MAHALLAM – MOʻʼJAZ VATANIM

Oila - moʻʼjaz Vatan. Biz oilada katta boʻlamiz. Men oilamizni chinor daraxtiga oʻxshataman. Chunki chinor – bu baquvvat, sersoya va eng koʻp umr koʻruvchi  daraxtdir. Oilada har bir farzand kelajakda yetuk va barkamol boʻlib voyaga yetadi. Ota qattiqqoʻl boʻlishi mumkin, ammo uning qattiqqoʻlligi evaziga farzand sabr-bardoshli boʻlib ulgʻayadi. Mahalla – biz uchun eng qadrdon goʻsha. Chunki mahallada namunali oilalar shakllanadi. Mahallada ulgʻaygan insonlar bir-biriga suyanib, bir-birini ardoqlab yashaydilar.

Mustaqillik yillarida mahallamizda katta oʻzgarishlar roʻy berdi. Buni bir soʻz orqali  taʼriflab berish qiyin. Mahallamizda yashovchi har bir inson koʻchatlar ekib, mahallamizning koʻrkiga yanada koʻrk qoʻshdi. Faqat bizning  mahallada emas, bu ishlar boshqa mahallalarda ham amalga oshirilib, guzarlar yanada goʻzallashib ketdi. Imoratlar koʻzlarni quvontiradi.

Mahallamizda toʻylar-toʻylarga, bayramlar-bayramlarga ulanib kelmoqda. Nuroniy bobolarimiz esa duo qilib charchamaydilar. Men shunday bagʻrikeng, mehmondoʻst, har qanday insonni ochiq yuz bilan kutib oladigan, qalbida birovga yomonlik tilamaydigan, biroq boshiga ogʻir kun tushsa, uning yonida tura oladigan mahalladoshlarim bilan faxrlanaman.