“ORASTA QIZLAR” – SARIShTALIK VA FAROVONLIK TARGʻIBOTChILARI

Tumanimizning 76 ta umumtaʼlim maktabida,  akademik litsey va 8 ta kasb-hunar kollejlarida jamoatchilik asosida faoliyat olib boruvchi "Orasta qizlar”, toʻgaragi tashkil etilgan boʻlib, bu toʻgaraklarda qizlarni mustaqil hayotga tayyorlash asnosida ozodalik, orastalik, shaxsiy  gigiyenaga, sogʻlom turmush tarziga amal qilishga oʻrgatish hamda maʼnaviy dunyoqarashini shakllantirish nazarda tutilgan. Voyaga yetmagan qizlar orasida erta turmush va tugʻruqlarning oldini olish, sogʻlom turmush tarzini  targʻib qilish "Orasta qizlar” toʻgaragi rahbari va aʼzolarining muhim vazifasidir. Bu toʻgaraklarga faol qizlar aʼzo boʻlib, tengdoshlari oʻrtasida tashviqot-targʻibot ishlarini olib borishmoqda.

Shuningdek, yoshlarni 12-yillik majburiy taʼlim jarayoniga qamrab olish, oilaviy hayotga tayyorlash, erta tugʻish va erta turmushga berish holatlarining, oilalar buzilishining oldini olishda hamkorlik tizimi yaratildi.

Avval umumtaʼlim maktablarida, soʻng akademik litsey, kasb-hunar kollejlarida "Orasta qizlar” toʻgaraklari tashkil etilgan boʻlsa, ayni kunda  bu toʻgaraklar faoliyati keng koʻlam kasb etib, mahalla tizimiga ham olib kirildi va yagona reja asosida faoliyat koʻrsatmoqda. "Orasta qizlar”  toʻgaragida shifokorlar, tajribali uy bekalari, koʻpni koʻrgan onaxonlar qizlarga ozodalik "Alifbe”sini oʻrgatish bilan toʻgarak mashgʻulotlarini boshlagan boʻlsalar, bugunga kelib, ushbu toʻgarak aʼzolari orqali  mahallalarga va xonadonlarga orastalik va pokizalikni olib kirdilar.

Ozodalik, sanitariya-gigiyena qoidalariga amal qilishdek  ezgu niyatlar bilan tumanimizdagi taʼlim muassasalarida va mahallalarda  tashkillashtirilgan oqila qizlarning "Orasta qizlar” toʻgaragi    juda tez ommalashdi.

Nihoyatda noyob boylik boʻlgan suvni, elektr nurini qadrlamaslik, chiqindi bilan atrof-muhit havosini buzish yoki davlat mulkini mensimaslik - bularning hammasini inson ruhiyatidan uzoqlashtirish zarur. Bu vazifalarni ado etishda mahalla va oʻquv muassasalarimizdagi "Orasta qizlar” toʻgaragi aʼzolari fidoyilik koʻrsatmoqdalar. Mahallasiga, koʻchasiga oʻz uyi kabi munosabatda boʻlish hissiyotini shakllantirish ham maʼnaviy, ekologik tarbiyaning ajralmas qismi ekanligini har bir toʻgarak aʼzosi juda yaxshi biladi. "Orasta qizlar” toʻgaragi faoliyatiga oid masalalarning Davlat dasturiga kiritilishi zamirida katta maqsad — sogʻlom va obod turmushni yaratish maqsadi turibdi. Dastur doirasida "Orasta qizlar” koʻrik-tanlovini oʻtkazish bu toʻgarak ishining hayotimiz uchun nihoyatda muhim ahamiyat kasb etayotganligini isbotladi.

Davlat dasturining 39-bandi ijrosini taʼminlash maqsadida "12-yillik majburiy taʼlim - mening saodatim uchun!” shiori ostida "Orasta qizlar” tanlovining tuman bosqichini joriy yilning iyun oyida oʻtkazish rejalashtirilgan. Bu vazifa tuman Xotin-qizlar qoʻmitasi, "Mahalla” xayriya jamoat fondi, "Kamolot” YoIH faollari bilan hamkorlikda amalga oshiriladi.

Xulosa oʻrnida aytganda, yoshlarni zamon talablari asosida oʻqitib, kasb-korli qilish barobarida ularni milliy urf-odatlarimiz, anʼanalarimiz ruhida kamolga yetkazishda oʻquv muassasalari va mahallalar qoshida tashkil etilgan "Orasta qizlar” davrasining oʻrni beqiyosdir.

Gavhar ChIMBAYChIYeVA,

"Mahalla” xayriya jamoat fondi tuman boʻlinmasi boshqaruvi bosh mutaxassisi.

(Foto - http://uza.uz)