“MAʼNAVIYaT KUNI” DOIRASIDAGI TADBIR QIZIQARLI TAASSUROTLARGA BOY BOʻLDI

Yoshlarni bilimli, yuksak maʼnaviyatli va axloqli insonlar qilib tarbiyalashda kitobning ahamiyati nihoyatda kattaligini buyuk ajdodlarimiz – Abu Rayhon Beruniy, Al Xorazmiy, Abu Ali Ibn Sino, Mir Alisher Navoiy, Choʻlpon, Fitrat kabi ulugʻ salaflar oʻz zamonalarida alohida eʼtirof etishgan. Buyuk sarkarda, davlat va jamoat arbobi Amir Temur bobomiz esa nafaqat podshohlik saroyida, balki mamlakatning har bitta kent va rabotida kutubxonalar ochib, mamlakat yoshlarini kitob mutolaasiga daʼvat etganlar.

Bugungi globallashuv jarayonida yoshlarni kuchli tafakkur egalari, bilimdon va salohiyatli insonlar qilib tarbiyalashda ajdodlarimizdan meros bu maʼnaviy qadriyat davlatimizning ustuvor siyosatiga aylangan.

Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondi tomonidan eʼlon qilingan tanlovning “Najot – taʼlimda, najot – tarbiyada, najot - bilimda” yoʻnalishida “Bilimli va maʼnaviyatli yoshlar bilan – Uchinchi Renessans sari” loyihasi bilan ishtirok etib, tanlov granti sohibi boʻlgan “Taraqqiyot koʻzgusi” gazetasi tahririyati ijodiy jamoasi tomonidan mazkur loyiha doirasida amalga oshirilayotgan maʼnaviy-maʼrifiy tadbirlar muhim ahamiyat kasb etmoqda. Xususan, yoshlarni kitobxonlikka keng jalb etishga qaratilgan insholar tanlovlari, kitob haftaliklari, “Kitobxonlik va mutolaa madaniyati haftaligi”, “Kitob sayllari”, Amudaryo televideniyesi bilan hamkorlikdagi “Kitobxon yoshlar” koʻrsatuvi, “Eng yaxshi sovgʻa - kitob”, “Farzandimga kitob sovgʻa qilaman” aktsiyalari tashkil etilib, bu kabi tadbirlarga tumanning barcha hududlaridagi taʼlim-tarbiya muassasalari oʻquvchi-yoshlari va kitobxon oilalar keng qamrab olinmoqda.

“Maʼnaviyat kuni” doirasida tumanning 1-sektori hududidagi taʼlim-tarbiya ishlari yaxshi yoʻlga qoʻyilgan 82-sonli umumtaʼlim maktabida boʻlib oʻtgan taniqli yozuvchi va shoirlar hamda tajribali pedagoglar ishtirokidagi davra suhbatida ham yoshlar kitobxonligini rivojlantirish, ularni mutolaa madaniyatiga amal qilishga daʼvat etish, tajribali oʻqituvchilarning oʻz oʻquvchilari bilan birgalikda hozirgi zamon va mumtoz oʻzbek adabiyoti durdonalarini mutolaa qilish va yoshlarning oʻqigan asarlari mazmun-mohiyati yuzasidan fikrlarini erkin ifoda etishlariga alohida eʼtibor qaratildi.

Tadbirda mazkur maktabning tajribali mutaxassis oʻqituvchilari, oʻz qiziqishlari va xohishlari bilan aʼlochi va kitobxon yoshlari ishtirok etishdi. Shuningdek, tadbir mehmonlari – Oʻzbekiston Yozuvchilar uyushmasi aʼzosi, yozuvchi Tursunboy Abdullayev, Oʻzbekiston Yozuvchilar va Jurnalistlari ijodiy uyushmalari aʼzosi, Qoraqalpogʻiston Respublikasida xizmat koʻrsatgan jurnalist, shoira Robiya Yoʻldosheva, tumandagi 27-sonli maktabning musiqa fani oʻqituvchisi, shoir Adilboy Ametovlar kitobxon yoshlar hamda ularning ustozlari bilan dildan, samimiy suhbat qurdilar.

