NAMUNA MAHALLASINING NAMUNALI YoShLAR YeTAKChISI

Asli Amudaryo tumanining Namuna mahallasida tugʻilib-oʻsgan Shamshod Qurbonboyev oʻquvchilik davridayoq oʻzining namunali xulq-atvori, jamoat ishlarida faolligi bilan tengdoshlarining va ustozlarining eʼtiborini qozondi.

Umumtaʼlim maktabini muvaffaqiyatli tugatgan Shamshod Nukus davlat pedagogika institutining pedagogika-psixologiya fakultetida tahsil oldi. Ilk mehnat faoliyatini 2017-yilda Amudaryo tumani Maktabgacha va maktab taʼlimi boʻlimi tasarrufidagi 78-sonli umumtaʼlim maktabida yoshlar yetakchisi sifatida ishlashdan boshlagan Shamshod Qurbonboyev nafaqat oʻzi ishlayotgan pedagogika jamoasida, balki tuman miqyosida tashabbuskor va izlanuvchan, yoshlar hayotiga oid muammolarni hal etishda oʻziga xos tajribaga ega mutaxassis sifatida tanildi.

Maktabda oʻquvchilarning oʻqishdan boʻsh vaqtlarini mazmunli oʻtkazish, davomatini yaxshilash borasida amalga oshirgan saʼy-harakatlari bois, qisqa fursat ichida oʻz yoʻnalishi boʻyicha tuman maktablarida faoliyat olib boruvchi yoshlar yetakchilari orasida eng faol va tashabbuskor mutaxassisga aylandi. Qatorasiga 3-yil – 2018-2020-yillar davomida umumtaʼlim maktablari yoshlar yetakchilari oʻrtasida oʻtkazilgan “Eng namunali yoshlar yetakchisi” koʻrik-tanlovida tumanda faxrli 1-oʻrinni egalladi.

Bilimdon va izlanuvchan, yosh mutaxassislarning bilimi, tajribasi u qayerda, qaysi sohada ishlashidan qatʼiy nazar, nafaqat oʻzi ishlaydigan jamoa, balki xalq uchun ham manfaatlidir. 2022-yilning yanvar oyidan Namuna MFY yoshlar yetakchisi sifatida oʻz faoliyatini davom ettirgan Shamshod Qurbonboyevning ish koʻlami yanada kengaydi.

U avvalo mahalla yoshlarining hayoti, kasb-kori, turmush tarzi va qiziqishlari bilan yaqindan tanishdi. 527 ta xonadon tarkibidagi 719ta oilaga birma-bir kirib, 30 yoshgacha boʻlgan 1772 nafar yoshlarning roʻyxatini shakllantirdi. 14 yoshdan 30 yoshgacha boʻlgan 862 nafar yoshlar va oʻsmirlar bilan alohida suhbatlar tashkil etib, ularning qiziqishlari hamda intilishlarini qoʻllab-quvvatlashga qaratilgan chora-tadbirlar rejasini ishlab chiqdi.

Natijada 2021-yilda 168 nafar, 2022-yilda 57 nafar, 2023-yilda 90 nafar ijtimoiy himoyaga muhtoj yoshlar “Yoshlar daftari” roʻyxatiga kiritilib, ularni ijtimoiy qoʻllab-quvvatlash choralari koʻrildi. “Mahalla yettiligi” aʼzolari bilan hamkorlikdagi saʼy-harakatlar tufayli mazkur daftar roʻyxatiga kiritilgan yoshlar yil sayin kamayib, 2024-yilda bu raqam 7 nafarni tashkil etdi.

Shamshod Qurbonboyev uchun namunaliklar shunchaki mahalladoshlar emas, balki taqdirlari bir-biriga tutashgan qon-qarindoshlar kabi aziz insonlardir. Shu bois, u har bir ish kunini ana shu aziz insonlar, asosan yoshlar davrasida oʻtkazadi. Mahalla hududidagi taʼlim-tarbiya muassasalarida boʻlib, oʻquvchi-yoshlarning sababsiz dars qoldirishlarining oldini olishga qaratilgan maʼnaviy-maʼrifiy suhbatlar oʻtkazadi. Pedagogika jamoalari bilan hamkorlikda kitobxonlik kechalari, ”Besh tashabbus olimpiadasi” doirasida sinflararo, maktablararo va mahallalararo sport musobaqalarini tashkillashtirib, bu tadbirlar orqali yoshlarning darsdan boʻsh vaqtlarini mazmunli oʻtkazishlarini taʼminlaydi.

Mahalla yoshlar yetakchisining ish vaqti chegaralanmagan. Chunki kundalik ish faoliyatidan soʻng uyida, oilasi bagʻrida biroz hordiq chiqargan Shamshod Qurbonboyev deyarli har kuni kechqurun mahalla koʻchalarini birrov aylanib, hududdagi xususiy savdo-sotiq shoxobchalari atrofini koʻzdan kechirishga odatlangan.

– Ota-onalari yoki ularning oʻrnini bosuvchi shaxslar nazoratisiz bunday tadbirkorlik shoxobchalari atrofida oʻsmir bolalarning oʻralashib yurishi ularning tarbiyasiga salbiy taʼsir qilmay qolmaydi. – deydi Shamshod. – Shuning uchun biz kattalar doimo ogoh boʻlishimiz kerak.

Hududdagi uyushmagan yoshlar, xorij davlatlarida ishlab qaytgan yoshlar bilan ishlashish Shamshod Qurbonboyev uchun doimiy dolzarb masala. Ayniqsa, xorij davlatlaridan qaytgan yoshlarni tibbiy koʻrikdan oʻtkazish, ishsiz yoshlarni oʻz qobiliyatlariga muvofiq kasb-korga oʻqitish, oʻzini-oʻzi band qilish tamoyili asosida ijtimoiy foydali mehnatga jalb etish borasida amalga oshirilgan chora-tadbirlar natijasida mahalla yoshlarining bandligi taʼminlanayotganidan namunaliklar mamnun.

Ayni kunlarda esa mahallada ishsiz, bekorchi odamning oʻzi yoʻq. Vaqtincha ishsiz yoshlardan tuzilgan koʻngilli hasharchilar brigadasi tarkibida hududdagi fermer xoʻjaliklari dalalarida paxta yigʻim-terimida dehqonlarga qoʻl-qanot boʻlayotgan yoshlar har kuni tergan paxtasi uchun kamida 60-70 ming soʻm, hatto undan ham koʻproq ish haqi olishayotganidan mamnun.

Shamshod Qurbonboyev esa mahalla yoshlarining hayotiga oʻzgarishlar olib kirish, ularning ijtimoiy faolligini oshirish, doimiy daromad manbaiga ega, farovon turmush kechirishlarini taʼminlash yoʻlida hamisha safarbar. Zero, mahalla yoshlaring hayotdan rozi yashashlari, turmushlari farovon boʻlishi uchun fidoyi mehnat qilish, nainki uning kasbiy masʼuliyati, balki insoniy burchi hamdir.

Robiya Yoʻldosheva.