SAYLOVLAR OChIQ VA OShKORALIK RUHIDA, FUQAROLARNING UYuShQOQLIGI VA FAOLLIGI ASOSIDA OʻTDI

Maʼlumki, joriy yilning may-iyun oylarida butun mamlakatimiz boʻylab mahalla hayotidagi eng muhim jarayon – fuqarolar yigʻini raisi va uning maslahatchilari saylovi boʻlib oʻtdi.

Tumanimizda 14 nafar aʼzodan iborat tarkibda saylovni tashkil etish hamda oʻtkazishga koʻmaklashuvchi tuman komissiyasi hamda fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish boʻyicha 47 ta ishchi guruhlari tuzildi. Tuman komissiyasi va hokimligi tomonidan ishchi guruhlar faoliyati davomida  barcha sharoitlar,  tegishli Qonun hujjatlari va huquqiy adabiyotlar, namunaviy hujjatlar toʻplamlari bilan taʼminlandi.

2016 yilning 10-20-aprel kunlari fuqarolar vakillarini saylash yuzasidan aholi punktlari va koʻchalarda aholining umumiy yigʻilishlari oʻtkazilib, tuman boʻyicha ovoz berish huquqiga ega boʻlgan jami 115117 nafar fuqaro roʻyxatga olindi, aholi punktlari va koʻchalarda – 493 joyda aholining umumiy yigʻilishlari oʻtkazilib, fuqarolar vakillari saylandi.

Fuqarolar vakillarini saylash boʻyicha aholining umumiy yigʻilishlarida ishchi guruhlari tomonidan fuqarolar yigʻini raisi (oqsoqoli) lavozimiga nomzodlar koʻrsatish, ularga qoʻyiladigan talablar, yigʻin raisi (oqsoqoli) maslahatchilarining miqdor tarkibini belgilash, fuqarolar yigʻini raisi (oqsoqoli) maslahatchilari lavozimlariga nomzodlar koʻrsatish haqida aholiga keng tushuntirish berish hamda yigʻin raisi (oqsoqoli) va uning maslahatchilari lavozimlariga eng munosib nomzodlarni saylash yuzasidan fuqarolarning fikr va mulohazalarini umumlashtirish boʻyicha ishlar olib borildi.

Tuman hokimligi va koʻmaklashuvchi komissiya tomonidan saylovga doir jami 9 ta seminar, shu jumladan, 3 ta koʻrgazmali seminar tashkil qilindi.

Ishchi guruhlar tomonidan fuqarolar yigʻini raisi (oqsoqoli) lavozimiga 105 nafar nomzodlar koʻrsatildi, ularning hujjatlari koʻmaklashuvchi komissiyada muhokama qilinib, tuman hokimiga asoslantirilgan xulosalar berishi uchun taqdim qilindi. Shulardan 101 nafar kishini yigʻin raisi lavozimiga nomzod etib kiritishga kelishim berildi. Fuqarolar yigʻini raisi (oqsoqoli) va uning maslahatchilari saylovi boʻyicha vakillar yigʻilishlari 5-may kuni boshlanib, 3-iyun kuni yakunlandi.

Fuqarolar yigʻini raisi (oqsoqoli) va ularning maslahatchilari saylovi yigʻilishlarida vakil boʻlib saylangan jami 3190 nafar vakillardan 2974 nafari, yaʼni 92,3 foizi bevosita saylovlarda ishtirok qildilar.

Amir Temur nomli, Z.M.Bobur nomli ovullar va Bosuv mahalla fuqarolar yigʻinlarida saylovlar yashirin ovoz berish tarzida oʻtkazildi.

Saylangan 47 nafar fuqarolar yigʻinlari raislarining 46 nafari yoki 97,9 foizini oliy maʼlumotlilar, 1 nafari yoki 2,1 foizini oʻrta-maxsus maʼlumotlilar tashkil qiladi.

Jami 47 ta fuqarolar yigʻinlariga saylangan fuqarolar yigʻini raislari (oqsoqollari)ning 2 nafarini ayollar tashkil qiladi, oldin shu lavozimda ishlab kelayotgan 17 nafar yigʻin raisi qayta saylandi, 30 ta fuqarolar yigʻinlarida fuqarolar yigʻinlari raislari (oqsoqollari) yangidan saylandi.

Yigʻin raisi vazifasiga saylanganlarning 2 nafari iqtisodchi, 2 nafari huquqshunos, 17 nafari oʻqituvchi, 21 nafari muhandis, 1 nafari agronom va 4 nafari boshqa mutaxassislik egalaridir. Ularning 4 nafari 40 yoshgacha, 15 nafari 40-50 yosh oraligʻidagi, 28 nafari 50 yoshdan 60 yoshgacha boʻlgan kadrlardir. Xalq deputatlari tuman Kengashi deputatlari boʻlgan fuqarolar yigʻinlari raislari esa 2 nafarni tashkil qiladi.

Saylovlarda fuqarolar yigʻinlari raislarining 471 nafar maslahatchilari saylanib, ular orasida birinchi marotaba saylanganlar 264 nafarni yoki jami maslahatchilarning 56,1 foizini tashkil qildi.

Maslahatchilarning 337 nafari yoki ular jami sonining 71,5 foizi oliy maʼlumotlilar, 106 nafari yoki 22,5 foizi oʻrta-maxsus maʼlumotlilar, 28 nafari yoki 5,9 foizi oʻrta maʼlumotlilardir. Saylangan maslahatchilarning 128 nafari ayollardir. Rais maslahatchilarining 62 nafari 40 yoshgacha, 105 nafari 40-50 yosh oraligʻidagi, 201 nafari 50 yoshdan 60 yoshgacha, 103 nafari 60 yoshdan oshganlar, 3 nafari xalq deputatlari tuman Kengashi deputatlaridir.

Umuman olganda, fuqarolar yigʻinlari raislari (oqsoqollari) va ularning maslahatchilari saylovi keng jamoatchilikning yuqori darajadagi ishtiroki va fuqarolarning faolligi, tashkilotchiligi bilan amaldagi qonun talablariga muvofiq ochiq va oshkora, muqobillik va teng saylov huquqi asosida oʻtkazildi.

Umid qilamizki, yangidan saylangan fuqarolar yigʻinlarining raislari va ularning maslahatchilari Vatanimiz ravnaqi, el-yurt osoyishtaligi, mahallalarimizda mehr-oqibat, oʻzaro hurmat muhitining bardavom boʻlishi yoʻlida fidoyilik bilan mehnat qiladilar.

Rustam ROʻZMETOV, fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi raisi.

(Foto - http://adolat.uz)