SAFARBARLIK ChAQIRUV REZERVIDAGI HARBIY XIZMAT

Oʻzbekiston Respublikasi Konstitutsiyasi fuqarolarga Vatanni himoya qilish majburiyati va burchini yuklaydi. Vatanni himoya qilish instituti turli huquqiy vositalar, shu jumladan davlat xizmatining alohida turi sifatidagi harbiy xizmatni taʼsis etish yoʻli bilan amalga oshiriladi. Oʻzbekiston Respublikasining "Umumiy harbiy majburiyat va harbiy xizmat toʻgʻrisida”gi Qonunining 4-moddasiga muvofiq harbiy xizmatning muddatli harbiy xizmat, safarbarlik chaqiruvi rezervidagi harbiy xizmat, shartnoma asosida harbiy xizmat, Oʻzbekiston Respublikasi Qurolli Kuchlari safida harbiy xizmatni oʻtagan rezervchilar xizmati turlari mavjud.

Muddatli harbiy xizmatni oʻtashga yaroqli hamda chaqirilish muddatini kechiktirish va chaqirilishdan ozod etilish huquqiga ega boʻlmagan, biroq Qurolli Kuchlar safiga navbatdagi muddatga chaqirilmagan shaxslar safarbarlik chaqiruvi rezervi safiga olinadi. Bu xizmat safiga yigirma yetti yoshga toʻlgunga qadar chaqiriladi.

Tuman (shahar) chaqiruv komissiyasi fuqarolarni muddatli harbiy xizmatga chaqirish boʻyicha belgilangan naryad bajarilganidan keyin chaqiriluvchilarni tanlash yoʻli bilan safarbarlik chaqiruvi rezervidagi xizmat safiga olish toʻgʻrisida qaror qabul qiladi.

Shundan soʻng, xizmatga olingan fuqarolar bilan yakka tartibda suhbat oʻtkazilib, Mudofaa vazirligining maxsus hisob raqamiga badal oʻtkazish tartibi toʻgʻrisida yozma shartnoma tuziladi.

Shartnoma mudofaa ishlari boʻlimi boshligʻi, safarbarlik chaqiruvi rezervidagi xizmat safiga olingan shaxs va kafil tomonidan imzolanishi hamda mudofaa ishlari boʻlimi tomonidan roʻyxatdan oʻtkazilgan va muhrlangan boʻlishi kerak. Shartnoma tuzishdan bosh tortilgan taqdirda esa maxsus hisob raqamiga toʻlanishi kerak boʻlgan pul badallari qonun hujjatlariga muvofiq undiriladi. Fuqarolarning pul badali toʻlashlari, xizmat mobaynida oylik harbiy yigʻinlardan oʻtishlari fuqarolar tomonidan safarbarlik chaqiruvi rezervida xizmatni oʻtash shartlari hisoblanadi.

Safarbarlik chaqiruvi rezervidagi xizmat safiga olingan fuqarolar tomonidan maxsus hisob raqamiga toʻlanadigan pul badali summasi eng kam oylik ish haqining 27,5 baravari miqdorida belgilangan.

Shuni qayd etish joizki, pul badallari safarbarlik chaqiruvi rezervidagi xizmat safiga olingan shaxs yoki uning kafili tomonidan Davlat tijorat Xalq banki filiallari orqali «Safarbarlik chaqiruvi rezervi mablagʻlari» maxsus hisob raqamiga shaxsan toʻlanishi kerak.

Byudjet mablagʻlari hisobiga pul badali toʻlash qatʼiyan taʼqiqlanadi.

Tomonlarning kelishuviga koʻra, toʻlov shartnomada belgilangan muddat mobaynida toʻliq hajmda bir yoʻla yoxud bosqichma-bosqich amalga oshirilishi mumkin.

Pul badalini toʻliq miqdorda toʻlagan shaxslar safarbarlik chaqiruvi rezervidagi xizmat safiga olingan kundan boshlab oʻn ikki oy oʻtganidan keyin ularga safarbarlik chaqiruvi rezervidagi harbiy xizmatda boʻlganliklari toʻgʻrisida belgi qoʻyilgan harbiy guvohnomalar beriladi.

Pul badali toʻliq hajmda toʻlanmagan yoki uning bir qismi toʻlanmagan taqdirda, shartnoma shartlariga muvofiq, toʻlanmagan summa (muddatida toʻlanmagan qismi) fuqarodan sud tartibida undirib olinadi.

Bu mablagʻlar Moliya vazirligining "Safarbarlik chaqiruvi rezervi mablagʻlari” maxsus hisob raqamida jamlanadi hamda maqsadli ravishda muddatli xizmat harbiy xizmatchilarining pul taʼminotini oshirishga va ularning yashash sharoitlarini yaxshilashga, shuningdek safarbarlik chaqiruvi rezervi safiga olingan shaxslar bilan harbiy yigʻinlar oʻtkazishga yoʻnaltiriladi.  

Shavkat Haydarov, Shimoli-gʻarbiy harbiy okrug harbiy prokurorining katta yordamchisi, adliya podpolkovnigi.

(Foto: http://jizmehnat.uz)