“Biz — buyuk yurt farzandlarimiz!”

2016-yil 17-aprel kuni tumanimizda mamlakatimiz mustaqilligining 25 yilligiga bagʻishlanib "Biz — buyuk yurt farzandlarimiz!” shiori ostidagi yoshlar festivali oʻtkazildi. Festival yoshlarni mamlakatimizda mustaqillik yillarida erishilgan yutuqlar, demokratik oʻzgarishlar bilan yaqindan tanishtirish, ularda Vatan taqdiriga nisbatan daxldorlik va shukronalik tuygʻusini shakllantirish, oʻsib kelayotgan yosh avlodni "ommaviy madaniyat”ning zararli taʼsiridan saqlash, kelajagimiz egalarini milliy qadriyatlarimizga hurmat va sadoqat ruhida tarbiyalash maqsadida tashkil qilindi.

Tumanimizning minglab yoshlari qamrab olingan festival doirasidagi tadbirlarda Oʻzbekistonda xizmat koʻrsatgan artist Zuhra Ashurova, xonanda Toshpoʻlat Matkarimov, aktyor Umid Shodmonov, OʻzR FA fizika instituti ilmiy xodimi Azizbek Boltaboyev, Yoshlar media markazi xodimi Oʻtkir Noʻʼmonov va boshqalar ishtirok etishdi.

Dastlab Amudaryo akademik litseyida "Odam savdosi – davr muammosi”, "Diniy ekstremizm va terrorizm – yoshlar kelajagiga tahdid” loyihalari doirasida yoshlar ishtirokida uchrashuv boʻlib oʻtdi.

Uchrashuvda inson, uning shaʼni, qadr-qimmati, osoyishta turmushi hamda kelajagiga tahdid solayotgan odam savdosi va yot gʻoyalar taʼsiridan yoshlarni asrash, ularni sogʻlom eʼtiqod va milliy qadriyatlarga sodiqlik ruhida tarbiyalash hamda turli diniy oqimlar taʼsiridan asrash mavzularida maʼruzalar tinglandi.

9-sonli Bolalar musiqa va sanʼat maktabida "Siz sevgan qahramonlar” loyihasi doirasida yoshlarning kino va teatr aktyorlari hamda estrada xonandalari bilan ijodiy uchrashuvi oʻtkazildi.

Uchrashuvda soʻz olganlar davlatimiz tomonidan yoshlarga yaratib berilgan imkoniyatlar, shart-sharoitlar haqida toʻxtalib, yoshlarni ona Vatanimiz ravnaqi yoʻlida sidqidildan xizmat qilishga chorladi. Ishtirokchilar sevimli qahramonlariga hayoti va ijodiy faoliyatiga oid savollar bilan murojaat qildilar va tegishli javoblar oldilar.

Mangʻit iqtisodiyot kasb-hunar kollejida "Zamonamiz qahramonlari” loyihasi doirasida turli sohalarda yutuqlarga erishgan yoshlar, davlat mukofotlari sohiblari ishtirokida uchrashuvlar oʻtkazildi.

Uchrashuvda Vatanimiz ishonchi, el-yurt suyanchi boʻlmish iqtidorli yoshlar oʻzlariga qaratilayotgan eʼtibor va yaratib berilayotgan imkoniyatlar uchun Yurtboshimizga minnatdorchilik bildirdilar.

"Nuroniylar eʼzozimizda” loyihasi doirasida esa patronaj yoshlar guruhlari tomonidan tumanimizning 5 ta hududida yashovchi 5 nafar urush qatnashchilari va mehnat fronti faxriylari, yolgʻiz qariyalar va nogiron keksalar holidan xabar olinib, ularning uy yumushlariga koʻmaklashildi. Festival mehmonlari ham nuroniylarning oilalariga tashrif buyurib, ularga esdalik sovgʻalari topshirdilar va duolarini oldilar.

Bundan tashqari, 300 nafar tumanimiz yoshlari Ellikqalʼa tumanida oʻtkazilgan yakuniy gala-kontsertda ishtirok etib qaytishdi.

Yoshlarni yurt istiqboli yoʻlida birlashtirish, ularni yanada yuksak marralar sari chorlash maqsadida tashkil qilingan festival, uning doirasida oʻtkazilgan barcha tadbirlar ishtirokchilarda olam-olam taassurotlar qoldirdi.

Gʻ.Yeshniyozov