UMUMXALQ XAYRIYa HAShARI QIShLOQ VA MAHALLALARGA KOʻRK BAGʻIShLADI

Hashar – xalqimiz uchun azaliy bobomeros qadriyat, birdamlik, millatlaro totuvlik, mehr-oqibat va saxovat ramzi. Har yili anʼanaga aylangan Navroʻz – umumxalq bayrami arafasidagi xayriya hasharida mamlakatimizdagi 9 mingta mahallada bu yil ham obodonlashtirish, koʻkalamzorlashtirish ishlari amalga oshirilib,  16 ming tup mevali va manzarali daraxtlar ekildi.

Amudaryo tumanida ham umumxalq xayriya hashari uyushqoqlik bilan oʻtkazildi.

Tumanning Qilichboy mavzesidan to Nazarxon qishlogʻi kengliklarigacha boʻlgan bepoyon hududlarda 10dan ortiq millat vakillarini bir ezgu maqsad – Amudaryo tumanini Oʻzbekistonning yanada obod va farovon, havosi musaffo, yeri, suvi ekologik toza hududiga aylantirishdek xayrli niyatlar yanada jipslashtirdi. Xitoy va Boʻzyop ovullaridan Jumurtov, Qipchoq va Qangligacha boʻlgan guzar yoʻllari, dala yoʻllari va koʻchalar boʻylarida amalga oshirilgan obodonlashtirish va koʻkalamzorlashtirish tadbirlarida minglab tup dov-daraxtlarga shakl berildi, tuplari oqlanib, quriganlarining oʻrniga yangi koʻchatlar oʻtqazildi.

Shuningdek, umumtaʼlim maktablari, sogʻlikni saqlash muassasalari, madaniy-maishiy obʼektlar, tadbirkorlik subʼektlarining atroflaridagi daraxtzorlar, archazorlarga alohida shakl berilib, bu hududlarga ham mevali va manzarali daraxt koʻchatlari, gul koʻchatlari ekildi.

Ayniqsa, Amudaryo tuman Tibbiyot birlashmasi xodimlari hasharda hamjihatlik bilan keng miqyosli obodonlashtirish ishlarini amalga oshirdilar. Markaziy shifoxona hududidagi archazorlar, shifokorlar bogʻi tartibga keltirilib, daraxtlarga shakl berildi. Qish oylaridagi qor-yomgʻirlar tufayli ranglari ketib qolgan shifoxona hududidagi yoʻlaklar chetlaridagi beton toʻsiqlarni boʻyash, daraxtlarni oqlash, ariqlarni chimlardan tozalash ishlari amalga oshirildi. Koʻp tarmoqli markaziy poliklinika atrofi va gulzorlar tozalanib, ekishga tayyorlab qoʻyildi.

Hashar – elga yarashar, deb bejizga aytilmagan. Oʻzlari yashayotgan, mehnat qilayotgan hududlarni, qishloq va mahalla guzarlarini, koʻchalar va imoratlarini fayzli, goʻzal goʻshaga aylantirish istagida boʻlgan amudaryoliklar hashar bahonasida xayr-saxovat ishlarini ham amalga oshirdilar. Uy-joylarining taʼmiriga roʻzgʻor xarajatlaridan orttirib mablagʻ ajratolmayotgan hamqishloqlari, mahalladoshlari holidan xabar olishib, ularning xonadonlarida taʼmirlash-tiklash ishlarida yaqindan koʻmakdosh boʻldilar.

Ayniqsa, bu borada el-yurtda yuksak obroʻ-eʼtiborga ega nuroniylarning umumxalq hasharida ishtirok etgan 12566 nafar yoshlarga bosh-qosh boʻlib, ehtiyojmand oilalarning uy-joylarini tartibga keltirish, tomorqa yerlarida ekish-tikish ishlariga koʻmaklashishdek xayr-saxovat tadbirlarini amalga oshirganlari oʻsib kelayotgan yosh avlod vakillari uchun haqiqiy ibrat boʻldi.

Shu kuni amudaryoliklar ota-bobolari mangu qoʻnim topgan qabristonlarda ham keng koʻlamli  obodonlashtirish ishlarini amalga oshirdilar. Xususan, Choykoʻl qishlogʻi hududidagi Noʻgʻay Eshon, Nazarbobo, Bobo Rustam, Amir Temur nomli ovul hududidagi Ming yarim shahid, Qilichboy  mavzesidagi Yoqub Eshon bobo, Kuyuk koʻpir va Xitoy qishloqlaridagi Haq Saidjon bobo, Qumsangar, Jumurtov shaharchasi hududidagi Salomat bobo, Nazarxon qishlogʻidagi Bes mulla kabi tumandagi barcha qabristonlar turli shox-shabbalardan, qurigan oʻt-oʻlanlardan, ortiqcha chiqindilardan tozalandi. Tumandagi 1ta ziyoratgohda ham keng miqyosli ishlar olib borildi. Shu bilan birga, mazkur qabristonlarda ruhlari  mangu qoʻnim topgan insonlar xotiralariga qurʼon oyatlaridan tilovatlar qilindi.

