“MEHR HARAKATI” DOIRASIDAGI TADBIRLAR YuRTDOShLARIMIZGA MADAD BOʻLAYoTIR

Xalqimiz azal-azaldan shu ona zaminimizda mehr-oqibat, oʻzaro hamjihatlik, muhtojlarni qoʻllab-quvvatlashdek insoniy fazilatlarni moʻʼtabar sanab, bir-biri bilan doʻst-birodar boʻlib yashab kelgan, zarurat tugʻilganda bir-biriga begʻaraz koʻmak bergan.
Asrlar osha yashab kelayotgan buningdek umrboqiy urf-odatlarimiz, anʼanalarimiz zamirida ajdodlarimizning yuksak aql-zakosi, chin moʻminligi aks etadi va avlodlardan avlodlarga oʻtib kelmoqda.
Bugungi kunda muhtaram Yurtboshimiz tashabbuslariga koʻra xalq bilan muloqot qilish, ularning muammolarini tinglab, ijobiy hal etish, koʻmak berish  va har bir fuqaroning hayotidan rozi boʻlib yashashiga erishish borasida tizimli ishlar yoʻlga qoʻyilgan.
Qoraqalpogʻiston Respublikasi Joʻqorgʻi Kengesi tashabbusi bilan respublikamiz boʻylab oʻtkazib kelinayotgan “Mehr harakati” ham sharoiti ogʻir, kam taʼminlangan oilalarni qoʻllab-quvvatlashda muhim ahamiyat kasb etmoqda.
Maʼlumki Oʻzbekistonning boshqa viloyatlariga nisbatan bizning hududimizda qish fasli sovuq va uzoqroq davom etadi. Bunday ob-havo sharoitida kam taʼminlangan oilalar turmushida ancha muammolar yuzaga keladi. Shunday damlarda “Mehr harakati” doirasida amalga oshiriladigan tadbirlarda kamxarj oilalarga beminnat xayr-saxovat koʻrsatilib, qoʻllab-quvvatlanayotir. Bu koʻngillarga iliqlik, shukronalik baxsh etadi.
Shu yilning 9-dekabrida Choykoʻl ovulidagi Doʻstlik muqobil mashina traktor  parki omborxonasida tuman hokimi oʻrinbosari, oila va xotin-qizlar boʻlimi boshligʻi Goʻzal Soburova “Mehr harakati” doirasida tumanimiz fermerlarining xayr-saxovati hisobiga jamgʻarilgan oziq-ovqat va qishloq xoʻjaligi mahsulotlarini ehtiyojmand 78ta oilalarga tarqatdi. Tumanimizning turli burchaklarida istiqomat qilayotgan kam taʼminlangan, boquvchisini yoʻqotgan, turmushida iqtisodiy muammolarga duch kelgan oilalar vakillari un, moy, mosh, guruch, kartoshka, sabzi kabi turli roʻzgʻor ehtiyojiga zarur mahsuoltlarni olib, tumanimiz rahbarlariga, sahovatpesha fermerlarga minnatdorchilik bildirdilar. Shuningdek harakat doirasida 105ta oilaga 42 tonna koʻmir, 4 oilaga suyultirilgan gaz balloni, 2ta oilaga gaz plitasi, 90ta oilaga isitish pechkalari, ehtiyojmand oilalarning 120 nafar bolalariga boshdan oyoq kiyim-kechaklar hadya etildi.
Tumanimizda “Mehr harakati” doirasidagi tadbirlar davom etmoqda.
Xalqimizga xos bagʻrikenglikning bir ifodasi boʻlgan ushbu harakat negizida ijtimoiy himoyaga muhtoj, boquvchisidan ayrilgan, qoʻllab-quvvatlashga muhtoj oilalarga begʻaraz yordam berilib, qishning ayozli kunlarini talofatlarsiz oʻtkazishlariga imkon yaratilmoqda.
Hayot yoʻllari doimo bir tekis boʻlavermaydi. Hech kim men hayotda doimo baxtiyor, farovon yashayman, hech kimga muhtoj boʻlmayman, deya olmaydi, taqdir har kimni har xil har manzilda sinaydi. Shunday damlarda begʻaraz uzatilgan doʻstona qoʻl kishiga madad, suyanch boʻladi. Xalqimizga xos bagʻrikenglik, oʻzaro mehr-oqibat va xayr-saxovat kabi urf-odatlarimizning hayotbaxshligi ham shundandir.

Oygul RAJABOVA.