ULUGʻ BOBOMIZ – FAXRIMIZ

Sohibqiron bobomiz Amir Temur 1336-yilning 9-aprelida Keshda tugʻiladi. Yoshligidan chavandozlikka, ov qilishga ishqiboz boʻlib, kamondan nishonga oʻq otish, ot choptirib, turli mashq va harbiy oʻyinlar bilan mashgʻul boʻlishni yoqtirgan. Shu asnoda u dovyurak, mohir chavandoz boʻlib yetishdi va oʻz mulkini moʻgʻullar tajovuzidan qutqardi. "Anqara jangi”, "Loy jangi”da ham gʻolibona harakat qilib, dushmanni magʻlub etdi, unga taniqli ulamo, oʻz piri Said Baraka Oliy hokimiyat ramzi - tabl bilan yalov (bayroq)ni tortiq qilib, uning buyuk kelajagidan bashorat qiladi. Bu, shubhasiz buyuk saltanat ramzi edi.

Amir Temur mashhur davlat arbobi, mohir sarkarda sifatida oʻzbek davlatchiligi yuksalishida muhim oʻrin tutadi. Tarixiy manbalarda sohibqiron Amir Temur nomi bilan bir qatorda "Sohibi jahon” hamda "Sohibi adl” – "Adolat sohibi” nomlari bilan ulugʻlangan. U oʻzining davlat boshqarish uslubiga bagʻishlangan maxsus asar yaratib, uni "Temur tuzuklari” deb atadi. Amir Temurning: "davlat ishlarining toʻqqiz ulushini kengash, tadbir va mashvarat, qolgan bir ulushini qilich bilan amalga oshirdim”, "Kuch - adolatdadur”, degan soʻzlari uning mamlakatni aql-zakovat va adolat bilan boshqarganligidan guvohlik beradi.

Mamlakatimizda A.Temur dahosiga katta hurmat koʻrsatiladi. Jumladan, 1996 yil "Amir Temur” yili deb eʼlon qilindi, Shahrisabz, Samarqand, Toshkentda haykallari oʻrnatildi. Ayniqsa, mamlakatimiz poytaxtida bunyod etilgan Temuriylar tarixi davlat muzeyi faxr-uiftixorga molik meʼmoriy yodgorligimizdir. Bu yil sohibqiron bobomizning 680 yilligini keng nishonlaymiz.

Mahliyo RAHIMBOYeVA, Amudaryo akademik litseyi oʻquvchisi.