JONKUYaR USTOZ
Ustoz – otangday ulugʻ, deb bejizga aytilmagan. Ustoz hunar oʻrgatadimi, bilim beradimi, inson kelajagiga poydevor yaratilishiga sababchi boʻladi. Buyuk zotlar, alloma-yu davlat arboblari, shoir-u yozuvchilar ham ustozlardan saboq olishgan. Hozirda ham qaysi sohada kimdir biror yutuqqa erishsa, uning ustozi kuchli, bilimli inson edi, shuning uchun shu darajaga yetishgan, deyishadi.
Bu yil oʻzining qutlugʻ 60 yoshini nishonlayotgan jonkuyar ustoz Zulfiya opa Yuldasheva mening qalbimda adabiyotga, sheʼriyatga mehr uygʻotgan fidoyi insonlardan. Men oʻqigan Furqat nomidagi, hozirgi 4-sonli umumtaʼlim maktabida 33-yil ona tili va adabiyoti fanidan dars bergan ustozim Zulfiya opa Yuldashevaning yuzlab shogirdlari mamlakatimizning turli hududlarida halol mehnat qilishmoqda.
Zulfiya opa 1977-yilda Toshkent Davlat pedagogika institutining filologiya fakultetini tugatib, oʻsha yili Furqat nomli, hozirgi 4-sonli maktabda ona tili va adabiyoti fani oʻqituvchisi boʻlib oʻz ish faoliyatini boshladi. Oʻzining izlanuvchanligi va yangiliklarga intilishi bilan ajralib turgan Zulfiya Yuldasheva tezda maktab jamoasining eʼtiborini qozondi. Bayram va tadbirlarni tashkillashtirish, shoir va yozuvchilar ijodiga bagʻishlangan kechalar oʻtkazishga bosh-qosh boʻldi.
Opa adabiyot toʻgaragiga ham rahbarlik qilardi va bizga sheʼr va hikoyalar mashq qilishimizni aytardi. Eng yaxshi yozilgan sheʼr va hikoyalar egalarini ragʻbatlantirardi. Ragʻbat sifatida rasm daftar, rangli qalamlar, oʻchirgich, shunga oʻxshash narsalarni sovgʻa qilardi. Biz oʻquvchilar ustozimiz bu sovgʻalarni oʻz oylik maoshidan olganini keyin, maktabni bitirgach bilganmiz. Endi oʻylab qarasam, bu kasbga fidoyilikning bir koʻrinishi, ustozning jonkuyarligi ekan.
Qoraqalpogʻiston xalq taʼlimi aʼlochisi Zulfiya opa Yuldasheva bilim bergan oʻquvchilari orasidan el-yurt hurmatiga sazovor koʻplab insonlar yetishib chiqdi. Ustozning oʻzi esa nafaqaga chiqqan boʻlsalar-da, hamon el dardi, quvonchi bilan yashab kelmoqda. 2013-yildan beri Amir Temur nomli OFYda diniy maʼrifat va maʼnaviy-axloqiy tarbiya masalalari boʻyicha maslahatchi lavozimida ishlab kelmoqda. Men shogird sifatida qishlogʻimiz ahlining deyarli yarmiga ustozlik qilgan Zulfiya opani hayot yoʻlining 60 yillik toʻyi bilan tabriklayman!
Nodira YaNGIBOYeVA,
Amir Temur nomli ovul.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
