Xalqaro nogironlar kuniga bagʻishlangan tadbir oʻtkazildi

Bugungi kunda yurtimizda olib borilayotgan islohotlar zamirida “Inson qadri uchun” degan ezgu gʻoya mujassam. Mazkur jarayonlarda nogironligi boʻlgan yurtdoshlarimizga ham alohida eʼtibor qaratilib, ularni har tomonlama qoʻllab-quvvatlashga, jamiyatning siyosiy, ijtimoiy, iqtisodiy va madaniy hayotidagi faolligini taʼminlashga katta eʼtibor qaratilmoqda.

1992-yilda Birlashgan Millatlar Tashkiloti Bosh assambleyasida 3-dekabr ­ Xalqaro nogironlar kuni sifatida eʼlon qilingan boʻlib, bu sana respublikamiz boʻylab keng nishonlanib kelinmoqda.

Sana munosabati bilan 2-dekabr kuni Amudaryo tumanidagi “Xon” toʻyxonasida tashkil etilgan tadbir ham mazkur maqsadlarning amaliy ifodasi boʻldi, deyish mumkin.

Tadbirda tuman hokimining oʻrinbosari – investitsiyalar va tashqi savdo boʻlimi boshligʻi Faxriddin Yusupov, “Inson” ijtimoiy xizmatlar markazi tuman boʻlimi boshligʻi Gʻulomjon Duysenboyev, Oʻzbekiston Nogironlar jamiyati Amudaryo tuman boʻlinmasi raisi Nilufar Xalboyeva hamda imkoniyati cheklangan yurtdoshlarimiz ishtirok etdilar.

Mamlakatimizda nogironligi boʻlgan shaxslarga jamiyat va davlat tomonidan koʻmak va yordam koʻrsatish, ularni ijtimoiy-siyosiy hayotga faol jalb etishga qaratilgan keng koʻlamli chora-tadbirlar amalga oshirilmoqda. Eng muhimi, taqdir taqozosi bilan nogiron boʻlib qolgan bironta ham yurtdoshimiz xalqimizning, davlat idoralarining mehru eʼtiboridan chetda qolmasdan, oʻzining mehnati va qobiliyati bilan nafaqat hayotda oʻz oʻrnini egallab kelmoqda, balki azmu matonati, sabr-bardoshi va shukronalik fazilatlari bilan koʻpchilikka ibrat boʻlmoqda.

Tadbirda hokimining oʻrinbosari – investitsiyalar va tashqi savdo boʻlimi boshligʻi Faxriddin Yusupov soʻzga chiqib, soʻnggi yillarda mamlakatimizda imkoniyati cheklangan fuqarolarga koʻrsatilayotgan gʻamxoʻrliklar ularning hayotdan rozi boʻlib yashashi uchun keng imkoniyatlar yaratilayotganini alohida taʼkidlab, shu maqsadda uy-joylar, turli reabilitatsiya-texnik vositalari bilan taʼminlanayotgani, bepul tibbiy koʻrikdan oʻtkazilib, moddiy-maʼnaviy qoʻllab-quvvatlanayotganini aytib oʻtdi.

Jamiyatda har bir inson oʻz oʻrniga ega. Jismonan toʻlaqonli sogʻlom boʻlmasa ham, imkoniyati cheklangan insonlar oʻzlarining hayotga boʻlgan ishonchi va umidini soʻndirmasdan, jamiyatning faol aʼzosiga aylanib, yurtimizning ijtimoiy-iqtisodiy rivojlanishida oʻz hissasini qoʻshib kelmoqda.

Tadbir davomida “Inson” ijtimoiy xizmatlar markazi tuman boʻlimi boshligʻi Gʻulomjon Duysenboyev mamlakatimizda imkoniyati cheklanganlar uchun tibbiy-ijtimoiy xizmatlar koʻrsatish, ularning bilim olishi, mehnat qilishi, malakali tibbiy xizmatlardan foydalanishi, oʻz isteʼdod va salohiyatini roʻyobga chiqarishi, oʻzlarini jamiyatimizning toʻlaqonli aʼzosi deb his etishlari uchun qulay sharoitlar yaratilganini taʼkidladi.

Shundan soʻng, bir guruh imkoniyati cheklangan yurtdoshlarimizga esdalik sovgʻalari topshirildi. Undan tashqari, 2 nafar nogironligi boʻlgan bolalarga nogironlar aravachasi bilan oʻyinchoqlar, 8 nafar eshitishida nuqsoni boʻlgan keksa yoshdagi imkoniyati cheklanganlarga eshitish moslamalari, 14 nafar yurtdoshlarimizga esa koʻzi ojizlar xassasi berildi.

Tuman Madaniyat boʻlimi tomonidan namoyish etilgan katta musiqiy dastur tadbirga yanada fayz kiritdi va barchaga bayram kayfiyatini ulashdi.

Nogironlar kuniga bagʻishlangan bayram tadbiri shoʻx kuy-qoʻshiqlar va dilrabo raqslar bilan davom etdi.

Tuman hokimligi Axborot xizmati