BIR KELIB KETING QIShLOGʻIMIZGA...

Men Qilichboy elining farzandiman. Bizning qishlogʻimiz taʼrifini bu atrofda eshitmagan inson yoʻq, nazarimda. Qishlogʻimizda turli xil inshootlar qurilmoqda. Jumladan, men oʻzim tahsil olgan 15-sonli maktab kapital taʼmirdan chiqarilib, zamonaviy oʻquv qurollari bilan jihozlanganiga koʻp boʻlgani yoʻq.

Bu maktabda bir-biridan bilimdon, kelajagimiz egalari boʻlgan iqtidorli yoshlar tahsil olmoqda.

Elimizning dehqonlari tufayli xirmonimiz but, dasturxonimiz toʻkin. Bogʻbon bobomiz qishda kelsangiz  ham sizni uzum bilan siylaydi. Tomorqalarimizda tilyorar qovunlardan tortib, mevasi shirin-shakar oʻrik, olma, nok, gilos, olcha bisyor.

Fermerlarimiz esa har yili qanchadan-qancha gʻalla yetishtirishadi va albatta, undan moʻl hosil olishadi.

Qilichboy hududidan chegaradosh davlat hisoblangan Turkmaniston Respublikasiga tomon "Qilichboy arna” kanali oqib oʻtgan. Aytishlaricha, bu kanalni qadimda Qilichniyoz bobo qazdirgan va butun xalqni suv bilan taʼminlagan ekanlar. "Qilichboy arna” kanali daryo kabi toʻlib-toshib oqmoqda.

Bundan tashqari, qishlogʻimizda shifoxona ham mavjud boʻlib, bu  yerda Z.Oʻrozmetova, R.Kenjayev va boshqa tajribali shifokorlar bizning sogʻligimiz uchun kun-u tun ter toʻkib mehnat qilishmoqda.

Qishlogʻimizda oʻz davrining yetuk sanʼatkorlaridan Qoraqalpogʻistonda xizmat koʻrsatgan artist Nazir qori Rahimovning nevarasi Ikrom Siytimov yashab, ijod qiladi. Tumanimizda Ikrom Siytimovning "Mangʻitim”, "Armon” "Qizgina” va boshqa qoʻshiqlari kirib bormagan xonadon  boʻlmasa kerak.

Qishlogʻimizdagi yoshi katta buvajon-u, buvijonlarimiz hayot yoʻli bizga hamisha oʻrnak. Ulardan biri mening buvijonim Oyjon Yoʻldosheva boʻladilar. Buvim 2006-yili "Oʻzbekiston mustaqilligiga 15-yil” koʻkrak nishoni bilan taqdirlandilar. 2008-yilda "Qoraqalpogʻiston Respublikasida hizmat koʻrsatgan pillakor” faxriy unvoni berildi.

2013-yilda esa pillachilik sohasidagi katta xizmatlari tufayli "Neksiya” avtomobili bilan mukofotlandi.

Qishlogʻimiz ahli mehridaryo, mehmondoʻst, yoshlari iqtidorli, bilimli, dono, har bir ishda epchil hamda chaqqon.

Qishlogʻimiz Qilichboy,

Hurlikdan ochgan chiroy.

Odamlari mehri daryo,

Havosi zoʻr, tanga davo.

Sayrar qushlar xushnavo,

Qilichboyga marhabo!

Yulduzxon YoQUBOVA,

Amudaryo akademik litseyi oʻquvchisi.