FAVQULODDA VAZIYaTLAR VAZIRLIGI FAXRIYLARI IShTIROKIDA “UCh AVLOD UChRAShUVI” TADBIRI OʻTKAZILDI

Yer sayyorasida global iqlim oʻzgarishlari avj olayotgan, insoniyat deyarli har kuni turli ekologik falokatlarga duch kelayotgan bir davrda aholini yuz berishi mumkin boʻlgan xavf-xatarlardan ishonchli himoya qilish Favqulodda vaziyatlar vazirligi xodimlari zimmasidagi masʼuliyatni yanada oshiradi. Chunki soha xodimlarining ogohligi, yuksak bilim va taktik mahorati bilangina har qanday xavf-xatarning oldi olinadi.

Shu bois, soha xodimlarining bilim va mahoratini tizimli ravishda oshirib borish bilan birga olingan bilimlarni amaliyotda qoʻllash, aholi, ayniqsa, oʻsib kelayotgan yosh avlodga favqulodda vaziyatlar sodir boʻlganda qanday harakatlanish haqida kerakli maʼlumotlar berish, mazkur sohaga qiziquvchi yoshlar bilan maʼrifiy suhbatlar tashkil etishga alohida eʼtibor qaratiladi. Bu borada Qoraqalpogʻiston Respublikasi Favqulodda vaziyatlar boshqarmasining Amudaryo tuman boʻlimi tomonidan amalga oshirilayotgan maʼnaviy-maʼrifiy tadbirlar ham ahamiyatga molik.

Yaqinda Amudaryo tuman madaniyat boʻlimi binosida Qoraqalpogʻiston Respublikasi Favqulodda vaziyatlar boshqarmasi Faxriylar Kengashi raisi boshchiligida boʻlib oʻtgan “Uch avlod uchrashuvi” tarzidagi maʼnaviy-maʼrifiy tadbir ham ishtirokchilarning bilim va koʻnikmalarini yanada oshirishga xizmat qilgani bilan ahamiyatli boʻldi.

Qoraqalpogʻiston Respublikasi Favqulodda vaziyatlar boshqarmasining ish rejasiga asosan favqulodda vaziyatlarda aholini ishonchli muhofaza qilish, oʻsib kelayotgan yosh avlodni Favqulodda vaziyatlar sohasiga qiziqtirish maqsadida tashkil qilingan uchrashuvda Amudaryo tuman Favqulodda vaziyatlar boʻlimi xodimlari, mazkur boʻlimda uzoq yillar ishlab nafaqaga chiqqan isteʼfodagi xodimlar Otamurod Oʻrozaliyev, Baxtiyor Qoʻshboyevlar hamda tumanning turli mahallalaridan tashrif buyurgan ushmagan yoshlar va umumtaʼlim maktablarining yuqori sinf oʻquvchilari ishtirok etdilar.

Tadbir avvalida Qoraqalpogʻiston Respublikasi Favaqulodda vaziyatlar boshqarmasi Faxriylar kengashi raisi, isteʼfodagi podpolkovnik Tohir Yoʻldoshev ishtirokchilarga mamlakatimizdagi favqulodda vaziyatlar sohasi boʻyicha yuqori malakali mutaxassislar tayyorlovchi oʻrta maxsus va oliy oʻquv yurtlari toʻgʻrisida batafsil maʼlumotlar hamda favqulodda vaziyatlar xodimlarining zimmalaridagi burch va masʼuliyatlari xususida keng tushunchalar berdi.

Uchrashuvda Favqulodda vaziyatlar sohasi faxriylari Otamurod Oʻrozaliyev va Baxtiyor Qoʻshboyevlar oʻz kasbiy faoliyatlari davomida sodir boʻlgan voqea-hodisalar, murakkab vaziyatlarda amalga oshirgan ishlari haqida yoshlarga qiziqarli hikoyalar aytib berishib, xalqimizni favqulodda vaziyatlarda ishonchli himoya qilish, ularning salomatligi, mol-mulki daxlsizligini muhofaza etish soha vakillarining burchi ekanligini taʼkidladilar va yoshlarni ushbu kasb egasi boʻlishga daʼvat etdilar.

Oʻz navbatida mazkur sohaga qiziquvchi yoshlar ham masʼullarga savollar bilan murojaat qildilar. Yoshlarni qiziqtirgan savollarga masʼullar batafsil javoblar berish bilan birga, favqulodda vaziyatlar xodimi boʻlish shunchaki oddiy kasb emas, ayniqsa, yosh yigit-qizlar, har bir inson uchun nihoyatda sharafli ekanligini, favqulodda vaziyatlar xodimi oʻz kasbiy faoliyatini amalga oshirish orqali nafaqat xalqini, balki ona Vatanini tabiiy va texnogen tusdagi ofatlardan himoya qilishini, bu orqali el-yurt farovonligi, mamlakatimizning ijtimoiy-iqtisodiy jihatdan taraqqiyotini taʼminlashga munosib hissa qoʻshishini taʼkidladilar.

Samimiy muloqot va qiziqarli savol-javoblar bilan oʻtgan “Uch avlod uchrashuvi” tadbiri yakunida bir guruh yoshlar kelgusida Favqulodda vaziyatlar Vazirligi tizimida oʻqish istagini bildirdilar.

Robiya Yoʻldosheva