Amudaryo tuman Obodonlashtirish boshqarmasi ishchilari tomonidan bajarilgan ishlar yanada samarali boʻldi. Mazkur korxona ishchi-xodimlarining saʼy-harakatlari tufayli Mangʻit shahrining markaziy koʻchalari boʻylaridagi dov-daraxtlar ohaklandi, yoʻl chetlaridagi beton toʻsiqlar va ustunlar oq, qora ranglarda boʻyalib, bezak berildi. Dehqon bozori atrofidagi tadbirkorlik subʼektlari tartibga keltirilib, Dehqon bozorining ichki va tashqi qismlari turli maishiy chiqindilardan tozalandi va yigʻilgan chiqindilar maxsus texnikalar yordamida shahar tashqarisidagi chiqindi poligoniga chiqarib tashlandi.

Tuman hududidagi qishloqlar va mahallalarni oqar suv bilan taʼminlovchi ariqlar hududlar aholisi va yoshlar tashabbuslari bilan tozalanib, ayrim hududlarda qazuv ishlari ham amalga oshirildi.

Umumxalq xayriya hashari munosabati bilan olib borilgan obodonlashtirish va koʻkalamzorlashtirish ishlari tufayli Amudaryo tumanidagi 49ta qishloq va mahallalar hududlari yanada goʻzal va koʻrkamlik kasb etdi.

Shuningdek, Mangʻit shahrining Navoiy nomli, Oybek nomli, Chordara, Durunki, Doʻstlik, Yangiobod, Farovon mahallalari hududlaridagi har bir koʻcha, har bitta xonadon va mazkur mahallalar hududida faoliyat olib boruvchi idora va tashkilotlar atroflari umumxalq hasharidan soʻng yanada obod va koʻrkam qiyofaga kirdi. Xonadonlarning fasad qismlari ohaklanib, koʻchalar chetidagi beton ariqlar tozalandi. Umumxalq hashari tufayli Amu elining har bir goʻshasi aholisi Navroʻz taraddudini boshlab yubordilar.

Yangi kun – yangi dehqonchilik faslini chor-atrofni obodonlashtirish, koʻkalamzorlashtirish tadbirlari bilan boshlashga odatlangan amudaryoliklar 17-mart – umumxalq xayriya hasharida hamjihatlik bilan ishtirok etishdi. “Obod va fayzli mahalla – yurt koʻrki” shiori ostida oʻtkazilgan ushbu umumxalq xayriya hasharida 48 ming 325 nafar kishi ishtirok etishdi. Ishtirokchilarning 12 ming 566 nafari yoshlar boʻlib, ularning saʼy-harakatlari bilan 297 gektar maydon turli xas-xashak va chiqindilardan tozalanib, 227 tonna chiqindi chiqindi poligoniga chiqarib tashlandi. 238 km. uzunlikdagi ariq-zovurlar tozalandi va 36ta qabristonda obodonlashtirish ishlari amalga oshirildi, 415ta koʻchalar obodonlashtirildi hamda aholi tomonidan koʻchalar, yoʻllar boʻylariga mevali va manzarali daraxt koʻchatlari ekildi. Ushbu keng koʻlamli obodonlashtirish ishlarini amalga oshirishda 34ta texnika vositalari jalb etildi.

Umumxalq xayriya hasharida ijtimoiy himoyaga muhtoj, kam taʼminlangan fuqarolarga xayr-saxovat koʻrsatilib, ulardan uy-joylari taʼmirga muhtoj boʻlgan 43 nafarining  imoratlari taʼmirlab berildi.

Shunisi eʼtiborliki, oddiy fuqarolar, uy bekalaridan  tortib, Amudaryo tumani hokimi Sobir Xoʻjametov va hokimlik bosh mutaxassislari ham faol ishtirok etgan umumxalq xayriya hashari tufayli Amudaryo tumanining barcha qishloq va mahallalari haqiqatan ham yanada obod va fayzli maskanlarga aylandi.

Robiya YOʻLDOShEVA.