TAASSUROTLARGA BOY MAShFULOT
Mart oyi mamlakatimizdagi barcha oʻrta maxsus, kasb-hunar taʼlimi muassasalari va akademik litseylarda fizika fani oyligi hisoblanadi. Shu munosabat bilan fizika fanini chuqur oʻqitish va mazkur fanga oʻquvchilarning qiziqishlarini oshirish maqsadida turli tadbirlar oʻtkazilmoqda.
4-mart kuni 3-sonli Amudaryo akademik litseyida ham oylik doirasida litsey va Ajiniyoz nomidagi Nukus Davlat pedagogika institutining "Fizikani oʻqitish metodikasi” kafedrasi oʻrtasida tuzilgan oʻzaro hamkorlik shartnomasi ish rejasiga muvofiq, shu kafedra dotsenti Bahrom Yavidov muassasaning aniq fanlar yoʻnalishi oʻquvchilari va oʻqituvchilari bilan uchrashdi hamda Italiyaning Triyest shahridagi nazariy fizikaning xalqaro markazida olib borilayotgan tadqiqot ishlari mavzusida seminar oʻtkazdi.
Shuningdek, mazkur yoʻnalishning 3-bosqich iqtidorli oʻquvchilari uchun "Fizikadan masalalar yechish usullari” mavzusida dars oʻtdi.
Aytish joizki, mazkur maskanda fizika faniga qiziquvchi, fan asoslarini chuqur oʻrganishga intiluvchi oʻquvchilar koʻpchilikni tashkil etadi. Ular dars mashgʻulotlarini puxta oʻzlashtiribgina qolmay, ustozlari koʻmagida fanga doir qoʻshimcha qoʻllanmalarni ham oʻzlashtirib, bilim doirasini kengaytirib borishga intiladilar.
NDPI "Fizikani oʻqitish metodikasi” kafedrasi dotsenti, mangʻitlik ilm fidoyisi Bahrom Yavidovning oʻtkazgan darsi yoshlarning bu fanga qiziqishlarini yanada oshirdi. Fizikani dunyo miqyosida eng ommalashgan xalqaro tillarning biri – ingliz tilida mukammal oʻrganish imkoniyatlari koʻpligi bois, bu fanni ham puxta oʻrganishga chaqirdi. Bu oʻquvchilarga eng nufuzli xorij oliygohlariga oʻqishga kirish imkonini ham berishi taʼkidlandi.
Dars mashgʻuloti soʻngida B.Yavidov oʻquvchilarni qiziqtirgan savollarga batafsil javob qaytardi va dars mobaynidagi oʻquvchilarning faolligiga yuqori baho berdi.
Oliygoh dotsenti oʻtkazgan dars mazkur muassasani bitkazish arafasidagi va oliygohlarga kirish davlat test sinovlariga puxta hozirlik koʻrayotgan oʻquvchilarni oʻz orzulari sari dadil intilishga chorladi.
Surayyo NORBOYeVA, litseyning fizika fani oʻqituvchisi.
(Foto - http://11-maktab.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
