Pochchasini pichoqlagan amudaryolik fuqaro 7-yilga qamaldi

Mamlakatimiz sud-huquq sohasida amalga oshirilayotgan islohotlar natijasida sudlar bilan xalq oʻrtasidagi buyurokratik toʻsiqlarga barham berilayotgani bugun oʻzining ijobiy samarasini koʻrsatmoqda. Koʻplab jinoiy, maʼmuriy ishlar bevosita xalq vakillari ishtirokida, ochiq, xolis va shaffoflik tamoyili asosida koʻrib chiqilayotgani bois, xalqimizning sud idoralariga ishonchi tobora ortib bormoqda.

Joriy yilning 11-dekabr sanasida Amudaryo tumani ixtisoslashtirilgan maktabi binosida boʻlib oʻtgan jinoyat ishlari boʻyicha Amudaryo tuman sudining ochiq sayyor sud majlisi ham ishtirokchilar tomonidan xolislik, ochiqlik va oshkoralik asosida oʻtkazilgani qayd etildi.

Jinoyat ishlari boʻyicha Amudaryo tuman sudi raisi Asqar Safarov raisligida, sudya yordamchisi Fazilat Yuldasheva va Fazilat Eshmanovalarning kotibligida, davlat ayblovchisi, Amudaryo tuman prokurorining yordamchisi Sanjar Abdullayevlar va sudlanuvchining advokati Oʻrinboy Oʻrazmetovlar ishtirokida oʻtgan sayyor sud majlisida Oʻzbekiston Respublikasi Jinoyat Kodeksining 104-moddasi 2-qismi “v” va “l”, yaʼni qasddan badanga shikast yetkazish bandlari boʻyicha aybdor deb topilgan shaxs Maʼmur Samandarov (ism-shariflar oʻzgartirildi)ga oid jinoyat ishi koʻrib chiqildi.

Ochiq sayyor sud majlisida bayon qilinishicha, sudlanuvchi Maʼmur Samandarov oʻzining oldindan mavjud boʻlgan qasdi, yaʼni 2023-yilning mart oyida Amudaryo tumanining mahallalaridan birida yashovchi tugʻishgan opasi Gulsara Samandarovani turmush oʻrtogʻi Ilhom Jumaboyev oilaviy kelishmovchiliklar tufayli urib, tan-jarohati yetkazgani sababli, pochchasidan qasd olish maqsadida yashash uyidan oshxona pichogʻini olib uning uyiga borgan va qaynisining oldiga chiqib kelgan Ilhom Jumaboyevning tanasining turli joylariga qoʻlidagi oshxona pichogʻi bilan bir necha marta urib, qasddan tan-jarohati yetkazgan va hodisa joyidan qochib, yashiringan.

Ilhom Jumaboyev tuman tibbiyot birlashmasining jonlantirish boʻlimiga olib borilib, birinchi tibbiy yordam koʻrsatilgan. Tibbiyot birlashmasining 2023-yil 20-iyun kungi tibbiy maʼlumotnomasida jabrlanuvchi Ilhom Jumaboyevga “koʻkrak qafasi, qorin old devori sanchilgan jarohati, oʻng tomon chov sohasi sanchilib-kesilgan jarohati, ikkala bilaklari koʻplab sanchilib-kesilgan jarohatlari, posttravmatik, postgemorragik shok 2-3-darajasi” tashxisi qoʻyilgan.

Jabrlanuvchi Ilhom Jumaboyevga nisbatan tayinlangan sudga oid tibbiy ekspertizaning 330-sonli xulosasida, unga “oʻng yelka, ikkala bilaklari, koʻkrak qafasi oʻng tomoni, qorin old devori va chov soxalarida koʻplab sanchilib-kesilgan jarohatlari, jarohatdan soʻng qon ketishdan keyingi shokning 2-3-darajasi, arterial bosimning va pulsning pasayishi, oʻng bilagi qoʻyib yuboruvchi terisining falaji va tan-jarohatlari sanchilib kesuvchi buyum, yaʼni pichoq taʼsirida yetkazilgan jarohatlar tashhisi qoʻyilgan. Barcha hodisa tafsilotlari bir-birining vaqtiga toʻgʻri kelishi hamda yetkazilgan jarohatlar hayot uchun xavfli boʻlgan ogʻir tan-jarohatlari guruhiga kirishi koʻrsatilgan.

Oshkoralik, ochiqlik va shaffoflik asosida boʻlib oʻtgan ochiq sayyor sud majlisida guvohlarning koʻrsatmalari tinglanib, tibbiy ekspertiza xulosalari va sudlanuvchi qarshisiga toʻplangan dalillar atroflicha muhokama etildi.

Sud tomonidan sudlanuvchi Maʼmur Samandarovga jazo tayinlashda uning aybiga toʻliq iqror boʻlganini, qilmishidan pushaymon boʻlgani, hali yosh ekanligini jazosini yengillashtiruvchi holatlar deb, jinoyatda jazosini ogʻirlashtiruvchi holatlar yoʻq, deb hisoblab, 7-yil ozodlikdan mahrum qilish jazosi tayinlandi.

Ravshan BAHROMOV.