XOTIRALAR TILGA KIRGAN LAHZALAR

Yaqinda 1996-yilda 38-maktabni tamomlagan sobiq oʻquvchilar oʻzlari taʼlim olgan jonajon maktabi bagʻrida uchrashdilar. Ular mustaqil hayotga qadam qoʻyib, hayot yoʻllari har qaysisini har yoqqa eltmasin, oralaridagi doʻstlik, mehr-oqibat, el koriga yarash, hayotda oʻz oʻrinlarini topishdek ezgu maqsadlar ularni doim birlashtirib turadi, tez-tez bir-birini yoʻqlab turadilar, diydorlashishdan quvonadilar. Ammo maktabni birga bitirgan toʻrt sinf oʻquvchilarining aynan maktab bagʻrida jamuljam boʻlib uchrashishi, aziz ustozlarining ham diydorini koʻrish baxti, hayajoni oʻzgacha boʻldi.

Sobiq sinf rahbari, hozirgi kunda 36-sonli maktabning ilmiy ishlar boʻyicha direktor oʻrinbosari Poshsha Omonova, sobiq sinf rahbarlari Maryam Kamolova, shuningdek Saragul Xudoyberganova, ayni kunda Mangʻit Iqtisodiyot kolleji oʻqituvchisi Maxsuda Polvonovalarning oʻquvchilarni sinfxonada kutib olib yoʻqlama qilishi, "Diydorlashuv” deb nomlangan darsni oʻtish lahzalari, ayniqsa hayajonlarga boy boʻldi. Ustozlar va shogirdlar 20-yil oldingi hayotiga qaytgandek boʻlishdi. Garchi sobiq oʻquvchilar bugungi kunda turli kasb egalari boʻlib faoliyat yuritayotgan boʻlsalar-da, ustozlari sabogʻini, tilaklarini koʻngillarida saqlab yurganliklarini izhor  etishdi, aynan oʻquvchilik davrida olgan bilimlari hayotda juda qoʻl kelganini taʼkidlashdi.

20 yillik xotiralar, dil izhorlari, diydor quvonchi  bilan oʻtgan uchrashuv har bir sobiq oʻquvchining, ustozlarning koʻngillarida oʻchmas taassurotlar qoldirdi.

Xolbika DURDIYeVA,

38-sonli maktab  oʻqituvchisi.