- Kitob – insonga nafaqat maʼnaviy ruh bagʻishlaydi, - balki uni tarbiyalaydi, kamolotga yetkazadi, - dedi ustoz yozuvchi Tursunboy Abdullayev. – Inson qanchalik boy-badavlat boʻlmasin, uni boyligi emas, balki bitta yaxshi kitobdan olgan maʼnaviy ozigʻi butun umr badavlat, el ichra suyukli, hurmatli inson sifatida shakllantiradi. Mening siz azizlarga doʻstona maslahatim shuki, sizlarning eng sevimli mashgʻulotingiz – mutolaa, eng qadrli maskaningiz maktab va kutubxona, orzularingiz – taʼlim va yana taʼlim boʻlsin.

Tadbir davomida “Bilimli va maʼnaviyatli yoshlar bilan – Uchinchi Renessans sari” grant loyihasi koordinatori, shoira Robiya Yoʻldosheva oʻzining shaxs sifatida shakllanishida bilim olishga boʻlgan intilishida, kitobxonlikning juda katta ahamiyatga ega boʻlganini hayotiy misollar tariqasida hikoya qilib berdi.

- Maktabimizda oʻquvchi-yoshlarning bilim olishlari, xorijiy tillarni oʻrganishlari, oʻz iqtidorlarini namoyon etishlari uchun barcha zarur sharoitlar yaratilgan, - dedi maktab oʻqituvchilaridan Sevara Boltaboyeva. – Yoshlarning kitobga ilmga intilishlari, erishayotgan yutuqlarimizda ham namoyon.

Darvoqe, maktabda bugungi kunda 532 nafar oʻquvchiga 48 nafar malakali pedagoglar, ilm sirlarini qunt bilan oʻrgatishmoqda. Oʻqituvchilarning 12 nafari oliy va 1-toifali, 6 nafari 2-toifali, qolganlari esa maxsus mutaxassislikka ega tajribali fan oʻqituvchilaridir. Sobiq Iqtisod kolleji negizida tashkil etilgan 82-sonli maktabning 2023-2024 oʻquv yilida ilk bitiruvchilari mustaqil hayotga yoʻllanma olishadi. 2023-2024 oʻquv yili fanlar olimpiadasida maktab oʻquvchilari rus tili va matematika fanlari boʻyicha tuman va respublika bosqichlarida muvaffaqiyatli ishtirok etishdi. Iqtidorli oʻquvchi Mashhuraxon Rajabovaning esa ilk sheʼrlar toʻplami “Taraqqiyot koʻzgusi gazetasi” nashriyotida chop etildi.

- Haqiqatan ham ajdodlarimiz najot – taʼlim-tarbiyada, deb bejiz aytishmagan, - oʻz fikrini bildirdi tajribali pedagoglardan Dildoraxon Xolboyeva. – Bola oʻqib-izlanishga qanchalik mehr qoʻysa, u shunchalik salohiyatli, maʼnan va axloqan yetuk inson boʻlib voyaga yetadi. Bizning vazifamiz esa oʻquvchini turli yot gʻoyalarga berilib ketishidan himoya qilish. Himoya vositasi esa – kitob, taʼlim va bilim.

Yozuvchi-shoirlar va pedagoglar bilan suhbat jarayonida mushoira ham qizidi. Tursunboy Abdullayevning milliy-maʼnaviy qadriyatlarimizni oʻzida mujassam etgan termalari, yoshlar iltimosiga koʻra, kelin salomlarini ijod etishdagi izlanishlari, yozuvchi va shoir ogʻamizning “Salomchi” atamasini oʻziga “unvon” sifatida qabul qilib olgani haqidagi qiziqarli hikoyalari barchaga zavq-shavq bagʻishladi. Navbatma-navbat Tursunboy Abdullayev, Adilboy Ametov va iqtidorli shoira Mashhuraxon Rajabovalar oʻz sheʼrlaridan namunalar oʻqib berdilar.

Tadbir yakunida Tursunboy Abdullayev 82-sonli maktab oʻqituvchilari va oʻquvchi-yoshlariga ham sheʼriy salom bagʻishladi. Albatta, bundan tadbir ishtirokchilari ham bahramand boʻldilar.

“Maʼnaviyat kuni” doirasida tumanimiz ijodkorlari va 82-sonli maktabning tajribali pedagoglari hamda kitobxon yoshlari, ishtirokida boʻlib oʻtgan suhbat qiziqarli taassurotlarga boy boʻldi.

Robiya YOʻLDOShEVA, Mahmudjon ShOMURODOV.