maqsadida subsidiya ajratish boʻyicha ham xatlov ishlari oʻtkazildi. Bu yoʻnalishdagi ishlar 1-sektor hududidagi Beshtom va Uyshin mahallalarida,  2-sektor hududidagi Farovon mahallasida, 3-sektor hududidagi Durunki mahallasida, 4-sektor hududidagi Namuna mahallasida hokim yordamchilari tomonidan jadal olib borilmoqda. Shuningdek, qishloq xoʻjalik yerlarini ijaraga berish orqali aholining bandligini taʼminlash va oilasiga daromad kiritish boʻyicha olib borilgan tahlil natijasiga koʻra, 790,8 gektarga yaqin yer maydoni ajratilib, auktsionga qoʻyish boʻyicha tegishli ishlar olib borilmoqda. Bu boʻyicha ishlar Jumurovul mahallasi va Kuyukkoʻpir ovullaridagi hokim yordamchilari tomonidan boshqa hududlarga nisbatan yaxshi yoʻlga qoʻyilgan.

Shu bilan birga hokim yordamchilari tomonidan joriy yil may oyida 428 nafar fuqaro kasb-hunar va tadbirkorlikka oʻqitildi. Ularning koʻmagida shu kungacha jami 311 ta tadbirkorlik subʼektlari yangidan tashkil etilgan boʻlib, shundan 159 nafari yakka tartibdagi, 152 nafari yuridik maqomdagi tadbirkorlar hisoblanadi.

Oʻz faoliyatlari davomida ushbu vazifalarni sidqidildan bajarib kelayotgan hokim yordamchilari tumanimiz aholisining hayotidagi tashvishlarini yengillatayotgan yaqin koʻmakchilarga aylanishga ulgurishdi. Ularning yordami bilan bandligi taʼminlangan, tadbirkorlikni yoʻlga qoʻyib daromad topayotgan, muammolariga yechim topayotgan amudaryoliklar ijobiy oʻzgarishlarni oʻz hayotlarida koʻrishmoqda.

Erkin Rajabov,

Prezidentning tumandagi Xalq qabulxonasi mudiri.