“TASANNO” GURUHI KOʻRIK-TANLOV GʻOLIBI
2016-yil 13-oktyabr kuni Nukus shahridagi Yeshchan baxshi nomli musiqa va sanʼat maktabi sanʼat saroyida "Istiqlol gʻunchalari” koʻrik-tanlovining Qoraqalpogʻiston Respublikasi bosqichi boʻlib oʻtdi.
Mazkur koʻrik-tanlovni oʻtkazishdan maqsad – yosh avlodni milliy qadriyatlarimizni eʼzozlashga hamda koʻpmillatli mamlakatimizda yashayotgan xalqlarning boy madaniy meros va anʼanalarini qadrlashga oʻrgatish, ularning sanʼat va badiiy havaskorlik ijodiyotiga boʻlgan qiziqishlarini oʻstirish, iqtidor egalarini aniqlash va qoʻllab-quvvatlash, musiqiy va estetik didlarini shakllantirish hamda vatanparvarlik ruhida tarbiyalashdir.
Anʼanaviy ijrochilik, estrada qoʻshiqchiligi, yakka va ansambl cholgʻu ijrochiligi, yakka va jamoa raqs ijrochiligi yoʻnalishlari boʻyicha oʻtkazilgan koʻrik-tanlovda korxona va tashkilotlar tasarrufidagi madaniyat saroylari hamda hududlardagi madaniyat va aholi dam olish markazlarining 7 yoshdan 16 yoshgacha boʻlgan bolalar badiiy jamoalari hamda yakka ijrochilar ishtirok etdilar.
Koʻrik-tanlov gʻoliblarini tanlash chogʻida ishtirokchilarning ijrochilik mahorati, kuy-qoʻshiqlarning mazmuni, sahnadagi harakati, liboslari eʼtiborga olindi.
Tuman madaniyat va aholi dam olish markazi "Tasanno” doirachilar havaskorlik jamoasi yakka va ansambl cholgʻu ijrochiligi yoʻnalishi boʻyicha tuman bosqichida gʻolib boʻlib, Respublika bosqichiga qatnashish huquqiga ega boʻlgan edi. Mazkur jamoa aʼzolari Qoraqalpogʻiston Respublikasi bosqichida ham faol ishtirok qilib, faxrli 1-oʻrinni egallashdi va Oʻzbekiston Respublikasi bosqichida qatnashish huquqini qoʻlga kiritishdi.
"Tasanno” doirachilar havaskorlik jamoasi rahbari Akmal Rajabov, 36-sonli umumtaʼlim maktabi 9-sinf oʻquvchisi Inomjon Kamolov, 16-sonli ixtisoslashgan umumtaʼlim maktabi 6-sinf oʻquvchisi Dilshod Jumaboyev 8-sonli ixtisoslashtirilgan umumtaʼlim maktabi 8-sinf oʻquvchisi Begdulla Shukurullayev, 36-sonli umumtaʼlim maktabi 6-sinf oʻquvchisi Sarvar Durdiboyev, 55-sonli umumtaʼlim maktabi 6-sinf oʻquvchisi Rasul Rajabovlar Oʻzbekiston kasaba uyushmalari federatsiyasining Qoraqalpogʻiston kasaba uyushmalari tashkilotlari birlashmasi Kengashi tomonidan Faxriy yorliqlar va qimmatbaho sovgʻalar bilan taqdirlanishdi.
Ulugʻbek ABDURAHMONOV,
taʼlim, fan va madaniyat xodimlari kasaba uyushmasi tuman Kengashi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
