TOShYoP OVULIDA YoShLAR ORASIDA HUQUQBUZARLIKLAR, JINOYaTLAR SODIR ETILIShINING OLDI OLINAYaPTI

Yoshlar kelajagiga eʼtibor va gʻamxoʻrlik hech qachon bugungiday dolzarb ahamiyat kasb etgan emas. Chunki shiddat bilan kechayotgan globallashuv jarayonida ularni yot gʻoyalardan asrash, boʻsh vaqtlarini mazmunli oʻtkazish, mafkura maydonining turli xurujlaridan himoya qilish va maʼnaviy yetuk qilib voyaga yetkazish juda muhim.

Buningdek dolzarb vazifa ijrosiga hissa qoʻshish maqsadida “Amudaryo televideniyesi” tahririyati Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan “Yoshlarning maʼnaviy-ruhiy va intellektual salohiyatini oshirish” nomli grant tanlovida “Yuksak maʼnaviyatli va axloqli yoshlar – kelajak poydevori” nomli loyihasi bilan qatnashib, gʻolib boʻldi va amalga oshirib kelmoqda.

Yaqinda tahririyat xodimlari ushbu loyiha ish rejasiga muvofiq yoshlar oʻrtasida maʼnaviy-maʼrifiy ishlarning qay tarzda olib borilayotganligi, ularni yot gʻoyalardan ishonchli himoya qilish, intellektual salohiyatini oshirish borasida qilinayotgan saʼy-harakatlar, amalga oshirilishi belgilanayotgan rejalar bilan tanishish maqsadida tumanimizning Toshyop ovulida boʻldilar.

Ovulda 596 xonadonlarda 701 ta oila istiqomat qiladi. Shulardan 35 tasini 30 yoshga toʻlmagan yoshlar oilalari tashkil etadi. Hududda 2ta maktab, 4ta maktabgacha taʼlim tashkilotlari faoliyat koʻrsatmoqda.

Ovul fuqarolar yigʻini masʼullari avvalo taʼlim-tarbiya muassasalarida sogʻlom maʼnaviy muhit barqaror boʻlishiga, ularda yosh oʻgʻil-qizlarning ham aqlan, ham jismonan yetuk boʻlib voyaga yetishiga harakat qilmoqdalar. Bu borada ovul, taʼlim muassasasi, oila hamkorligi yaxshi yoʻlga qoʻyilgan. Shuningdek, yoshlar tarbiyasida xalqimizning asrlar osha yashab kelayotgan urf-odatlari, qadriyatlari va anʼanalarining hayotiy saboqlaridan keng foydalanilayapti. Natijada yoshlar orasida huquqbuzarliklar, jinoyatlar sodir etilishining, yot gʻoyalar taʼsiriga berilishining oldi olinmoqda.Shuningdek,maktablar oʻquvchilari orasida turli tanlovlar, asosiy fanlar olimpiadalari gʻoliblari safi, bitiruvchilarning oliy taʼlim muassasalariga oʻqishga kirayotganlari soni tobora koʻpaymoqda.Yaqinda ovul fuqarolar yigʻinida boʻlib oʻtgan tadbirda bu xususda atroflicha soʻz yuritildi.

Tadbirda fuqarolar yigʻini masʼullari, koʻchaboshchi ayollar, nuroniylar va yoshlar ishtirok etdilar. Yigʻilganlar loyiha koordinatori Oygul Rajabova, ovul fuqarolar yigʻini raisi Gulshod Sobirova, taʼlim faxriysi, “Bir nuroniy oʻn yoshga masʼul” tamoyili asosida ovulning ogʻir sharoitga tushib qolgan 10 nafar yoshlarini otaliqqa olib, ularning hayotiy muammolarini hal qilishga koʻmaklashayotgan Karimboy Rajabov, ovul imomi Gulmurza Davletovlarning kun tartibidagi mavzu yuzasidan maʼruzalarini tingladilar. Ochiq muloqot tarzida oʻtkazilgan tadbirda yoshlar vakillarining ham fikr-mulohazalari tinglandi. Taʼkidlanganidek, yosh avlod kelajagimiz.

Ertagi kunimiz bugunimizdan ham farovon, yorqin boʻlishini istasak, bolalar tarbiyasi bilan juda jiddiy shugʻullanishimiz,maʼnaviyat sarchashmasi boʻlgan kitoblarga oshno qilishimiz, ularning qiziqishlariga ham hurmat bilan qarashimiz kerak. Eʼtiborlisi, bunda ota-onalar avvalo oʻzlari bu borada farzandlariga oʻrnak boʻlishlari lozim. Boisi bolalar ota-onaning aytganidan emas, qilgan ishlaridan oʻrnak oladi.

Tadbirda bu borada amalga oshirilishi lozim boʻlgan vazifalar ham belgilab olindi.

Sevara ISMOILOVA.