YaXShI OʻQIB, ORZUIMGA ERIShDIM
Mamlakatimizda biz yoshlar uchun yaratib berilayotgan imkoniyat va sharoitlarning cheki-chegarasi yoʻq. Ayniqsa, oʻqib, bilim olaman, degan tengdoshlarimiz bemalol oʻzlari qiziqqan sohalarning bilimdonlari boʻlishi, oʻz iqtidorlarini namoyon etishlari mumkin. Shunday boʻlsa-da, baʼzi oʻz kelajagiga loqayd tengqurlarim oliy oʻquv yurtiga oʻqishga kira olmasalar, kamchilikni oʻzidan emas, aksincha, boshqa tomonlardan qidirishadi. Biri: "test sinovlarida adolat boʻlmadi”, - desa, yana biri: "umuman biz oʻqimagan, notanish manbalardan savollar tushdi”, - deb bahona qilishadi. Aslida esa bundaylarning oʻzlari oʻz kelajagiga loqayd, bilimi sust.
Men tumanimizning chekka hududi – "Toʻlqin” ovulida tugʻilib, oʻsdim. Oʻrta maktabni tugatgach, Amudaryo akademik litseyida, aniq fanlar yoʻnalishi boʻyicha tahsil oldim. Litseyda olgan bilimim bilan qanoatlanmay, oʻz ustimda tinmay ishladim, oʻqib-izlandim. Akademik litseyni muvaffaqiyatli tugatgach, Toshkent axborot texnologiyalari Universitetining Nukus filialiga, kompyuter muhandisligi fakultetiga hujjatlarimni topshirdim. 1-avgust kuni, quvonch bilan aytaman, men Universitetning shinam auditoriyasida oʻz bilimimni davlat test sinovlaridan oʻtkazarkanman, oʻsha daqiqalardayoq oʻzimni baxtiyor talabalar safida yurgandek his etdim. Chunki men test savollarining salkam 90 foizini toʻgʻri yechganimga oʻsha onlardayoq ishondim.
Test natijalari eʼlon qilinganida esa mendan baxtli inson yoʻqdek edi dunyoda! Men mamlakatimizdagi eng nufuzli oliy oʻquv yurtlaridan biriga davlat granti asosida oʻqishga qabul qilindim. Albatta, bu quvonchimni oʻzim tahsil olgan jonajon akademik litseyimdagi aziz ustozlarim bilan baham koʻrgim keldi. Ustozim, 302-guruh rahbari Mansur aka Yerimbetovdan yanada quvonchli xabar eshitdim. Chunki men tahsil olgan Mansur aka Yerimbetov rahbarligidagi aniq fanlar yoʻnalishidagi 302-guruhimiz oʻquvchilaridan 23 nafar, Jahongir aka Nurimbetov rahbarligidagi 301-guruhdan 25 nafar hamkurs doʻstlarimizga, litseyimiz boʻyicha esa 87 nafar oʻquvchiga talabalik baxti nasib etgan edi. Ularning deyarli yarmi davlat grantlari asosida oʻqishga qabul qilinganlari yanada quvonchli.
Demak, mamlakatimizda bilimdon, zukko, qobiliyatli yoshlar uchun barcha imkon eshiklari ochiq. Test sinovlari esa adolat va haqiqat tamoyillari asosida oʻtkaziladi. Men barcha tengdoshlarimni erishgan yutuqlari va mustaqilligimizning 25 yillik bayrami bilan tabriklayman, ularning mustaqil davlatimizga sodiq, barkamol insonlar boʻlib yetishishdek ezgu orzulariga omad tilayman.
Sanjar Odilov,
Toshkent axborot texnologiyalari Universitetining Nukus filiali 1-bosqich talabasi.
(Foto - https://tuit.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
