Tumanimizda “Yangi Oʻzbekiston” massivi qurilishi boshlandi

Soʻnggi yillarda mamalakatimizda qurilish sohasida Yangi Oʻzbekistonga xos boʻlgan zamonaviy bunyodkorlik ishlari jadallik bilan amalga oshirilmoqda. Oʻzbekistonning barcha hududlarida xalqaro darajadagi bino va inshootlar majmualari bilan bir qatorda, qishloq hududlarda ham shahar sharoiti tipidagi aholi turar joylari qad rostlamoqda.

Eʼtiborli jihati shundaki, Amudaryo tumanida ham yildan-yilga qurilayotgan uy-joylar soni ortib, ularni arzon narxlarda sotib olish uchun fuqarolarimizga bir qator qulayliklar yaratib berilmoqda. Bu jarayonda “2022-2026-yillarga moʻljallangan Yangi Oʻzbekistonning taraqqiyot strategiyasi”da belgilab olingan vazifalar muhim dasturilamal boʻlib xizmat qilayotir.

Aholining uy-joy sharoitini yaxshilash, hududlarda zamonaviy shaharsozlik talablari asosida koʻp qavatli uy-joylar, ijtimoiy soha va infratuzilma obʼektlari hamda muhandislik-kommunikatsiya tarmoqlari qurilishini jadallashtirish, yer resurslaridan oqilona foydalanish va aholi punktlarining urbanizatsiya jarayonlarini rivojlantirish maqsadida 2021-yil 9-dekabr kuni Oʻzbekiston Respublikasi Prezidentining “Yangi Oʻzbekiston” massivlarini qurish va hududlarning ijtimoiy-iqtisodiy rivojlanishini taʼminlash chora-tadbirlari toʻgʻrisida”gi Farmoni qabul qilingan edi. Farmonga asosan joylarda “Yangi Oʻzbekiston” massivlari qurilishi boshlandi. 2024-yil 12-yanvar kuni Amudaryo tumanining Doʻstlik mahallasi hududidagi boʻsh turgan yer maydonlarida ham yangi massivi qurilishiga tamal toshi qoʻyildi.

Yangi massiv qurilishining boshlanishiga tamal toshi qoʻyish marosimida Qoraqalpogʻiston Respublikasi Qurilish va uy-joy kommunal xoʻjaligi vaziri Azim Qurbonboyev, tuman hokimining birinchi oʻrinbosari Kamiljan Aytbayev, tuman hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Bahodir Ernazarov, ovul va mahalla fuqarolar yigʻinlari raislari hamda tegishli soha vakillari, faxriylar ishtirok etdilar.

Tadbirda tuman hokimining birinchi oʻrinbosari Kamiljan Aytbayev bugungi kunda tumanimizda ulkan bunyodkorlik ishlari amalga oshirilayotgani, yangi taʼlim va tibbiyot muassasalari, sport saroylari, yoʻl va koʻpriklar, zamonaviy uy-joylar qurilib, foydalanishga topshirilayotgani natijasida tumanimiz qiyofasi tubdan oʻzgarayotganini aytib oʻtdi.

Bugungi kunda turar-joyga muhtoj aholi qatlamini uy-joy bilan taʼminlash maqsadida 6ta 5 qavatdan iborat har biri 30-35 xonadonli turar-joylarni qurish ishlari boshlab yuborildi. Bundan tashqari, hududda bozor infratuzilmasi obʼektlari, aholi dam olish maskani, savdo va maishiy xizmat koʻrsatish obʼektlari qurilishi belgilangan.

Tuman hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Bahodir Ernazarov inson manfaatlarini taʼminlash, odamlarga barcha qulaylik yaratishga qaratilayotgan eʼtibor har qadamda koʻzga tashlanayotganini hamda binolarni loyihalashtirishda iqlim sharoitlari, sanitariya va xavfsizlik talablari asosida qurilishini taʼkidlab oʻtdi.

Joriy yilda quriladigan har biri 5 qavatli boʻlgan 6ta koʻp qavatli uyda jami 185ta xonadon boʻladi. Keyingi bosqichlarda esa massiv hududida jami 65ta koʻp qavatli turar joylar qurilib, ulardagi xonadonlarning umumiy soni 2100taga  yetadi. Demak, ushbu “Yangi Oʻzbekiston” massivida kelgusida jami 10 mingdan ortiq aholi yashaydi.

Bugungi kunda massivda bir necha turli qurilish texnikasi hamda mahalliy quruvchi-muhandislar gʻayrat bilan mehnat qilmoqda. Yana bir eʼtiborli jihati shundaki, elektr energiyasini iqtisod qilish maqsadida massivda qurilayotgan har bir inshoot tomiga quyosh panellari oʻrnatilishi rejalashtirilgan.

Kelgusida massiv qoshida va hududida ijtimoiy infratuzilma obʼektlari, savdo va xizmat koʻrsatish shoxobchalari, bolalar maydonchalari va sport maskanlari ham bunyod etilishi rejalashtirilgan. Yangi inshootlar, ishlab chiqarish majmualari va ijtimoiy infratuzilma obʼektlari qurilishi hisobiga hududdagi aholining yashash tarzi yanada yuksaladi.

Oʻylaymizki, Doʻstlik mahallasi hududida barpo etilayotgan “Yangi Oʻzbekiston” massivi tumanimizning koʻrkiga koʻrk bagʻishlaydi. Mangʻit shahrini ulkan bunyodkorlik maydoniga aylantiradigan ushbu massiv qurilishi uy-joyga muhtoj aholining orzu-umidlarini bekamu koʻst roʻyobga chiqarishga zamin yaratadi.

Tuman hokimligi Axborot xizmati