“QADRING BOʻLSIN BALAND!” TADBIRI ORQALI OʻQUVChILAR QALBIDA ONA TILI VA VATANGA MUHABBAT TUYGʻUSI JOʻSh URDI

Dunyoda millat va elatlar koʻp, shu barobarida turfa tillar ham mavjud. Millat va elatlarning urf-odat va anʼanalari, tarixi va orzu-niyatlari oʻsha millat va elatning tili orqali namoyon boʻladi. Yondosh xalqlar va millatlar bilan oʻzaro aloqalarni yoʻlga qoʻyish imkoni ham tili orqali amalga oshiriladi. Shuning uchun ham til – xalqlar va millatlarni, mamlakatlarni bir-biriga bogʻlab turuvchi buyuk va qudratli maʼnaviy koʻprik hisoblanadi.

Mustaqillik tufayli ona tilimiz tom maʼnoda jahonga yuz tutdi 50 milliondan ziyod insonlar soʻzlashadigan oʻzbek tiliga jahonning nufuzli mamlakatlari – Yaponiya, Janubiy Koreya, Rossiya, Germaniya, Hindiston, Xitoy, Eron, Iroq, Pokiston, Bangladesh, AQSh kabi davlatlarida qiziqish ortdi. Ayni paytda oʻzbek tilida oʻz ona tilidagidek soʻzlayotgan turli millat vakillari uchun tilimizning oʻziga xos jilvasi va jarangi, goʻzalligi havas uygʻotgan boʻlsa, ne ajab! Chunki gʻazal mulkining sultoni Mir Alisher Navoiy bobomizning asarlari mehrigiyosini, buyuk maʼnaviy qudratini dunyo xalqlari ilk bora oʻzbek tilida anglab, his etdilar. Zahiriddin Muhammad Bobur asarlaridagi vatanparvarlik, odamiylik tuygʻulari dunyo xalqlari qalblarini oʻzbaki soʻz ila mahv etdi!

Bu haqda 21-oktyabr – oʻzbek tiliga davlat tili maqomi berilgan kun munosabati bilan 30-sonli umumtaʼlim maktabida boʻlib oʻtgan adabiy-musiqiy va maʼnaviy-maʼrifiy tadbir ishtirokchilari faxrlanib soʻz yuritdilar.

“Qadring boʻlsin baland!” mavzusida oʻtkazilgan mazkur tadbirda maktab sahnasi oʻzbek tilining buyukligini jahonga koʻz-koʻz qilgan ulugʻ salaflar tomonidan yaratilgan matematik, jugʻrofiy, tibbiy kashfiyotlar, badiiy asarlar va ona tilimiz taraqqiyotiga oid suratlar, hikmatli iboralar bilan bezatildi. Maktab oʻquvchilari ona tili va adabiyot oʻqituvchilari bilan birgalikda tayyorlagan kuy va qoʻshiqlarni ijro etishib, ona tilimizni madh etuvchi sheʼrlarni ifodali aytib berdilar, biri-biridan dilrabo raqslari bilan tadbir ishtirokchilarini xursand qildilar.

Tadbir davomida 7 v-sinf oʻquvchilari tomonidan tayyorlangan milliylikni targʻib etuvchi, qalblarda ona tilimizga hurmat va mehr tuygʻusini uygʻotuvchi sahna koʻrinishini namoyish etishdi.

Sahna koʻrinishi orqali tadbir ishtirokchilari oʻzbek tilidagi iboralar, xalq ogʻzaki ijodining boy maʼnaviy merosi, arxaik soʻz va iboralarning, boshqa tillardan oʻzlashgan soʻzlar, atamalarning maʼno-mazmunlari, nutqimizdagi ahamiyati haqidagi maʼlumotlarga ega boʻldilar.

“Qadring boʻlsin baland!” mavzusida oʻtkazilgan bayram tadbiri oʻquvchi-yoshlar qalbida ona tilimizga hurmat va mehr tuygʻularini yanada mustahkamladi. Oʻquvchi-yoshlar tadbirda shunchaki ishtirok etishmadi, balki qalblarida ona tilimizdan faxrlanish tuygʻulari yanada joʻsh urib, ona tili oʻzlari uchun hayot qadar muqaddasligini, ona tili orqali qalblarida Vatanga cheksiz muhabbat hissi manguligini izhor etdilar.

Robiya YOʻLDOShEVA.