ZIMMAMIZDAGI MUQADDAS BURCh
Alloh taoloning yaratgan maxluqotlari ichida eng aziz va mukarrami inson zoti ekan, uning yoshi ham, qarisi ham, ayoli ham, erkagi ham birdek qadr-qimmatga egadir. Islom dini inson qadrini shu darajada yuqori koʻtarganki, hatto uning tirigi bilan oʻligining hurmati birdek qadrlanadi.
Alloh taologa beadad hamdu sanolar aytamizki, mana bugun ulugʻ ajdodlarimiz orzu qilgan buyuk neʼmat - Vatan ozodligi va mustaqilligiga erishilgan nurli kunlarga yetib keldik. Istiqlol yillarida ulugʻ ajdodlar xotirasini qadrlash, mamlakat taraqqiyoti, yurt ozodligi yoʻlida jonbozlik koʻrsatgan fidoyi yurtdoshlarimiz ruhini shod etmoq uchun ezgu amallarga bel bogʻlashdek savob yumush dilimizdagi yorugʻ niyatlardan biriga aylandi.
Davlatimiz rahbarining tashabbuslari va gʻoyalari asosida, mana bir necha yildirki, 9-may - Xotira va qadrlash kuni sifatida keng nishonlanmoqda. Bu kun nafaqat jang maydonlarida shahid boʻlganlarni xotirlash, balki front ortida fidokorona mehnat qilgan tabarruk yoshdagi otalarimiz va onalarimizga ham cheksiz izzat va ehtirom koʻrsatish ayyomidir. Shuningdek, ona Vatanimizningtaraqqiyotiga munosib ulushlar qoʻshgan barcha faxriylarimizni eʼzozlash, qadrlash bayramidir.
Albatta, biz hamisha marhumlarimizni yodga olib, ularning ruhlarini shod qilish uchun savobli amallarni bajaramiz, shu jumladan Qurʼoni karim oyatlaridan tilovatlar qilib, ularning ruhlariga bagʻishlaymiz. Zero, oʻtganlarni eslash va ularga istigʻfor aytish, qabrlarini ziyorat qilish va ularning haqlariga duolar qilish barchamizning insoniy burchimizdir.
Agar biz musulmonlar ajdodlarimiz ruhlarini shod etish maqsadida ularni qanchalik koʻp xotirlasak, farzandlarimiz ham bundan yaxshi ibrat oladilar. Zero, ular ham bizlarni shunday xotirlab, duoyi xayrlarda boʻlishadi. Paygʻambarimiz (s.a.v) bunday deganlar: "Agar bir inson vafot qilsa, uning amali toʻxtaydi. Faqatgina uchta narsadan unga foyda yetib turadi: (qoldirib ketgan) sadaqai joriya yoki foydali ilm yoxud haqiga duo qilib turadigan solih farzandlaridan”.
Davlatimiz doim urush qatnashchilari, keksa yoshdagi otaxonlarimiz, onaxonlarimizga katta eʼtibor bilan gʻamxoʻrlik qilib kelmoqda. Hukumatimiz keksalarning moddiy farovonliklarini yanada yaxshilash maqsadida bir qator qarorlar qabul qildiki, bu barchani xursand etdi. Prezidentimizning "1941-1945-yillardagi urush qatnashchilarini ragʻbatlantirish toʻgʻrisida”gi Farmoni hamda muhtaram Yurtboshimizning: "Xotira - nafaqat oʻtmishni unutmaslik, balki bugungi hayotimizning qadriga yetish, ertangi kunni toʻgʻri tasavvur etish, demakdir. Xotira - insonni kelajakka ochiq koʻz bilan qarashga oʻrgatadi. Shu bois, bugungi yoshlar otalarimizning yurtimiz erki va ozodligi, millatimiz ravnaqi yoʻlida chekkan zahmatlari, koʻrsatgan jasoratlarini unutmasligi darkor. Qadrlash esa, xonadonlarimizga fayz-baraka bagʻishlab, qilayotgan ezgu ishlarimizga oq fotiha tilab oʻtirgan qariyalarimizning hurmatini joyiga qoʻyishdir. Zero, moʻʼtabar otaxon va onaxonlarimizni hayotligida qadrlash barchamizning muqaddas burchimizdir”, - degan purmaʼno soʻzlari barchaning qalbiga quvonch bagʻishladi.
Alloh taolo barcha marhum ajdodlarimizni oʻzining rahmatiga olib, ularning haqlariga qilayotgan duolarimizni ijobat qilib, tiriklarga farovon hayot, tinchlik-xotirjamlik ato etishini soʻrab qolamiz!.
Abdurahmon Matsapoyev,
"Yusuf eshon bobo”
jomeʼ masjidi imom-xatibi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
