YuRTBOShIMIZ BILAN SAMARQANDDA VIDOLAShDIK
Oʻzbekiston degan yurtni butunlay yangidan kashf qilgan bebaho insonni soʻnggi manzilga kuzatish marosimida qatnashib keldim. Oʻz xalqini yuragidan sevib, millatini ulugʻlab, milliyligini ardoqlab, har bir keksani oʻz ota-onasidek qadrlab, har bir yoshni oʻz farzandidek aziz bilgan, soʻnggi nafasigacha yurtim, deb yashagan buyuk inson bilan vidolashish juda ogʻir boʻldi.
Umri davomida hisobsiz ezgu ishlarni amalga oshirgan, har bir insonning qalbida kelajakka ishonch, orzu-umidlar uygʻota olgan insondan ayrilish barchamiz uchun ogʻir judolikdir.
Samarqand shahar aeraportidan to Registon maydonigacha boʻlgan yoʻlning ikki tomonida odam gavjum edi. Kimdir oʻz mehribon otasidan, kimdir eng yaqin jigarbandidan, kimdir eng aziz qadrdonidan ayrilgan odam kabi figʻon tortib yigʻlayotganining guvohi boʻldim...
Haqiqatan ham, Prezidentimiz har birimiz uchun mehribon ota, qadrdon doʻst, dono yoʻlboshchi, maʼnaviyatli ustoz edilar.
Buyuk insonning oʻlimidan ona tabiat ham iztirobda edi, goʻyo. Oʻsha kuni quyosh ham bulutlar orasiga berkindi.
Prezidentimiz bayrogʻimizning hamisha yuksaklarda hilpirashini istar edilar. Yurtboshimizning oʻlimini hatto koʻchalardagi bayroqlar ham his qilgandek, yerga egilgan...
Motam marosimida qatnashib, qalbim toʻla gʻam, koʻzim toʻla yosh bilan ish joyim - akademik litseyga keldim. "Xotira darsi”da qatnashgan barcha oʻquvchilar koʻzida yosh bilan qarshi oldilar. Ularga yupatuvchi soʻz aytishga chogʻlandim. Afsus, koʻzimdagi yosh, boʻgʻzimdagi dard, yuragimdagi gʻam xalal berdi.
Aziz Yurtboshimizning "Biz buyuk yurt farzandlarimiz!”, "Oʻzbekiston – kelajagi buyuk davlat!”, "Biz hech kimdan kam emasmiz, kam boʻlmaymiz!”, "Men aziz farzandlarimga ishonaman!” degan soʻzlari hamisha qulogʻimizda jaranglab turadi. Shunday buyuk insonni hayotligida ikki marta koʻrish baxtiga erishganimdan hamisha faxrlanib yuraman. Yuzida nur balqib turganiga lol qolganman. Qaragan odam yana bir qarasam, der edi. Yuz minglab yurtdoshlarining yelkasida qalqib borayotgan tobutini koʻrganimdagi holatimni bayon qilib bera olmayman. Prezidentimizning nurli siymosi hamisha koʻz oʻngimizda, porloq xotirasi yuragimizda yashaydi!
Otabek YOʻLDOShOV,
Amudaryo akademik litseyi direktori,
Qoraqalpogʻiston
Respublikasi Joʻqorgʻi Kengesi deputati.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
