Energotejamkor uskunalar resurslarni tejashga xizmat qiladi
Barchamizga yaxshi maʼlumki, bugungi kunda tabiiy gaz va elektr energiyasiga boʻlgan talab kundan kunga oshib bormoqda. Barqaror energiya taʼminoti, albatta, samaradorlik va tejamkorlik masalalari bilan chambarchas bogʻliq hisoblanadi. Shu maʼnoda ovul va mahallalarda masʼullar tomonidan isteʼmolchilarga energiyani tejash, tabiiy gaz va elektr energiyasi resurslaridan oqilona foydalanish, energiya samaradorligini oshirish yuzasidan olib borilayotgan tushuntirish-targʻibot ishlari muhim ahamiyat kasb etmoqda. Amudaryo tumanining Beruniy mahallasida aholi vakillari bilan tashkil etilgan uchrashuvlar ham shular jumlasidandir.
Mazkur tadbirda tuman prokuraturasi masʼullari, Favqulodda vaziyatlar boʻlimi xodimlari, elektr taʼminoti korxonasi vakillari, Beruniy mahallasidagi “yettilik” vakillari va boshqalar ishtirok etishdi.
Taʼkidlanganidek, mamlakatimizda energetika farovonligini taʼminlash uchun elektr energiyasi va tabiiy gazdan oqilona foydalanish, yoshlarni tejamkorlikka oʻrgatish har bir fuqaroning muhim vazifalaridan biri boʻlishi lozim. Xalqimizning isteʼmol madaniyatini oshirishda energiya samaradorligi va tejamkorlik masalasiga jamoatchilik eʼtiborini jalb etish har jihatdan maqsadga muvofiq sanaladi. Aks holda, energiya resurslaridan oqilona foydalanmaslik oqibatida kelgusida koʻplab muammolar yuzaga kelishi mumkin.
Tadbirda mutaxassislar tomonidan energotejamkor gaz isitish tizimi uskunalari, elektr energiyasi ishlab chiqaruvchi quyosh panellari va boshqa energotejamkor buyumlar taqdimot qilindi va ularning afzalliklari toʻgʻrisida batafsil axborot berildi.
Taʼkidlash joizki, insoniyat foydalanayotgan tabiiy energiya resurslari asta-sekin tugab boryapti, birlamchi yoqilgʻi-energetika resurslarini qazib olish va qayta ishlash xarajatlari oshib, ulardan oqilona foydalanmaslik atrof-muhitga salbiy taʼsir koʻrsatmoqda. Mamlakatimizda bu muammoning yechimi sifatida qurilishda innovatsion yondashuvlar asosida resurslardan samarali foydalanish ustuvor yoʻnalishlardan biriga aylangan.
Shubhasiz, energotejamkor gaz qurilmalari orqali nafaqat tabiiy gaz iqtisod qilinadi, balki isteʼmol uchun toʻlovlar qiymati ancha kamayadi. Shuningdek, zamonaviy qurilmalar yongʻin xavfining oldini olishda ham xizmat qiladi.
Maʼlumki, bugungi kunda energotejamkor uylar qurish muhim ahamiyatga ega hisoblanadi. Xonadonlarga, ijtimoiy obʼektlarga oʻrnatilgan quyosh panellari asosiy ehtiyojlardan biri boʻlgan yoritish chiroqlari, quvvatlash moslamalari, televizor va muzlatkich ishlashi uchun zarur elektr energiyasi bilan taʼminlaydi. Shuningdek, atrof-muhitga xavfsizligi sabab qayta tiklanadigan energiya manbalari tezlik bilan rivojlanmoqda.
Sir emaski, soʻnggi yillarda energiyani tejash nafaqat mamlakatimiz davlat siyosatining ustuvor yoʻnalishiga, balki butun dunyoda ham asosiy masalalardan biriga aylangan. Biz isteʼmolchi sifatida oʻz haq-huquqlarimizdan toʻliq foydalanishni istar ekanmiz, mamlakat fuqarosi sifatida energiya tejamkorligi va samaradorligi boʻyicha oʻz majburiyatlarimizni ham toʻla bajarishni unutmaylik. Zero, Bosh Qomusimizning 68-moddasida taʼkidlanganidek, yer, yer osti boyliklari, suv, oʻsimlik va hayvonot dunyosi hamda boshqa tabiiy resurslar umummilliy boylikdir, ulardan oqilona foydalanish zarur va ular davlat muhofazasidadir.
Shohzod Qurbonboyev
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
