“MAHALLANING ENG ORASTA QIZLARI”

Maʼlumki, tumanimizdagi barcha taʼlim muassasalarida jamoatchilik asosida faoliyat olib boruvchi "Orasta qizlar”  toʻgaragi tashkil etilgan boʻlib, bu toʻgaraklarda qizlarni mustaqil hayotga oʻrgatish asnosida tozalik, ozodalik, orastalik, gigiyenaga oʻrgatish hamda eng muhimi, maʼnaviy dunyoqarashini shakllantirish nazarda tutilgan. Voyaga yetmagan qizlar orasida erta turmush va tugʻruqlarning oldini olish, sogʻlom turmush tarzini targʻib qilish yoʻlga qoʻyildi. Bu toʻgaraklarga faol qizlar aʼzo boʻlib, tengdoshlari oʻrtasida tashviqot-targʻibot ishlarini olib borishmoqda.

Shuningdek, yoshlarni 12 yillik majburiy taʼlim jarayoniga qamrab olish, oilaviy hayotga tayyorlash, erta tugʻish va erta turmushga chiqarish holatlarining oldini olish, oilalar turmushi buzilishining oldini olishda hamkorlik tizimi yaratildi.

Dastlab maktab oʻquvchilari, soʻng litsey, kollejlar oʻquvchi qizlari orasida "Orasta qizlar” toʻgaraklari tashkil etilgan boʻlsa, ayni kunda bu toʻgaraklar faoliyati keng koʻlam kasb etib, mahalla tizimiga ham olib kirildi va yagona reja asosida faoliyat koʻrsatmoqda. "Orasta qizlar” toʻgaragi aʼzolariga shifokorlar, tajribali uy bekalari, koʻpni koʻrgan onaxonlar ozodalik «Alifbe»sini oʻrgatish bilan toʻgarak mashgʻulotlarini boshlab, bugun mahalla-koʻyga, xonadonlarga orastalik va pokizalikni olib kirdilar.

Yaqinda tuman Xotin-qizlar qoʻmitasi, «Mahalla» xayriya jamoat fondi, «Kamolot» YoIH faollari bilan hamkorlikda "12 yillik majburiy taʼlim – mening saodatim uchun” shiori ostida "Orasta qizlar” tanlovining tuman bosqichi boʻlib oʻtdi.

Tanlov yakunida hakamlar hayʼati xulosalariga koʻra, 3-oʻrinni Ayoqchi mahalla fuqarolar yigʻini, 2-oʻrinni Jumurtov shaharcha fuqarolar yigʻini hamda faxrli 1-oʻrinni Qilichboy ovul fuqarolar yigʻini "Orasta qizlari” egalladilar va tashkilotchilarning faxriy yorliq hamda esdalik sovgʻalari bilan taqdirlanib, tanlovning Qoraqalpogʻiston Respublikasi bosqichiga yoʻllanmani qoʻlga kiritdilar.

"Mahallaning eng orasta qizlari” koʻrik-tanlovi gʻolibi boʻlgan Qilichboy ovul fuqarolar yigʻinining "Sharq gavhari” jamoasiga keyingi bosqichda ham omad tilaymiz!