PARVOZING MUBORAK!
Tumanimizda faoliyat yuritayotgan Amudaryo akademik litseyi bu yil 226 nafar bitiruvchisini mustaqil hayotga kuzatish arafasida. 2008-yil 1 sentyabrda oʻz ish faoliyatini boshlagan muassasada oʻqituvchilar ilm-fan sirlarini chuqur oʻzlashtirish, oʻzining aql-idrokini fanga bagʻishlashga qaror qilgan yoshlar orzusini amalga oshirish uchun sidqidildan xizmat qilmoqdalar. Akademik litseyda aniq fanlar, tabiiy fanlar, ijtimoiy-gumanitar fanlar va xorijiy fanlar boʻyicha chuqurlashtirilgan bilim beriladi. Kafedralar ilmiy va oʻquv faoliyatida Nukus Davlat pedagogika instituti va Qoraqalpoq Davlat universiteti pedagogik jamoasi bilan oʻzaro hamkorlikni yoʻlga qoʻygan. Oʻquvchilarning dam olishi va dars tayyorlashlari uchun barcha sharoitlar yaratilgan. 100-oʻrinli qizlar yotoqxonasi, 100-oʻrinli oʻgʻil bolalar yotoqxonasida jonkuyar murabbiylar oʻz ota-onalaridek mehribon, ularga hayot saboqlaridan dars berishadi. Yotoqxonada oʻtkaziladigan turli mavzudagi yigʻilishlar, bayramlar, "Sumalak sayli”, "Orasta qizlar” toʻgaragi aʼzolari tadbirlari oʻquvchi-yoshlarni bir ota-ona farzandidek jipslashtiradi. Navbatdagi bitiruvchilarni katta hayotga kuzatish chogʻida oʻquvchilar hayotidagi eng quvonchli kunlar beixtiyor esga tushadi: fan olimpiadalari, turli tanlovlar, sport musobaqalari...
2015-2016 oʻquv yilida Respublika 3-bosqich fan olimpiadasida fizika fanidan 3-bosqich oʻquvchisi Izzat Sobirov, ona tili va adabiyoti fanidan Oltinoy Yoʻldosheva, fizika fanidan 2-bosqich oʻquvchisi Muhayyo Ollaberganova, ona tili va adabiyot fanidan Umida Maqsudboevalar ishtirok etishib, faxrli oʻrinlarni egalladilar va Oʻzbekiston Respublikasi bosqichiga yoʻllanma oldilar "Amir Temur izdoshlari” jamoasi "Shunqorlar” harbiy-sport musobaqalarida tuman va Qoraqalpoqiston Respublikasi miqyosida gʻoliblikni qoʻlga kiritib, Oʻzbekiston Respublikasi bosqichida 3-oʻrin sohibi boʻldi.
Shu kabi quvonchli xotiralar ortda qolmoqda. Bu maskanda taʼlim-tarbiya olgan muassasaning ilk qaldirgʻochlaridan 53 nafari mamlakatimizning eng nufuzli oliy taʼlim dargohlarida oʻqib, ayni kunda tumanimizning turli sohalarida mehnat qilmoqdalar. Ushbu dargohni 1046 nafar oʻquvchi-yoshlar bitirib chiqqan boʻlsa, ulardan 547 nafari hozirgi kunda mamlakatimizning turli oliy taʼlim muassasalarida tahsil olishmoqda. Biz, akademik litsey oʻqituvchilar jamoasi, ayni kunlarda mustaqil parvozga shay turgan ilmga chanqoq, izlanuvchan bitiruvchi yoshlar mustaqil hayotda oʻz oʻrinlarini topa olishlariga ishonamiz va barcha bitiruvchilarga:
- Parvozingiz baland boʻlsin, kelajak qaldirgʻochlari! – deymiz.
Uchirma qush kabi, parvozga shaysan,
Parvozing muborak, sarhad bilmasin.
Ishtiyoqi baland, ilmga chanqoq,
Samimiy qalbingga hech gard qoʻnmasin.
Ustozlar ishonchi, ilm ziyosi -
Orzular ummoni sari eltajak.
Qunt ila oʻqiding, izlanding beshak,
Oʻquvchim, seni kutar nurli kelajak!
Gulnora BOBONIYoZOVA,
Amudaryo akademik litseyi oʻqituvchisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
