HOKIM YoShLAR BILAN UChRAShDI

Mamlakatimizda yoshlar salohiyatini yuksaltirish, ularning iqtidor va qobiliyatlarini roʻyobga chiqarish, kelajagimiz egalarini jamiyatning faol aʼzolariga aylantirish borasida keng koʻlamli ishlar amalga oshirilmoqda. Shu maqsadda yaqindagina qabul qilingan "Yoshlarga oid davlat siyosati toʻgʻrisida”gi Qonun Oʻzbekiston yoshlari hayotining barcha yoʻnalishlarini yanada keng qamrab oldi. Ushbu Qonun ijrosini hamda davlat hokimiyati organlarining ochiqligini taʼminlash, yoshlarning huquq va manfaatlarini himoya qilgan holda ularning bilim va salohiyatlarini, iqtidorlarini yuzaga chiqarish, yoshlar orasida ishbilarmonlik muhitini yaratish, kasb-hunar egallashlari, ish bilan bandligini taʼminlash hamda tadbirkorlik faoliyatlarini boshlashlarida koʻmaklashish maqsadida tumanimiz yoshlarining tuman hokimi Sultonboy Yoʻldashev bilan uchrashuvi boʻlib oʻtdi.

Shu yilning 22-noyabr kuni "Vatan  kelajagi sening qoʻlingda!” shiori ostida oʻtkazilgan "Hokim va yoshlar” mavzusidagi uchrashuv yigʻilishida tuman hokimi, hokim oʻrinbosarlari, hokimlik masʼul xodimlari, Davlat Soliq inspektsiyasi, tijorat banklari boshqaruvchilari, Akademik litsey, kasb-hunar kollejlari va shahar maktablari direktor oʻrinbosarlari, Akademik litsey hamda kasb-hunar kollejlarining bitiruvchi-yoshlari ishtirok etdilar.

"Hokim va yoshlar” uchrashuvida tuman hokimi Sultonboy Yoʻldashev "Yoshlarga oid davlat siyosati toʻgʻrisida”gi Oʻzbekiston Respublikasi Qonuni doirasida tumanda olib borilayotgan ishlarga keng toʻxtaldi.

Shuningdek, tuman hokimi bugungi kunda mamlakatimiz aholisining 60 foizini yoshlar tashkil qilishini, Oʻzbekiston MDH davlatlari orasida yil sayin yasharib va juda tez rivojlanib borayotgan davlat ekanligini taʼkidladi.

– Dunyo hamjamiyati tomonidan taraqqiyotning oʻziga xos oʻzbek modeli sifatida eʼtirof etilgan havaslarga  loyiq rivojlanish tamoyillari bugun xalqimizni haqiqiy farovonlik, baxt-saodat yoʻliga olib chiqdi, - dedi u oʻz soʻzida. – Mamlakatimizning bunday yuksalishida yoshlarning hissasi yanada salmoqli. Chunki mustaqillikning ilk yillaridanoq muhtaram Birinchi Prezidentimiz tashabbusi bilan yoshlarga eʼtibor davlat siyosati darajasiga koʻtarildi. Mustaqil Oʻzbekistonda ilk qabul  qilingan Qonunlardan biri ham "Yoshlarga oid davlat siyosatining asoslari toʻgʻrisida”gi Qonun boʻldi. Ushbu Qonun asosida mamlakatimizda sogʻlom va barkamol avlodni tarbiyalash, hech kimdan kam boʻlmagan millat yoshlarini voyaga yetkazish borasida juda katta miqyosdagi ishlar amalga oshirildi. Chunonchi, 2014-yil 6-fevralda Birinchi Prezidentimizning "Oʻzbekiston Respublikasida yoshlarga oid davlat siyosatini amalga oshirishga qaratilgan qoʻshimcha chora-tadbirlar toʻgʻrisida”gi Qarori asosida qabul qilingan Dastur doirasida yoshlar hayotiga oid barcha yoʻnalishlar qamrab olindi. Oʻzbekiston yoshlari, shu jumladan, tumanimiz yoshlari ham barcha sohalarda yuksak natijalarga erishdilar. Ayniqsa, ilm-fan va ijodda, sport va tadbirkorlik sohalarida jahonning ilgʻor yoshlari safidan joy olmoqdalar. Tumanimiz yoshlari 4-dekabr kuni boʻlib oʻtadigan Oʻzbekiston Respublikasi Prezidenti saylovida faol ishtirok etishlariga ishonaman.

Kun tartibidagi "Kasb-hunar kolleji bitiruvchilari bandligini taʼminlash toʻgʻrisida”gi masala boʻyicha tuman Bandlikka koʻmaklashish markazi direktori Akbar Xoʻjamurodov, "Yoshlarning boʻsh vaqtlarini mazmunli tashkil etish, faoliyat koʻrsatayotgan toʻgaraklar samaradorligini oshirish toʻgʻrisida”gi masala boʻyicha tuman XTMFMTTE boʻlimi mudiri Ozod Matmurodovlar maʼruza qildilar.

Maʼruzalar yuzasidan boʻlgan muzokaralarda tuman xotin-qizlar qoʻmitasi raisi M.Ahmedova, "Mahallaning orasta qizlari” koʻrik-tanlovining Oʻzbekiston Respublikasi bosqichi gʻolibi, Amudaryo maishiy xizmat koʻrsatish kasb-hunar kolleji 2-bosqich oʻquvchisi Muhayyo Yoʻldosheva, "Tadbirkor qizning eng yaxshi loyihasi – 2016” koʻrik-tanlovining Qoraqalpogʻiston Respublikasi bosqichi gʻolibi Gulnura Toʻliboyevalar soʻzga chiqishib, mamlakatimizda, xususan tumanimizda yoshlar uchun yaratilayotgan imkoniyatlar va shu imkoniyatlardan unumli foydalangan holda oʻzlari erishayotgan yutuqlar haqida gapirdilar.

Uchrashuv kun tartibida koʻrilgan masalalalar yuzasidan savol-javoblar boʻldi. Yoshlar tuman hokimi S.Yoʻldashevga oʻzlarini qiziqtirgan savollar bilan murojaat qildilar. Tuman hokimi yoshlarning barcha savollariga batafsil va atroflicha javob berdi.

Samimiy muloqotlarga, munozaralarga boy tarzda oʻtgan "Hokim va yoshlar” uchrashuvi yakunida tuman hokimi S.Yoʻldashev bir guruh iqtidorli yoshlarga sovgʻalar topshirdi. Uchrashuv yoshlarda katta taassurot qoldirdi.

R.YOʻLDOShEVA.